hevulu 5 - buacou seiso no faeva esvʉtʉ

¹ 'emo macicihi ci taisaisi la acʉha i'mi tamo botngonʉ ho epeiya, la asvʉta no fifiho to hamo ho yaahioaneni 'e yatatiskova, nomio to kuisihe ho mi'usnu to hamo ho mofi no teonghia ho ito sʉ'ta.

² 'o taisaisi mio iachi maezo man'i cila yoheoz'u, i'mi tan'e ko'ko meelʉ ma'cocacni ho mi'usnu tola nongonongo ho itola peis'epo ci cou.

³ a'vinano, maica homo iachi yoz'u, o'amo anouc'o nomio to kuisi ta yatatiskova ho sʉ'tʉ, lasi yaeza sʉ'teni 'e iachisi kuisi.

⁴ uk'acite meelʉ iachi mayo no so'einva ci ca'hʉ to taisaisi, i'oc'o 'o isi epeiya to hamo ci cou nate meelʉ taisaisi, mais'a i'o 'along.

⁵ totiski, 'o kilisto o'amo nomio no iachi ho ti'eingi no so'einva ci ca'hʉ to taisaisi; apuyu, isi mi'usni to hamo ho yainca: zou oko'u suu; maitan'e teko amo a'o.

⁶ isi i'vaha yainca tomo h'unasi: teko fiho to t'ʉcna to maicisito. 'auesiesi saisi.

⁷ ne moson'a yonta hpʉhpʉngʉ 'o iesu, mosola mi'usnu tote meelʉ to'usnu ho poa momeesih'i no mcoi ci hamo ho tmunoi 'inoli, yʉesʉ ho eyoho'ʉ. maica homo ma'ceaco, isi talʉi to hamo 'o hiasi eyoho'ʉ.

⁸ e'vono zou oko to hamo. mioc'o i'mi to isi esmiza ci 'atutumzo ho aʉsvʉsvʉtʉ no meo'uzo.

⁹ ho isieno poa peihcʉ'ho no a'sʉftonʉ to hamo, isicu peelʉi i'tohungvi no 'auesiesi to'usnu tomo afu'u meot'ʉt'ʉcʉ to hamo ci cou.

¹⁰ isi epeaska to hamo te ieni to t'ʉcna to maicisito ho taisaisi.

engaho tomo yutasufku to e'e ci cou

¹¹ e'usna ta hi'hioa tan'e, mion'a man'i 'o nten'a peelʉi engha, at'inghi o'amo sonʉ hoci mi'usneni muu ho esansana, maica lan'a lua tmaononhʉngʉ na koyumu.

¹² mantemucu noana'o lema'cohio to cou, at'inghi ci mimuc'on'a ahoi ta i'hozisi ta e'e to hamo ho noa pa'cohivi. leamuc'on'a nun'u, o'amocu te ov'ohʉ no naveu.

¹³ na moc'on'a afu'u nun'u zoun'a acʉhʉ foinana, o'amocu mo bohngʉ no ʉmnʉ ho kuzo.

¹⁴ hoci i'eivheni ho yainca, i'omicu yʉepʉngi ci cou na tec'u ov'ohʉ no naveu. micu yaa atngaso ci ohola sucaefiza, meelʉ bohngʉ nomo ʉmnʉ ho kuzo.