hevulu 11 - buacou seiso no faeva esvʉtʉ

e'usnu no tmaa'uzo

¹ homoeno maica, zou cuma na isi yainca singkoo? 'e singkoo la mi'usnu to isi afu'a mingeovi ci hi'hioa ho tʉyʉca, mi'usnu to o'amocu isi teolʉi ci hi'hioa ho ma'sansano.

² 'o nia cou ne noana'o ho isi ko'ko ʉm'ʉmnʉa to hamo 'amoeno i'mi homo tmaa'uzo to hamo.

³ i'mi no singkoo, ito cohivi 'e mouhpʉhpʉngʉ isi ieni to e'e to hamo ho teoepʉngi; maicac'o, 'o isi teolʉi mo i'mi to o'aisi teolʉi ho teyai.

⁴ i'mi no singkoo, 'o yaapo mo sʉ'tʉ tomo asuhcuhe ʉmnʉ to sʉ'ta to kai'in ho sʉ'teni to hamo. isi ieni no singkoo, noa emomoengʉa to hamo, hocu noa yainca coumoulʉlʉ, maica ho isi iachia tiova to hamo 'o teonghiasi. moso e'vono mcoi, mioc'o asngʉcʉ boemi ta singkoo tan'e ho aomotʉ'ʉ.

⁵ i'mi no singkoo, meelʉ o'te mcoi 'o 'ino. isi taspepza ho uhto isi yoni to hamo, o'ana ohe elʉa to cou, maica ho isi tiova to hamo. yainca to seiso, ne o'amocuisi taspepza ohsicu ʉm'ʉmnʉa to hamo.

⁶ hoci uk'a singkoo 'e cou o'ate meelʉ noa ʉm'ʉmnʉa to hamo. namo afu'u uhto tuhcu to hamo ci cou ahtao'te taa'uzva ho mio yayo 'o hamo, a'vinano taa'uzva ho tasi evei 'omo biebimi ci cou.

⁷ i'mi no singkoo, 'o noa mo yono o'amocu isi aiti ci hi'hioa ho taa'uzva 'o engaho to hamo, mooyai to conci 'apangʉ, to'usni 'o iachisi ho i'o conosi emoo. maicac'o, ohsi topci no kuisi 'o nia hpʉhpʉngʉ ne mio, mo maezo iachi i'mi to hamo ho tiou nomo i'mi no singkoo ci moulʉlʉ.

⁸ i'mi no singkoo, 'o 'avulahamu moso meo'uzo ho isi eyoho'a to hamo, uhto isi teomneni to hamo ho pafeni ci hpʉhpʉngʉ. ne moso mongoi to anana'osi hpʉhpʉngʉ, o'a mocu isi cohivi tee uhnenu.

⁹ ieni no singkoo, mo nohi'u amiocni to isi teomneni to hamo ci hpʉhpʉngʉ, totiski to ohsi yaeza teomneni to hamo to 'isaku ho ito yakovu ho yonto teova.

¹⁰ maica 'o 'avulahamu mo mingeou to isi teyai to hamo, ho mahtʉicʉ 'o totngucasi ci hosa.

¹¹ i'mi no singkoo, e'vono o'ate mahmahafo 'o saala, maezocu nocaefi no yaaokoa, taa'uzva 'o hamo tesi ayʉca 'o ohsi teomneni.

¹² e'vono mais'a micu mcoi 'o 'avulahamu, i'mi tamo cihi ci isi pecngicngiha ci mʉntʉ'casi mo mais'a 'e congeoha ta pepe ho i'o efuefu'u ta aaskiti ta etʉpʉ 'o hia botngonʉ.

¹³ 'emo maica ci cou mo ac'ʉhʉ no mcoi ho yaa singkoo. uk'a mocu ci ihe tiova to isi teomneni to hamo; at'inghi mo i'mocvihi ho aiti, 'aveoveoyʉ 'e 'tohʉngʉ, a'vinano ta'sansana homo yonta hpʉhpʉngʉ moc'o covnʉ ho lenohi'u ci cou.

¹⁴ 'emo mo'engho tamo maica ci e'e ci cou. husansana homon'a iachi biebimi nomo conci emoo.

¹⁵ o'aihe nama taaecingia na ohecu ngozi ci hpʉhpʉngʉ. hoci o'te maica, tenan'a yaa hiesi no yuovei.

¹⁶ i'o ihe tongsoya zou 'omo yone pepe cimo asuhcu yonghu ci emoo; ko'koeno, 'o hamo o'aisi h'oinveni ho lahe yainca hamo, maica ho isicu ayocneni no tehe yoni ci conci hosa.

¹⁷ i'mi no singkoo, 'o 'avulahamu ne ohsi hʉsvʉta to hamo, isi sʉ'teni 'o okosi ci 'isaku ho teyai sʉ'ta. 'o 'avulahamu la tiou to isi teomneni to hamo ci cou, at'inghi isi soekaebeni 'o pecniasi ci okosi ho sʉ'teni to hamo.

¹⁸ ohsila mi'usni to hamo ho yainca:

¹⁹ isi ta'unano tesi peelʉi poa i'mi no mcoi ho smoevovei to hamo 'o 'isaku. a'ʉmtʉsi. teto yaeza peelʉi yainca, 'o 'avulahamu moso a'ʉmtʉ i'mi to mcoi ho e'vovei 'o 'isaku.

