hevulu 2 - buacou seiso no faeva esvʉtʉ

taunona'vʉ ci to'usnu

¹ i'mi tan'e, teto asansana asuhca noyʉci 'e ohto afu'a talʉi ci so'emio, tes'a noa meaapapayo'ʉ.

² 'o ohe psoecʉ'ha a'to to tensi ci e'e isicu husansana homo acʉhʉ yaa a'a'ausna, acʉcʉhʉ 'omo o'te mee'ofeihni ta e'e tan'e ci cou micu acʉhʉ tiou nontehe tiova ci patvovei.

³ homoeno maica, hocito peaezoni 'emo maica ci taunona'vʉ ci to'usnu, teenana meelʉ pkaako no patvovei? 'o nooe'oca isi ahoza iachia psoevaha 'e to'usnu eni; ohe yaeza mi'usneni a'to ho soomei to moso tmac'ʉhʉ ci cou.

⁴ conosi ne mio, 'o hamo isi titheni to iachisi tonʉ, huunona'vʉ ci hi'hioa, ho i'o mav'ov'o ci po'e ho topuhngi 'o 'akasihe. isi yaeza ieni to iachisi 'tohʉngʉ, aangaezeni a'to 'o mengumi to seilei.

ptuceoneni no to'usnu 'e yatatiskova

⁵ 'o tasi teyai to hamo ci hpʉhpʉngʉ, 'ai'oeno 'o lato yainca ci hpʉhpʉngʉ ic'o, ma'i isi faeni to tensi ho poa aʉt'ʉcneni.

⁶ apuyu, aʉlʉ mais'a 'omo coni ci isi engha to seiso: hamo, zou cuma 'e cou. cilako conino taaecingia; zou cuma 'e yatatiskova. lako conino aʉt'ʉt'ʉca.

⁷ osko akameosa poahe cʉecʉ to tensi; miko boemi to psoevohngʉ, so'einu ho teyaineni tafange;

⁸ osko poa aʉt'ʉcneni 'e aʉcʉcʉhʉ. yainca tan'e, 'o hamo isi poa , isi husansana na eni isi pai'upi 'e acʉcʉhʉ. at'inghi, maitan'e ma'i ito aiti hoci aʉt'ʉca ta cou 'e aʉcʉcʉhʉ.

⁹ ito apuya aiti 'o iesu, isi akameosa siyahe to mo cʉecʉhe to tensi, te ko'ko peelʉi ieni to mengumi to hamo ho nomio ta yatatiskova ho mcoi. maitan'e, ito aiti 'o iesu micu sucaefi to 'atutumzo to mcoi ho mayo to psoevohngʉ, so'einu ci tafange.

¹⁰ i'o moso mooyai ho asusuce ta acʉcʉhʉ ci hamo isi poa sucaefi to 'atutumzo 'o iesu, meelʉcu noemʉhʉ, tesi akoeva no poa meelʉ toehungu tma'upu no psoevohngʉsi na 'o'okosi; mo 'aseolʉ ho isi yaica to hamo. maica 'o iesu 'aeno anana'o papoevʉ no hafa 'e cou ho yʉmeʉmʉ no to'usnu.

¹¹ isi toʉlʉi 'e kuisi ta cou; te toehungu 'o mohcu cofkoya ci cou ho tma'usnu tomo cihi ci amo. ko'koeno, o'aisi h'oinveni to iesu hoci ta'upa no conoemoo.

¹² isi yainca: hamo, te'o mi'usnu to maanat'ohaesa'u ho psoecocoya 'e ongkosu; te'o yonta tuhcu tamo botngonʉ ci cou ho tohmomoengʉ suu.

¹³ isi yaeza yainca: te'o tmae'ocʉ to hamo; i'vaha yainca: aiti, 'o hamo ho a'o 'o ihe afu'a pafeni a'o ci 'o'oko mo acʉhʉ yontan'e!

¹⁴ 'e 'o'oko eni ho mioeno acʉhʉ yaa hmuyu ho feango ci cou, 'o feango to iesu mio maezo totiski ho yaa yu'ausna ta cou. maicac'o, i'mi to mcoisi, tesi peelʉi aapayo'a 'omo tiʉt'ʉcʉ no mcoi ci 'akuma,

¹⁵ a'vinano psoevoyunga 'o moso maica smoyo no mcoi ho apaezumo yono tolei ci cou.

¹⁶ na'na husansana, o'a isis'a to'usni 'o tensi, maisi to'usnihe 'o mʉntʉ'ca to 'avulahamu.

¹⁷ ko'koeno, te ahtuo'te yonta mo mav'ov'o ho totiski ta maanat'ohaesasi, yonto tuhcu to hamo ho ma'cocacni ho tae'oci ci saisi, te ko'ko peelʉi peteongasa 'e kuisi ta cou.

¹⁸ maica isi iachia sucaefiza 'emo 'atutumzo ci hʉsvʉta, tiou no tikuzkuzoa ci 'atutumzo; maitan'e tesicu peelʉi to'usni 'omo noa hʉsvʉta ci cou.