fuilimong 1 - buacou seiso no faeva esvʉtʉ

¹ zou poolo a'o; mi'o nomzo to kilisto iesu ho noa poekotva. temia iepoepohʉ 'e ohaesa ci temote tmopsʉ ta tengami ho faeni suu - sonanghia ci 'oahngʉ fuilimong.

² ho itola yonto emoosu ho yu'eteuyunu ci kiokai, yaeza fii 'o nat'ohaesa ne 'afuiya ho i'o momza noteuyunu heetai ci 'acipu.

³ pafeni'sio muu to amohamo ho ito nooe'oca iesu kilisto na mengumi, soanono!

himngonghi ho singkoo to fuilimong

⁴ nat'ohaesa ci filimong, cono hola'u 'inoli la'u ahtao'te e'upa suu, nomio suu ho asngʉcʉ 'aveoveoyʉ to hamo'u;

⁵ maica os'o tac'ʉhi na lako hia angongohia 'o masisinto, yaa singkooa ho lako mi'usnu to nooe'oca iesu.

⁶ la'u m'ene to hamo peelʉi ieni to cono taucunu ci totiski singkoo, asuhca amsʉ'eona ta'hongi na afu'u ʉmnʉsi ho mito yuecnguhu to kilisto.

⁷ songohia ci nat'ohaesa, 'o himngonghisu a'ʉmta fii no meoisi ci kaebʉ ho poucufna a'o; 'o afu'u sinto maezo i'mi suu ho ma'kakaebʉ.

p'enzeni 'o 'anisimo

⁸ ho zoueno nat'ohaesasu to 'ayumona to kilisto na a'o, nte'o anana'va peelʉi smeesosoni eucufna suu ho hioa 'o nteko hioa ci hi'hioa;

⁹ at'inghi, isi cucufni no himngonghi a'o ho m'ene suu. na a'o - poolo, e'vono zou soskuskunu to kilisto iesu, maitan'e os'o yaeza nomzi ho noekotu, te'oc'o ma'kaebʉ no maica ci hioa.

¹⁰ 'e te'o mi'usneni suu ho p'enia zou nomio to 'anisimo ho noa 'tohʉngʉ. zou oko'u to 'ayumona to kilisto; ne mo'u yonto poo'usna ohsi ta'amoa to piepiyasi a'o.

¹¹ to auyusi uk'a ci nia koasi ʉmnʉ suu, maitan'e ta suu hocieno a'o mo na'no yaa koa ʉmnʉa.

¹² maitan'e te'o popeovoveiya ta lako yoni, mo mais'a hoci'u pa'i'upa 'e 'tohʉngʉ'u.

¹³ o'u yainca no 'tohʉngʉ'u 'ucia sohcia, ho mi'on'a seolʉa no nomio to fukuin ho noekotu poa meʉe no nteko hia aʉt'ʉcʉ a'o;

¹⁴ at'inghi, os'o tata'za hoci i'mi no ma'kaebʉsu, o'a mo i'mi no meumzomzo. hociko o'te teomneni, uk'a ci te'o 'ucia hioa.

¹⁵ homo akameosʉ mongoi suu 'o 'anisimo, nenusino te ko'ko poa 'auesiesi no'upu suu.

¹⁶ maitan'e, o'anas'a cihi ci tolei, ma micu na'nohe nosa'o no tolei; maica ho zoucu songohia ci nat'ohaesa to 'ayumona to kilisto. hoci e'usna a'o, mio asansano maica, namaeno hoci e'usna suu! maica ho mimu yaa naskuna ci natʉ'ca, maezo nat'ohaesa to 'ayumona to nooe'oca.

¹⁷ ko'koeno. hociko ta'usna no nayʉca ci nanghia a'o. teko'so tiova ho poa yuovei. mais'a no osko tiova a'o.

¹⁸ hoci moso peismi no o'aosko ʉmnʉa ci hi'hioa, hocieno pano isi yuevaha ci cumasu, 'atekoeno acʉha ta'usna a'o.

¹⁹ te'o yontan'e ho aʉla iachia tposi: na a'o - poolo, te'o sviei ho peʉezi. (o'ana te'o nama aʉtʉs'a suu, i'o osoko yuevaha a'o ma i'o iachisu nsou!)

²⁰ ko'koeno, ohaeva, nomio to nooe'oca, teko'so teomneni 'e os'o p'enza suu, ko'ko ma'eʉpngʉ co la'u ecvʉhneni ta 'tohʉngʉ'u! zou acʉhʉ nat'ohaesa to 'ayumona to kilisto na a'to.

²¹ os'o taa'uzva teko ahtao'te talʉi a'o, 'aeno ko'ko os'o tposi 'e tengami eni. na a'ʉmtʉsi, os'o cohivi, na teko hi'hioa 'ate ahtuo'te nosa'ohe ta os'o p'enza.

²² conosi tan'e, takon'a ayocneni no ta'ula yoni; os'o tata'za hocisi yut'inga to hamo na 'inolimu, poa yuovei ta lamu yoni a'o.

sotavei ci tuayokeo

²³ 'emo nomio to kilisto iesu ho po'upa a'o ta poo'usna ci 'ipafu te tuayokeo suu.

²⁴ 'e la'u toehungneni yaahioa ci maluko, 'alitaku, lusuto, luka maezo mi'usnu muu ho tuayokeo.

²⁵ pafeni'sio muu to nooe'oca iesu kilisto na mengumisi!