²⁰ i'mi no singkoo, 'o 'isaku moso nomio no tenala hioa ho noana'o ho tooyokeoi 'o yakovu ho 'isau.

²¹ i'mi no singkoo, ne tesicu yʉepʉnga to yakovu 'o nsousi isi tooyokeoi 'omo yoso ci 'o'oko to yosefu; mo bohso'fʉ ho m'ohkuyu to hamo.

²² i'mi no singkoo, ne tesicu yʉepʉnga to yosefu 'o nsousi isi engha ho tenala mongoi ne 'ezivuto 'o suezopʉ to 'isolaelu, a'vinano eutotaveiya na te hia emuf'o to feangosi.

²³ i'mi no singkoo, ne mohcu yayo 'o moose, ihe aiti to maameoisi homo mʉʉlʉlʉ 'e oko, tuyu no feohʉ ne ohe efʉnga; o'aihe smoyoa 'o mashʉyʉ to honte.

²⁴ i'mi no singkoo, ne mohcu yʉepʉngi 'o moose, mo bʉʉpsʉpsʉ hoci yainca zou oko to oko no mamespingi to honte ne 'ezivuto.

²⁵ mo kaebʉhe no'upu to 'o'oko to hamo ho 'atutumzo, o'a mo kaebʉ hoci no'ayumonʉ no kuisi ho tma'upu no akameosʉ ci kokaekaebʉ.

²⁶ ho isi aiti, homo nomio to misaiya ho tiou no akuzkuzoa mo pepehe to acʉcʉhʉ ci yupasʉ to 'ezivuto, maica ho isi mingeovi 'o tena tohnoneni ho noana'o.

²⁷ i'mi no singkoo, mo mongoi ne 'ezivuto 'o moose, o'amo smoyo no sʉ'nova to honte; maica homo mais'a isi teolʉi 'o o'aisi teolʉi ta mcoo ci hamo, apaezumo buveici, o'amo mimho yuovei.

²⁸ i'mi no singkoo. isi p'eyac'a 'o meem'esa'o. a'vinano eutotaveiya ho sahua to phingi 'o hmuyu. poa o'te opcozneni tote suapayo'ʉ ci tensi 'o pehoza ci oko to 'isolaelu.

²⁹ i'mi no singkoo, meelʉ supihi to fʉhngoyaetʉpʉ 'o cou'isolaelu, mais'amo mino mo keolo ci ceoa; mo mici aothomʉ 'o cou'ezivuto, isicu epʉna to chumu.

³⁰ i'mi no singkoo, mo miptuhi ne ihe ta'kukuyungva to cou'isolaelu 'o hosa ne 'eliko, ataveisi micu oefʉ'ʉ ho toczoyʉ 'o tonghifa to hosa.

³¹ i'mi no singkoo, 'o noasisi ci laaho o'aisi pot'upa to o'amo meot'ʉcʉ to hamo ci cou, maica ho isi aʉt'ʉt'ʉca 'o supai.

³² te'on'a 'aoka esuhca? 'anate'o tiv'ov'oha yaeza engha 'o ciiten, pala, samuson, iefuta, tavite, samu'elu, ho i'o niala hi'hioa to mayoyongensa.

³³ ohela ieni no singkoo, atpʉta 'o hpʉhpʉngʉ to aukukuyunguhe. ohela hioa na moʉhmʉskʉ, tiou no ohsi teomneni to hamo. ohela sngʉsnga na ngayo no sisi,

³⁴ mot'afso no yafeu, noesih'i no opcoza no poyave. poa aezuhu yumahtʉicʉ na yoz'uhe, mou'ʉteʉ homo ehtothomʉ, atpʉta 'o heetai to mocmo ci hpʉhpʉngʉ.

³⁵ ieni no singkoo, panto piyo ci maamespingi ihe tiova 'omo i'mi to mcoi ho smoevovei ci 'oahngʉ. panto mo bʉʉpsʉpsʉ no poesih'a. kaebʉhe mcoi no tikuzkuzoa, akoyu no mayo note asuhcu yonghu ho faeva ci nsou.

³⁶ panto la buveici no keematmohi, ti'usna; panto lahe seo'eisi to cou, noa poekotva.

³⁷ panton'a isi mamcozi to fatu, noa s'eftunga to noko, noa himcoza to poyave. pantola mʉfeʉ'sʉ to feo'u no moam'um'u ho toetoekameosʉ, buveici no aviovio, pohtutumza, tikuzkuzoa.

³⁸ o'aihe ta'mimiveia 'e hpʉhpʉngʉ! la mais'a uk'a 'oyona ci cou hoc'o mimimiyo ta yʉn'ʉ ho mafufuengu, yonto mafeofeongo ho amzocni.

³⁹ 'o singkoo tamo maica ci cou mo acʉhʉ yaa taunona'vʉ ci ehohamva; at'inghi o'amocu ihe toc'ʉha na ohsi teomneni to hamo,

⁴⁰ maica 'o hamo tesin'a teyaineni note asuhcu yonghu ci ceonʉ a'to. na 'tohʉngʉsi zou: tehin'i asansano to'upu a'to niante meelʉ sʉc'ʉhʉ no a'sʉftonʉ.