hevulu 1 - buacou seiso no faeva esvʉtʉ

ieni to okosi 'o hamo ho aomotʉ'ʉ

¹ ne noana'o, 'o hamo la siho boemi tomo mav'ov'o ci ti'a'ausna, ieni to eyongensa ho mi'usnu to nia maameoito ho aomotʉ'ʉ;

² at'inghi to puesona ta hie, isi ieni to okosi ho mi'usnu a'to ho aomotʉ'ʉ. 'e oko eni, 'o hamo ohsila ieni ho teyai 'e mouhpʉhpʉngʉ, a'vinano epeiya ho poa tiuskeni 'e aʉcʉcʉhʉ.

³ isi psoevoveiya 'o tiskova to hamo, yaeza a'sʉftona psoe'ongka 'o atuhcusi feango to hamo; isi yomza to meoino tonʉ ci e'esi ho e'oca 'e aʉcʉcʉhʉ. ataveisi ne ohsicu ateop'ʉca 'e kuisi ta cou, cu yusuhngu to vhona tomo soyaatonʉa ne pepe.

mo noepehe to tensi 'e oko

⁴ 'e isi yac'i ta oko tan'e mo na'nohe noepe to tensi, aʉlʉ maito isi pafeni to hamo ci ongko mo na'na pepehe to ongko to tensi.

⁵ 'o hamo uk'amocu ci ohsila ahta mi'usni cimo cihi ci tensi ho yainca: zou oko'u suu; maitan'e teko amo a'o. maezo uk'a ci ohsila ahta pas'osi ci mocmo ci tensi ho yainca: tesi amo a'o; te'o oko na taini.

⁶ ne tesi popeoskuna to hamo 'o pehozaisi ho poa uhta hpʉhpʉngʉ, i'vaha yainca: na afu'u tensi to hamo te asansano acʉhʉ m'ohkuyu ta oko'u.

⁷ e'usna to tensi, isi yainca: 'o hamo isi poa tmupoepe 'o tensi, poa tmupuzu 'o soskuskunusi.

⁸ e'usna to oko, namaisi yainca: hamo, 'o suoca'hasu te 'auesiesi nongaco! teko boemi no moʉhmʉskʉ ho aʉt'ʉcʉ.

⁹ lako ʉmnʉa na moulʉlʉ, himsʉ'no no 'oha moulʉlʉ; i'mi tan'e 'o hamo - 'o hamosu isicu epeiya ho p'eyac'a suu; 'o isi pafeni suu ci kokaekaebʉ mo na'nohe tosa'o to isi pafeni to 'oahngʉsu.

¹⁰ isi i'vaha yainca: nooe'oca, to ahoisi ohsucu teyai 'e ceoa; osko i'vaha yomza to emucusu ho teyai 'e engʉca.

¹¹ tena acʉhʉ aapayo'ʉ 'e engʉca ho ceoa, na suu teko no'auesiesi; 'e engʉca ho ceoa te mais'a 'e yʉsʉ te noana'o ho aekieki.

¹² teko taipupsu'ha 'e engʉca ho ceoa, mais'a peʉezi na noana'o ci yʉsʉ, miko ahoi to ahoisi 'auesiesi o'te aezuhu.

¹³ o'amocu mosola ahtu mi'usnu nomo cihi ci tensi 'o hamo ho yainca: teko yusuhngu ta vhona'u, totea ho ta'ucu acʉha poa peteozu ta caphʉsu 'o hangʉ.

¹⁴ ma cumaeno na tensi? malac'o acʉhʉ fifiho to hamo ci piepiya; lasi popeoskuna to hamo ho to'usni 'ote tiou no to'usnu ci cou.