'epeso 6 - buacou seiso no faeva esvʉtʉ

natʉ'ca ta 'o'oko ho maameoi

¹ 'e 'o'oko la tmaolalʉ to maameoi; te anana'va hioa ta kilistoto na eni.

^2-3 na eni mo ahoi mahafo no isi teomneni ci h'oesvʉta.

⁴ 'e amohe, teav'ala asʉsʉ'nova 'o 'o'oko, la boemi to mo'ma'cohio to nooe'oca ho seooyokeoi.

natʉ'ca no tauke ho soskuskunu

⁵ 'e soskuskunu, temu ma'eopeophi, conci 'tohʉngʉ ho meot'ʉt'ʉcʉ no taukemu, totiski ho la fifiho to kilisto;

⁶ o'ate anouc'o ho lahe aiti nate maica, mais'a moc'o euteozu ho noa so'eʉ'ʉmnʉa, la mais'a soskuskunu to kilisto, la i'mi no 'tohʉngʉ ho meot'ʉcʉ no 'tohʉngʉ to hamo.

⁷ temula smoekaebʉ ho pnanfi nante anana'va hioa no soskuskunu, mais'a mo fifiho to nooe'oca, o'a mo fifiho ta cou.

⁸ la cohivi, 'upena na soskuskunu hocieno ziu ci cou, tasi acʉha ieni no ʉmnʉ ci peipeis'ausna ho eveia to hamo.

⁹ 'e mimu tauke, temu aʉlʉlʉa na soskuskunumu, teav'ala paosmoyoi, la cohivi. na muu ho i'e soskuskunumu mo totiski yaa cihi ci tauke ne pepe; tesi boemi nomo totiski ci svʉta ho mi'usni 'e macicihi.

pafeni to hamo ci noemʉhʉ ci soanothʉ

¹⁰ atavei, temula noe'ocʉ to meoino tonʉ to nooe'oca ho yutataso ci cou.

¹¹ temula paceofa 'o isi faeni to hamo ci yʉsʉno heetai, temu ko'ko meelʉ bʉʉlʉlʉ, poengomʉ no koknuyu no 'akuma.

¹² maica o'amito mi'usnu tamo yaa hmuyu ho yaa feango ci cou, mito mi'usnu to h'aokuv'o ta mouhpʉhpʉngʉ, 'o teto mi'usni 'ai'olaeno aʉt'ʉcʉ, tʉʉt'ʉcʉ ta voecʉvcʉ ci hpʉhpʉngʉ, ho ito tonʉ no kokuzo ta hpʉhpʉngʉ.

¹³ i'mi tan'e, temula boemi to isi faeni to hamo ci soanothʉ ho seu'heni 'e iachi, ko'ko meelʉ yono sokoeva ci hie ho poengomʉ no lahe hia suyumo no hangʉ, teespaezumo ho noyʉyʉci 'e hupato.

¹⁴ ko'koeno, temula ae'ayocʉ. boemi no so'emio ho teyai snoeputa, boemi no moulʉlʉ ho teyai tooftonga t'oenga.

¹⁵ boemi no auhuhucu psoyaski no suseomʉ ci fukuin ho teyai sapiei.

¹⁶ la asngʉcva pʉta 'e pihci no singkoo, temueno ko'ko peelʉi tomʉti 'o lahe pnaeni to kokuzo ci mo yaa puzu ci tʉ'sʉ.

¹⁷ temu boemi no mengumi ho teyai ceopngu, boemi no e'e to hamo ho teyai pafeni to seilei ci poyave.

¹⁸ temu yono 'inoli ho m'eya to'usni to hamo, asngʉcʉ fiho no lasi hia eahahafo to seilei ho 'inoli. la aa'pucu aʉtʉs'ʉ, teav'a peaezoni; la o'te tosveni 'inolineni 'o sinto.

¹⁹ temula yaeza 'inolineni a'o, p'enzeni to hamo note'o suseolʉ ci e'e, ho ta'u eseolʉ aomotʉ'ʉ, meelʉ 'ʉteʉ ho paavi 'e ngayo'u epeaska 'e moumsʉ'eonʉ ta fukuin.

²⁰ mi'o e'vono mahafo ta ekʉka, mi'o nomio ta fukuin ho afnaso ci soskuskunu. temu 'inoli to nooe'oca ho pafi no 'ʉteʉ a'o ho engha na nte'o anana'va engha ci e'e.

tuayokeo ho tooyokeo

²¹ 'o tuiciku tasi acʉcʉha eʉsvʉta muu na hi'hioa'u. poa cohivneni muu 'e a'a'ausna'u, na taini lamza ngohia, a'vinano la meot'ʉt'ʉcʉ ho fifiho to nooe'oca ci nat'ohaesa.

²² na atuhcusi ho os'o popeoskuna ho poa uhta lamu yoni. te'o akoeva no poa cohivneni muu na a'a'ausnamza tan'e, poa mayo no poucufnu muu.

²³ tesi'sola faeni ta acʉcʉhʉ ci sinto to amohamo ho ito nooe'oca iesu kilisto na soanono, himngonghi, ho singkoo.

²⁴ tesi'sola fii no mengumi to hamo 'ola ma'hʉhʉyʉ himngonghi to nooe'oca iesu kilisto ci cou!