hevulu 10 - buacou seiso no faeva esvʉtʉ

¹ 'e hoolicu o'amocus'a h'aucucunu ho mi'ausna ta a'ʉmtʉsi, mac'on'a ongko ta tenala esmi cimo yonghu ho ʉmnʉ ci hi'hioa. 'omo totiski ci sʉ'ta la totovaha o'te tosveni sʉ'teni, 'e hoolicu nte mainenu hocisi ieni tamo maica ci sʉ'ta ho poa sʉc'ʉhʉ no a'sʉftonʉ 'emo uhto tuhcu to hamo ci cou?

² 'o kuisi tomo m'ohkuyu to hamo ci cou hoci a'ʉmtʉ elʉ no cofkoya, 'anate i'vaho ma'unano mo yaa kuisia, acʉcʉhʉ 'e sʉ'tʉ ci hi'hioa 'atec'ueno peelʉi tosveni.

³ a'ʉmtʉsi. hola totovaho sʉ'tʉ lac'o at'ingha poa talʉaneni na iachihe kuisi ta cou.

⁴ maica 'e hmuyu ta hahocngʉ ci 'uachumu ho moatʉ'nʉ acʉhʉ o'atesi ahta peelʉi aapayo'a na kuisi ta cou.

⁵ ko'koeno, nete uhta hpʉhpʉngʉ 'o kilisto, mo mi'usnu to hamo ho mainca: o'ateko tiova 'e sʉ'ta ho i'e teonghia; oskocu ayocneni ta feango a'o.

⁶ o'aosko ʉmnʉa 'emo yonta paesitohva ci meehmoi, yaeza o'aosko ʉmnʉa 'e meepoptoengaso kuisi.

⁷ os'ocu yainca: hamo. mi'ocu cmʉ'ho, akoeva no pee'ofeihni 'o 'tohʉngʉsu, aʉlʉ mais'a to isi tposi to hoolicu cimo e'u'usnu a'o ci hi'hioa.

⁸ isi ahoza yainca: 'e sʉ'ta eni e'vono fiho to hoolicu ho sʉ'teni, mioc'on'a maica 'e e'esi.

⁹ isi ecnguha yainca: ko'koeno, isicu acʉha aapayo'a to hamo 'o nia afu'u auyu sʉ'tʉ, akoeva no peʉezi to mcoi to kilisto.

¹⁰ isicu pee'ofeihni to iesu kilisto 'o 'tohʉngʉ to hamo, sʉ'teni 'o iachisi feango, peisnʉski hocu aepʉnga, poa cofkoya a'to ho tmaovei to nooe'oca.

¹¹ 'o saisi to yutaya la huhucmasi yac'ʉ ho fifiho to hamo, siho sʉ'teni 'omo totiski ci sʉ'ta; at'inghi 'emo maica ci sʉ'ta 'auesiesi o'atesi ahta peelʉi toononvi 'e kuisi ta cou.

¹² at'inghi. 'o kilisto isic'o i'nʉska sʉ'teni 'emo 'auesiesi yaa a'a'ausna ci meepoptoengaso kuisi. ataveisi micu yusuhngu to vhona to hamo.

¹³ yonto ic'o ho totea 'o hamo ho tasicu psatpʉti ho poa peteozu 'o hangʉ.

¹⁴ 'o i'nʉskʉsi mcoi, 'omo cofkoya ho ma'hi'usnu to nooe'oca ci cou poa meelʉ 'auesiesi a'sʉftonʉ.

¹⁵ mosola maezo mi'usnu a'to 'o seilei ho 'akasi. isi ahoza yainca:

¹⁶ isi yainca to nooe'oca: to hie no ataveisi, temia yupa m'eac'ʉ tamo maica ci esvʉta: te'o siya ta 'tohʉngʉhe 'e hoolicu'u, tposi ta 'ayumona ta fnguuhe.

¹⁷ isi ecnguha yainca: <'anate'o i'vaha talʉa 'o kuisi ho peis'epohe.>

¹⁸ ko'koeno, ho isieno peteongasa 'emo maica ci kuisi, 'anate 'ahʉyʉ i'vaho titho no sʉ'ta no peteongaso kuisi.

poa ohcum'u to hamo na a'to

¹⁹ maicacu, maanat'ohaesa, ito ieni to mcoi to kilisto meelʉ o'te ma'sasmoyo ho yʉmeʉmʉ to socofkoyana.

