hevulu 3 - buacou seiso no faeva esvʉtʉ

mo tosa'ohe to moose 'o iesu

¹ noa epeiya ho eyoho'a to hamo ci sinto maananghia, ntemu ta'to'tohʉngva 'o iesu; 'aeno 'o ito ehohonga ta singkooto ci soskuskunu ho taisaisi.

² la meot'ʉcʉ tomo eyoho'ʉ ho poa yaahioai ci hamo, mais'a 'o moose ho meot'ʉcʉ no yaahioai to emoo to hamo.

³ 'o psoevohngʉ tola eemo ci cou mo tosa'ohe to isi teyai ci emoo. totiski, 'o isi elʉa to iesu ci psoevohngʉ mo na'nohe man'i to moose.

⁴ 'emo macoconi ci emoo isic'o acʉha teyai ta cou, at'inghi isi teyai to hamo 'e aʉcʉcʉhʉ.

⁵ 'o moose mo yonto emoo to hamo ho meot'ʉcʉ ci soskuskunu, tesi 'akasi na tasila e'e to hamo ho tac'ula noana'o.

⁶ at'inghi, 'o kilisto mo boemi ta ongko nosi oko ho meot'ʉcʉ ho aʉt'ʉca 'e emoo to hamo. hocito tʉyʉca 'e ito taa'uzva ci mingeovi ho 'ʉteʉ, 'acueno 'oahngʉ to cono emoo to hamo.

amiocni ta 'o'oko to hamo

⁷ ko'koeno, aʉlʉ mais'a 'o isi yainca to seilei: maitan'e, hocimu tac'ʉhi 'o fihngau to hamo,

⁸ o'atemu yameomʉ, mais'a ne noana'o ho yutasufku to hamo, totiski ho mosola yone maepuepuhu ho hʉsvʉta 'o hamo.

⁹ yainca to hamo: tamo tomsʉptʉha, 'o nia maameoimu ohela e'vono aiti 'o nia peipeis'ausna'u, ohec'o yonto ic'o ho hʉsvʉta a'o, ta'seiseita a'o.

¹⁰ ko'koeno, mo'ula mi'usnu to cou ne mio ho sʉ'no; o'u yainca: mihin'i acʉhʉ 'oha meot'ʉcʉ, maezo yutasufku ta mashʉyʉ'u.

¹¹ mi'o yono sʉ'no ho esvʉtʉ: 'auesiesi o'a tehin'i tma'upu to te'o pafeni ci soanono!

¹² maanat'ohaesa'u, temula bumemealʉ, ta taicomu tees'ala yaa kokuzo ci 'tohʉngʉ, o'te mimho tmaa'uzo, pef'uhu to 'auesiesi yaansou ci hamo.

¹³ at'inghi, nomio no o'te poa pa'hi'povneni no kuisi 'e cou ta taicomu ho kʉhtosʉ na 'tohʉngʉ, temula ieni ho panon'a isi yainca , huhucmasi yupa poucufnu.

¹⁴ hocito peelʉi amamahtʉica na nia ahoi singkoo, o'te avaevoezuhu, 'amitocueno toehungu yaahioai 'o kilisto.

¹⁵ mo maica 'o e'e to seiso: maitan'e, hoci imucu tac'ʉhi 'o fihngau to hamo, o'atemu yameomʉ, totiski ne noana'o ho yutasufku to hamo.

¹⁶ siyanamoso tmac'ʉhʉ to hamo hon'a yutasufku? o'as'aeno 'o ohsi e'eafi ne 'ezivuto to moose ci yatatiskova?

¹⁷ to tomsʉptʉha ne mio, moso mi'usnu no siya ho sʉ'no 'o hamo? o'as'aeno 'o moso peiskuisi, e'puyu mcoi ne maepuepuhu ci yatatiskova?

¹⁸ ne moso esvʉtʉ 'o hamo ho yainca: , na eni mio mi'usnu no siya ho esvʉtʉ? 'amos'aeno mi'usnu tomo yutasufku ci yatatiskova?

¹⁹ maicac'o ci hia baito, ho o'amo meelʉ tma'upu no soanono mo i'mi homo o'te tmaa'uzo.