hevulu 7 - buacou seiso no faeva esvʉtʉ

saisi maicisito

¹ 'e maicisito zou honte to salemu, maezo saisi to sopepea ci hamo. ne ohsi opcoza to 'avulahamu 'o mahohonte, nemo ehtothomʉ ho yuovei, isi yungeova to maicisito, a'vinano tooyokeoi.

² 'o 'avulahamu mo i'mi to ohsi tov'oha ho mayo tomo amaskaconi ho faeni. (ahoisi, 'o e'a'ausna to ongko to maicisito zou ; maica ho zou'so honte to salemu, 'o ongkosi zou maezo 'o e'a'ausnasi.)

³ 'o maicisito mo uk'a amo, uk'a ino, uk'a ci ceona no suezopʉsi, maezo uk'a ci tposʉ no yayo ho mcoi. mo aʉlʉ totiski to oko to hamo, 'auesiesi saisi.

⁴ temu ta'to'tohʉngva, mo mainenu na hiasi taunona'vʉ! 'o papoevʉ to suezopʉ ci 'avulahamu isi acʉha faeni 'o amaska coni to ohsi tov'oha ne moso yu'susuyumo.

⁵ i'omo saisi ci mʉntʉ'ca to levi, mo mito hia esvʉtʉ to hoolicu, mi'usnu to yatatiskova to 'isolaelu, 'ai'oeno iachihe 'oahngʉ, ateuyuna 'o amaska coni, e'vono zou totiski mʉntʉ'ca to 'avulahamu.

⁶ at'inghi, 'o maicisito o'amo tma'usnu to t'ʉcna to levi, a'vinano mo a'pʉ'pʉyʉ to amaska coni to 'avulahamu, a'vinano tooyokeoi 'omo tiou to isi teomneni to hamo ci 'avulahamu.

⁷ 'omo tooyokeo to mocmo te meoisihe to isi tooyokeoi, uk'a cite taakoknuevasi tan'e.

⁸ hocic'o e'usna to saisi. la tiou to amaska coni to cou. te ahtuo'te mcoi; at'inghi. hoci e'usna to maicisito. la maezo tiou to amaska coni. at'inghi mo yaansoua. aʉlʉ mais'a 'o e'e to seiso.

⁹ i'mi tan'e, ne moso mofi to amaska coni 'o 'avulahamu, teto peelʉi yainca, 'o levimoso maezo mofi to amaska coni (na a'ʉmtʉsi 'o mʉntʉ'ca to levi la tiou to amaska coni).

¹⁰ a'ʉmtʉsi, ne ohsi yungeova to maicisito 'o 'avulahamu, o'amocu moso yayo 'o levi, at'inghi teto peelʉi yainca, mohcu no'ayumonʉ to feango to nia maameoisi ci 'avulahamu.

¹¹ 'o ohola faeni to cou'isolaelu ci hoolicu 'aohoeno i'tohungveni to 'ofiha to saisi to levi. hoci micueno a'sʉftonʉ 'o 'ofiha no saisi to levi, o'anante 'ahʉyʉ yaa h'unasi ci maicisito - o'a 'along - ci h'ofiha no saisi.

¹² homoeno aezuhu 'e h'ofiha no saisi, 'ateeno maezo aezuhu 'o hoolicu.

¹³ 'o nooe'ocato, 'ai'oisieno toʉsvʉsvʉtneni maitan'e cimo cihi, mo tma'usnu tomo h'unasi ci suezopʉ; 'e suezopʉ eni uk'amocu ci mosola ahtu saisi, ho yonto 'oyona sʉ'tʉ ho yaahioa.

¹⁴ ito toehunga cohivi. 'o nooe'ocato mo tma'usnu to suezopʉ to yutaya; ne ohsi engha to moose 'o saisi. ma'i ohsi e'upa 'e suezopʉ eni.

totiski to maicisito cimo h'unasi ci saisi

¹⁵ isicu h'unasa husansana 'e a'a'ausnasi maitan'e, maica ho micu yuyafo 'emo h'unasi ci mo mais'a 'o maicisito ci saisi.

¹⁶ homo saisi, o'amo i'mi no t'ʉcna no h'oesvʉta, mo i'mi to tonʉ no uk'a noca'cʉ'hi nsou.

¹⁷ maica isi 'akasi to seiso ho yainca:

¹⁸ maicac'o, 'o noana'o ci h'ofiha isi aapayo'a; maica homo yoz'u ho uk'a tonʉ, uk'a ci a'a'ausna.

¹⁹ 'o hoolicu to moose o'atesi peelʉi poa peihcʉ'ho no a'sʉftonʉ 'emo mav'ov'o ci hi'hioa. maitan'e mitocu yaa asuhcu ʉmnʉ ci ta'usni, ieni tan'e, teto meelʉ ohcum'u to hamo.

²⁰ mocmosi tan'e, panton'a esvʉta to hamo, hola p'eyac'a 'o mocmo ci saisi uk'a 'emo maica ci esvʉtʉ.

²¹ at'inghi 'o iesu isi ieni to esvʉtʉ ho meelʉ saisi; ohsila mi'usni to hamo ho yainca: mosola esvʉtʉ 'o nooe'oca, o'ate ahtu aezuhu na 'tohʉngʉ: teko 'auesiesi saisi.

²² 'emo maica ci naskuca isi poa hosoo tomo asuhcu ʉmnʉ ci esvʉta 'o iesu.

²³ panton'a h'unasi ci naskuca, ne noana'o mosola botngonʉ 'o oho p'eyac'a ci saisi; maica homo mcoi, o'amo meelʉ a'cʉ'cʉnʉ yaahioai.

²⁴ at'inghi, mo 'auesiesi yayo 'o iesu; 'o lasi hioa to saisi o'ate ticngiha no mocmo.

²⁵ ko'koeno, tesi conino peelʉi to'usni 'omo emomio to iachisi ho ohcum'u to hamo ci cou; maica homo 'auesiesi yaansoua, mi'usnu to hamo ho eoho'neni.

²⁶ maicac'o, 'o iesu 'aeno 'o ito tata'ia ci teto noe'oci ci taisaisi. zou socofkoya, uk'a peis'epo, uk'a kuisi; isi i'mi tamo yaa kuisi ci cou ho ah'una, taspepza ho poa noepehe ta maepepe.

²⁷ o'amo totiski to mocmo ci taisaisi, o'ate nama huhucmasa auevan'a sʉ'teni 'e iachisi kuisi, hocu sʉ'teni 'e kuisi ta yatatiskova. mosoc'o i'nʉskʉ sʉ'tʉ; isi sʉ'ta 'o iachisi, isic'o peisnʉski aepʉnga.

²⁸ 'o hoolicu to moose isi p'eyac'a 'e o'amo a'sʉftonʉ ci cou ho poa taisaisi; at'inghi, 'o hamo mo yonta ataveisi to hoolicu ho esvʉtʉ ho teomneni, p'eac'acu 'o 'auesiesi ho a'sʉftonʉ ci okosi.