hevulu 13 - buacou seiso no faeva esvʉtʉ

mainenu te meelʉ noa ʉmnʉa to hamo

¹ temula asngʉcʉ yaa 'tohʉngʉ no himngonghi no 'oahngʉ.

² la aʉt'ʉt'ʉca ho poa yonto emoomu 'ola i'mocvihi ci cou. panto mosola maica ci cou, 'oc'ocic'o aʉt'ʉcʉ to tensi.

³ la talʉa 'ola noekotu ci cou, mais'a mimu maezo noekotu. la talʉa 'ola yonto 'atutumzo ci cou, mais'a mimu maezo yono 'atutumzo.

⁴ 'e macicihi la huecvʉhʉa 'e natʉ'ca no navconga; la asansano ma'ʉ'ʉmtʉ yu'tat'ʉcʉ 'e navconga. tesi yʉsvʉta to hamo 'ola 'aʉnpʉnpʉ ho smoc'ou ci cou.

⁵ 'otela ma'konvosʉ no yupasʉ, la ma'mamso ta acʉcʉhʉto. maica ohsila yainca to hamo: <'auesiesi o'ate'o ahta ngozi suu, 'auesiesi o'ate'o ahta ciha suu.>

⁶ homo maica. 'antetocueno meelʉ e'ʉ'ʉteʉ mainca: la to'usnu a'o 'o nooe'oca, o'ate'o smoyo; tehe peelʉi yainenu ta cou?

⁷ temula taaecingia 'o mosola eahahafo muu, psoecingha muu 'o e'e to hamo ci cou, ta'voveiya mosola mainenu na niala h'oyusovahe. mainenu na hia mcoi; la yoyayaeza na nia singkoohe.

⁸ 'o iesu kilisto, ne hucma, maitan'e, 'auesiesi, moc'o totiski.

⁹ teav'a poa e'ep'epveni tola mav'ov'o ci eʉsvʉsvʉtʉ. nte noe'ocʉ to mengumi to hamo, ho poa yutataso na 'tohʉngʉmu. 'ote noe'ocʉ to 'ofiha no 'oanʉ; i'ola noe'ocʉ tomo maica ci 'ofiha ma'imo elʉ no koa ʉmnʉ.

¹⁰ i'omo no'ayumonʉ to socofkoya tohesa ci saisi to yutaya o'ate yaa tonʉ no bonʉ to sʉ'ta to 'oyona sʉ'tʉ.

¹¹ 'o taisaisi to yutaya la hafa yʉmeʉmʉ to socofkoyana 'o hmuyu to snoecavʉ, ta'upa no sʉ'ta no toakuisi ho sʉ'teni; 'o feango to snoecavʉ la hafa uhto yafana ho hmoi.

¹² ko'koeno, 'o iesu mo maezo mcoi to yafana to hosa, akoeva no titheni to hmuyusi ho tocofkoyai 'e kuisi ta cou.

¹³ homo maica, 'antetoeno maezo uhta yafana ta hosa ho i'ima 'o iesu, e'paevazi 'o isi tiova ci aokoe'i.

¹⁴ ta ceoa, uk'aci 'auesiesi ci hosato; mamito biebiemi to tena 'auesiesi hosa ho noana'o.

¹⁵ nteto ieni to iesu, asngʉcʉ boemi no tohmomoengʉ ho meesi, sʉ'teni to hamo, 'aeno boemi ta sumsuto ho ebobohngʉ to ongkosi.

¹⁶ teav'as'ala ta'payo'a na peis'ʉ'ʉmnʉ ho to'usnu no mocmo ci cou, maica 'ai'emoeno maica ci sʉ'ta 'e isi ʉm'ʉmnʉa to hamo.

¹⁷ la meo'uzo tola eahahafo muu ci cou, talʉi 'o lahe e'e. lahe asngʉcva so'eʉt'ʉca na piepiyamu, maica ho noana'o tenahela mi'usneni to hamo ho epa'teni. hocimu talʉi 'ate ahtuo'te peiskakaebʉ yaahioai, hoci o'te maica, te suhcʉhcʉ na 'tohʉngʉhe, hoci maica cumanantesi koa ʉmnʉ muu?

¹⁸ teav'asola tosveni 'inolineni a'mi. imza iachia taa'uzva mo tʉs'ʉ ho ʉmnʉ 'e koyumza, smoekakaebʉ mino mo emio ci ceonʉ.

¹⁹ te'o afnaso m'ene muu ho 'inolineni a'o, eoho'neni to hamo te'o ko'ko meelʉ aupcio yuovei ta lamu yoni.

'inoli

^20-21 'o hamo isicu poa i'mi to mcoi ho smoevovei 'o nooe'ocato ci iesu. isi ieni tomo mohtoesuyu ci hmuyu to iesu ho to'hongi 'o 'auesiesi ci esvʉta, poa meelʉ meoino le'aʉt'ʉcʉ moatʉ'nʉ. i'ola mofi no soanono ci hamo tesi'sola poa yono lamu hioa cimo mav'ov'o ci peis'ʉ'ʉmnʉ ho poa a'sʉftonʉ muu, poa meelʉ peis'ofeihni no 'tohʉngʉsi, tesi'sola ieni to iesu kilisto yonta feangoto ho aepʉnga na lasi 'aveoveoneni ci hi'hioa! no'unu'sio to kilisto na psoevohngʉ, ac'ʉhʉ ho noana'o! 'aamen.

pahtaveiya ci e'e

²² maanat'ohaesa'u, temu'so uveica tiova 'e e'e no'u poucufnu; o'aos'o nama poa tacvoh'i 'e hia tmopsʉ ta tengami.

²³ te'o poa cohivneni muu, 'e ohaesato ci temote micu yuyafo to poo'usna. hoci mon'i esmi, tetacu meelʉ fiho a'o ho baito muu.

²⁴ mi'usnu tola eahafo muu ho ito afu'u sinto ho tuayokeo. i'omo i'mi ne 'italia ci sinto mi'usnu muu ho tuayokeo.

²⁵ tesi'sola fii no mengumi to hamo 'e mimu macicihi!