²⁰ isi ptuceoneni tamo mehacni cimo faeva ci ceonʉ, mehacni cimo yupaezumo to tohesa, 'aeno yupaezumo to feangosi cimo yaansou ci ceonʉ.

²¹ homitoeno yaa taunona'vʉ ci saisi ho tʉʉt'ʉca 'o emoo to hamo,

²² 'antetoeno boemi no mou'ʉmtʉ ci 'tohʉngʉ ho mahtʉicʉ ci singkoo, boemi to isicu poa cofkoya, uk'a heo'tʉ ci 'tohʉngʉ, ho i'o ohcu toʉlʉi to chumu ci feango, ho ohcum'u to hamo.

²³ teto poa mahtʉicʉ o'te aezuhu ho noyʉyʉci 'e ito ebobohnga ci ta'usni, maica 'o isi teomneni to hamo te peelʉi noe'oci.

²⁴ teto yupa ma'tat'ʉcʉ, poecʉ'o no himngonghi, poucufnu no popeislʉlʉ.

²⁵ 'otes'a maezo tola at'ocʉ o'tena i'upu yu'eteuyunu ci cou, tela yupa poucufnu; ho isieno cohivi tec'u mon'i cmʉ'ho na hiesi to nooe'oca, ntemu asuhcu maica.

²⁶ hocitocu bohngʉ to so'emio hon'a a'cʉ'cʉnʉ emozu peiskuisi, 'anate ahtun'a i'vaho yaa peteongaso no kuisi ci sʉ'ta.

²⁷ tetocuc'o ma'eopeophi ho mooteo no yʉsvʉta ho ino te paesipapayo'ʉ tola mihangʉ to hamo ci yafeu!

²⁸ i'ola yuszozʉ to hoolicu to moose, hoci mako yoso hocieno tuyu ci cou nate 'akasi no peis'eposi, te ahtao'te opcoza, o'ate ake'an'a coveoza.

²⁹ homoeno maica, mi'usnu tola potfʉngʉ to oko to hamo, hukoacumai 'o hmuyu to esvʉta to hamo - 'ai'oeno 'omo poa cofkoya to kuisisi ci hmuyu, a'vinano aokoe'iya 'o piepiya no mengumi, teeno yainenu 'emo maica ci cou? ta'to'tohʉngva. o'ates'aeno anana'o tiou note so'ecvʉha ci patvovei?

³⁰ ito cohivi siya na mosola mainca: ; i'vaha yainca:

³¹ hoci tma'toho no emucu to 'auesiesi hamo a'ʉmtʉs'a ko'sosmoyoa!

³² la talʉa na nia hie ne auyusi. ne ohsicula pahtiskovi to hamo na muu, mohmu elʉ tomo man'i ci 'atutumzo, at'inghi ma'i mimu ahtu yonta ehtothomʉ ho noa atpʉta.

³³ leamu aasvʉtʉ yono lahe apa'ta aokoe'iya ho tikuzkuzoa; leamu aasvʉtʉ bi'upu tomo 'atutumzo ci cou.

³⁴ lamu i'upu 'atutumzo tola poekotva ci cou. cono holahe ti'einga 'o acʉcʉhʉ ci macucumamu, temuc'o uveica tiova; maica ho imu cohivi, panton'a imu songacva cimo afnaso ʉmnʉ ho noana'ohe ci ezoezoyʉ.

³⁵ ko'koeno, teav'as'a payo'a na 'ʉteʉmu; 'e 'ʉteʉ eni tasi hafneni nomo someoisa ci hʉpeʉeza.

³⁶ nomio no peiseafi na 'tohʉngʉ to hamo ho tiou no ohsila teomneni, temu asansano buveici.

³⁷ maica isi yainca to seiso: o'ate aomane, i'otena esmi tec'u cmʉ'ho, o'ate noononhʉngʉ.

³⁸ 'e coumoʉlʉlʉ'u te i'mi no tmaa'uzo ho elʉ no nsou. at'inghi, hoci panonte smase'u ci cou, o'ana te'o ʉmnʉa.

³⁹ o'amitos'a smase'u ho suhcʉhcʉ ci cou; mito yaa singkoo a'vinano elʉ no to'usni ci cou.