hevulu 12 - buacou seiso no faeva esvʉtʉ

amoto ci hamo

¹ ho mitoeno yaa maica botngonʉ cimo 'akasi ci cou, mais'a 'o cmʉcmʉ ho nokuyungu a'to, mantetocu yupsʉpsa 'emo afu'u tmamʉtʉ ho koa paepop'ʉcʉ a'to ci kuisi, tomamahtʉicʉ ho smai'usnu ta ito mi'usni ci ceonʉ.

² teto michʉmʉ to iesu, maica 'aeno iesu 'omo moteongfongfo ho moteoepʉngʉ ta singkooto. o'amo boevovei to tuhcu to zuuzika; apuyu, nomio tomo mooteo ci 'aveoveoyʉsi, o'aisi maka cumasa na aokoe'iya homo mcoi to zuuzika. maitan'e micu yusuhngu to vhona to suoca'ha to hamo.

³ ta'to'tohʉngva na ohsi sucaefiza. isi yainenu na hia uveica ho ihe sʉ'nova tamo yaa kuisi ci cou! ko'koeno o'atemu ma'papayo'ʉ ho suhcʉhcʉ na 'to'tohʉngʉ.

⁴ ho mimu ehtothomʉ no kokuzo, o'amocu mo teehcʉ'ho no yuhmuyu.

⁵ imun'asi ta'payo'a 'o hamo mio mainenu na lasi hia mais'a eucufnu no oko ho eucufna muu? isi yainca: oko'u, la butataayaezoi 'o lasi hia mahsʉsʉftʉ to nooe'oca, 'ote i'mi ho lasi koica ho ma'papayo'ʉ;

⁶ maica lasi pahsʉsʉfti 'o isi afu'a ngohia ci macicihi ci cou, eplikva 'o isi tiova ci macicihi ci 'o'oko.

⁷ temula buveici hola pahsʉsʉfti, maica ho mimu tiou no pahsʉsʉfti 'amoeno totiski no isi ta'okoa to hamo na muu. panolaeno o'te noa pahsʉsʉfti no amo ci oko?

⁸ hocimu o'te mais'a 'o mocmo ci oko ho tiou no pahsʉsʉfti, o'ana a'ʉmtʉ oko, zoucu pee'ʉe'ʉha.

⁹ mi'usnu ta amo ta feango, lato tiou no pahsʉsʉfti, lean'a a'cʉ'cʉna einva. namaeno hote mi'usnu to amo no piepiya, o'a tetos'aeno afnaso meo'uzo ho akoyu no m'elʉ no nsou?

¹⁰ 'o amo ta feango la maino iachi 'tohʉngʉ ho akameosa pahsʉsʉfti a'to; at'inghi, 'o mahsʉsʉftʉ to hamo la nomio note koa ʉmnʉ a'to, akoevano poa tma'upu no socofkoyasi a'to.

¹¹ holato tiou no pahsʉsʉfti, la auc'oc'ou 'oha kaebʉ; at'inghi to ataveisi, i'omosola tiou no pahsʉsʉfti ho sucaefi no ngoseo ci cou te meelʉ beahci no soanono, hocu yunsou no mousngʉcʉ ci h'oyunsova.

po'pa'cohivi ho cucufni

¹² i'mi tan'e, temula hoepzeni namo uk'a tonʉ ci emucu, hoʉsʉzneni namo bismo'ʉe'ʉyʉ ci t'ango!

¹³ la asngʉcʉ mitomo sʉngcʉ ci ceonʉ, poa o'te aosu'u kuzo 'e micu toci'ci'o ci t'ango, apuyu i'momhomʉ yaa tonʉa.

¹⁴ la asno'zonʉ nananghinghia to cou, mino mo socofkoya ci h'oyunsova; hoci uk'a socofkoya ci h'oyunsova uk'ana ci cou cite teolʉ to nooe'oca.

¹⁵ la bumemealʉ, tees'a yaa payo'ʉ no mengumi to hamo. la bumemealʉ, tees'a yaa mais'a mahiz'o ci cacʉfea, holac'u yʉepʉngi, cu koakuzo tamo botngonʉ.

¹⁶ la bumemealʉ, tees'a yaa smoc'ou ci cou, hocieno mais'a 'o 'isau ho 'oha einu, nomio no moc'o aseou ci 'oanʉ ho phieni 'o ongko nosi pehoza.

¹⁷ 'o ataveisi imu cohivi, moso mici noa tooyokeoi to amosi, at'inghi mo noa hopsʉpseni; e'vono mongsi ho mici noa eovei, at'inghi 'anaisi peelʉi aezuha 'o ohsicu hioa ci hi'hioa.

¹⁸ ma'i mimucu ahtu ohcʉ'ho to isicu peelʉi peuasa ci hcuyusiinai, mais'a 'o ohecula sʉc'ʉhi to 'isolaelu; to ic'o panto yafeu, mokvo'ʉ, voecʉvcʉ, ho tucvihi.

¹⁹ panto fihngau no la'pa ho fihngau no ya'ei. ne ihe talʉi to yatatiskova 'e fihngau eni, cu m'eya o'tena ivaho tmalʉ no mocmo ci e'e;

²⁰ maica ho 'atehe pasvo'ha 'o isi pashʉya, yainca:

²¹ ko'sosmoyoa 'o mi'ausnasi, malʉ ho tesieno'so yainca to moose:

²² at'inghi, mimu esmi ta hcuyu sii'an, 'amoeno esmi ta hosa to 'auesiesi yaansou ci hamo, zou 'elusalemu ne pepe. mo yaa posibotngonʉ ci tensi.

²³ mimu esmi ta 'oyona yu'eteuyunu 'aveoveoyʉ to pehoza ci 'o'oko to hamo, 'o ongko tamo maica ci mapepehoza isicu acʉha tposi ne pepe. mimu esmi ta tuhcu tola yʉsvʉtʉ ta yatatiskova ci hamo, esmi to micu a'sʉftonʉ ehcʉ'ho to moulʉlʉ ci piepiya.

²⁴ mimu esmi ta tuhcu ta coutaico ta faeva 'oesvʉtʉ ci iesu, 'aeno esmi to isi sahuneni ci hmuyu; 'e isi epa'teni ta hmuyu tan'e mo yonghuhe to hmuyu to yaapo.

²⁵ homo maica, temula bumemealʉ, 'ote bʉʉpsʉpsʉ tomo mi'usnu muu ho aomotʉ'ʉ. i'o moso bʉʉpsʉpsʉ to socofkoya ci e'e ne ohon'a psoevaha ta ceoa ci cou, ho o'amosoeno meelʉ momeesih'i no kuisi, namaeno hocito bʉʉpsʉpsʉ tomo i'mi ta pepe ho aomotʉ'ʉ, tec'u asuhcu o'tena meelʉ momeesih'i no kuisi!

²⁶ ne mio, 'o mʉmʉsi isi taot'ova 'e ceoa, at'inghi maitan'e isi teomneni:

²⁷ 'e ci e'e isi husansana ho isi yainca tena noa taot'ova 'e ohola teyai ci macucuma, noa soezuha, tenaeno peelʉi poa nongaco 'o o'aisi taot'ova.

²⁸ ko'koeno, teto nomio to o'ate taot'ova ci hpʉhpʉngʉ ho to'aveoveoyʉ. teto fiho no isi ta'ʉ'ʉmnʉa to hamo, boemi no einu ci 'tohʉngʉ ho fifiho to hamo,

²⁹ maica'sio 'o hamoto zou o'te afsi ci puzu.