hevulu 6 - buacou seiso no faeva esvʉtʉ

¹ maicacu, mantetocu saf'uha na ahoisi ta fukuin to kilisto, mi'usnu no micu asuhcu yʉepʉngi ci singkoo ho emosuhcu. o'ateto amameoi yontac'o ahoisi ta singkoo ho bitotonʉ, mais'a 'oeno ma'susuae no kuici h'oyunsova, tmaa'uzo to hamo,

² h'unasi ci toonono, meehoe'oci, smoevovei namo mcoi, 'auesiesi ci yʉsvʉtʉ tamo ma'maica ci hia mahsʉsʉftʉ.

³ teto poa emo'usnu no micu yʉepʉngi ci singkoo ho emosuhcu! hocisi teomneni to hamo, 'aeno eni na teto hioa.

⁴ i'ocu 'omo mongoi tomo emzo ci ceonʉ ci cou, tee mainenu hoci poa i'momhomʉ i'vaho ma'vovei? panoniacula hiasi psoetiskovi to hamo, olʉa na na'ausna no tma'usnu ne pepe ci mengumi, mohcula maezocu tma'upu to seilei,

⁵ a'vinano ta'hongi na 'oyonghua no e'e to hamo, yaeza ta'hongi na tonʉ no puesona ta hpʉhpʉngʉ,

⁶ mioc'on'a mongoi ta emzo ci ceonʉ. 'emo maica ci cou 'anate peelʉi poa miovei, i'momhomʉ ma'vovei; maica ho ihe i'vaha spica to zuuzika 'o oko to hamo, apa'ta aokoe'iya.

⁷ 'emo cono ezoyʉ la conino esusu no mʉchʉ, cmʉfeʉ 'e machachae, la meoino koa ʉmnʉ tamo emʉemʉm'ʉ ci cou, na eni isi pafeni to hamo ci ʉm'ʉmnʉ.

⁸ at'inghi, 'e ezoyʉ eni hoci cmʉfeʉ na o'ate koa ʉmnʉ ci cʉcʉmʉ ho emcu, tec'u sokoeva no noa patkuzoi, a'vinano te noa hmoi.

⁹ at'inghi, songohia ci maananghia, 'upena ho isieno pat'usna yaica, imzac'on'a asngʉcva ta'sansana taa'uzva tee asuhcu ʉmnʉ na a'a'ausnamu, asuhcu nocmu'u no noa to'usni.

¹⁰ la mouhmʉskʉ 'o hamo; o'atesi ahta ta'payo'a na ohmula hioaneni ci hi'hioa ho ina himngonghi, 'aeno i'mi to lamu hia o'te tosvo to'usnu to mocmo ci sinto.

¹¹ 'olamza someoino no tata'zeni: 'e mimu macicihi la ahoi no ahoisi apaezumo cuveu ci 'tohʉngʉ, ko'ko poa meelʉ esmi na lamu afu'a mingeovi ci hi'hioa.

¹² 'otela ma'mio, la momaemaezo tola tmaa'uzo ho luaveica ci cou, ho tiou to ohsila teomneni to hamo.

asansano ci ohsi teomneni to hamo

¹³ ne moso mi'usnu to 'avulahamu 'o hamo ho p'eyac'a 'o isi teomneni, moso esvʉtʉ. maica ho uk'a cimo tosa'o to iachisi, cu mi'usnu to iachi ongko ho esvʉtʉ.

¹⁴ isi yainca:

¹⁵ ohsi uveica totea to 'avulahamu, petohʉyacu toc'ʉha 'o ohsila teomneni to hamo.

¹⁶ hola esvʉtʉ 'e cou, mala mi'usnu tomo tosa'ohe ta iachi ho esvʉtʉ; 'e e'e no esvʉta la iftongi no aepʉngʉ na afu'u yupa eehcʉvho ta taico ta cou.

¹⁷ mi'usnu tote tiou no teomneni ci cou, tesi pahsansani to hamo, tesi 'auesiesia o'te aezuha na ohsi ta'koeva, cu yonto isi teomneni ho topuhngi to e'e no esvʉtʉ.

¹⁸ 'emo yuso ci a'a'ausna o'ate ahta aezuha, maica o'ate meknuyu 'o hamo. ko'koeno, i'mi tan'e. 'e mito biebimi no noa aʉt'ʉca to hamo ci cou a'ʉmtʉ tiou no meoino poucufnu, la tʉyʉca 'emo yonta ito mi'usni ci lato ta'usni.

¹⁹ mito yaa maica ci ta'usni, aʉlʉ mais'a momsʉhcʉ'o no nsou, tmaʉlʉlʉ ho noe'oci, yupaezumo to toomʉtʉ to seiten ne pepe, sʉc'ʉhʉ to socofkoyana ne 'ayumonasi.

²⁰ nomio a'to, mo papoevʉ 'o iesu, auyu sʉc'ʉhʉ ne'e; isicu yaito t'ʉcna to maicisito ho 'auesiesi taisaisi.