'epeso 5 - buacou seiso no faeva esvʉtʉ

yunsou no 'ayumona no tiskova

¹ ho zoueno isi ngohia to hamo ci 'o'okosi na muu, temula asansano momaemaezo to hamo.

² nalamu h'oyunsova la aa'pucva peiseafo no himngonghi, aʉlʉ 'o kilisto ho isi ngohia a'to, nomio a'to ho ciha 'o nsousi, mooyai namusngau ci sʉ'ta ho sʉ'teni to hamo.

³ i'ocu 'ola smoc'ou, ca'i, ho i'ola ma'konvosʉ ci hi'hioa. teav'as'a maka pateafa ta taicomu, maica zou'so 'o'oko to hamo na muu.

⁴ maezo o'atemula mo'engho nomo epak'i, eloʉngʉ, hocieno ca'i ci e'e; la conino mo'engho no 'aveoveoyʉ to hamo ci e'e.

⁵ o'ate ta'pepecvaza, i'ola smoc'ou, ca'i, ho i'ola ma'konvosʉ ci cou (ma'konvosʉ mo totiski no m'ohkuyu to uacoua) o'ate ahtu meelʉ tma'upu no 'o'oko to hpʉhpʉngʉ to hamo ho ito kilisto.

⁶ 'ote noa peknui to lac'o e'ankʉ ci cou. 'amoeno aʉlʉ i'mi tamo maica ci hi'hioa; te cmʉ'ho to feango tola yutasufku ci cou na sʉ'no to hamo.

⁷ ko'koeno, 'ote nouteuyunu tamo maica ci cou.

⁸ mohmula anana'o yonto mo voecʉvcʉ, at'inghi ahoi ne mohmucu sinto to nooe'oca, mimucu yonto 'ayumona to tiskova. 'elamu h'oyunsova la asansano mais'a yatatiskova.

⁹ 'e tiskova la beahci tomo at'otngaso, 'aeno mou'ʉmnʉ. moulʉlʉ, ho so'emio.

¹⁰ la husansana zou cuma na lasi ʉm'ʉmnʉa to nooe'oca ci hi'hioa.

¹¹ teav'a hioa 'o lahe hioa tomo noovoecʉvcʉ ho uk'a koa ʉmnʉ ci hi'hioa, la apuya eafa 'emo maica ci hi'hioa.

¹² i'olahe aasoeza hioa to voecʉvcʉ, hoci yue'engha teec'o acʉha h'oinveni!

¹³ 'e acʉcʉhʉ ci hi'hioa hocic'u afu'a epopayoa, tenac'u yuyafo 'o a'ʉmtʉsi,

¹⁴ maica 'ote poa epopayo 'aeno tiskova. ko'ko isi yainca to pasunaenva: peihsasmomecu, 'emimu oengʉtʉ ci cou, i'mi ta taico ta mcoi ho yʉc'ʉ! tesi pahtiskovi to kilisto na muu.

¹⁵ ko'koeno, la bumemealʉ na lamu peipeis'ausna. 'ote mais'a nongonongo ci cou, la mais'a 'ola moutʉs'ʉ ci cou.

¹⁶ la tiʉlʉlʉa 'emo macoconi ci 'oc'ocic'o, maica mo na'no kuzo ho sokoeva 'e hie maitan'e.

¹⁷ i'mi tan'e, 'otela moma'payo'ʉ ci cou, la cohivi zou cuma na 'tohʉngʉ to nooe'oca.

¹⁸ 'ote voemi, malasi poa peispapayo'ʉ 'e cou; la noa nongcʉngci to seilei.

¹⁹ boemi no pasunaenva, tohmomoengʉ, topiepiya ho yupa yut'ingi; la i'mi no 'tohʉngʉ ho muni, tohmomoengʉ to nooe'oca, mi'usnu ho pasunaeno.

²⁰ la epici to ongko to nooe'oca iesu kilisto ho mi'usnu to hamo ho 'aveoveoneni 'e mav'ov'o ci hi'hioa.

natʉ'ca ta navconga

²¹ temula yupa meo'uzo, maica lamu'so einu to kilisto.

²² 'e mamespingi, la meo'uzo to hahocngʉ, mais'a hola meo'uzo to nooe'oca.

²³ maica zou fnguu ta mamespingi 'e hahocngʉ, aʉlʉ mais'a 'o kilisto zou fnguu ta kiokai, maezo leto'usnu ta kiokai.

²⁴ mais'a 'e kiokai la meo'uzo to kilisto, 'e mamespingi nte maezo aa'pucu meo'uzo to hahocngʉ.

²⁵ 'e hahocngʉ, temu ngohia 'e mamespingi, mais'a 'o kilisto ho lasi ngohia 'e kiokai, totiski ho isi nomzi 'e kiokai ho ciha 'o nsousi.

²⁶ ho isi yaica isi ieni to e'esi, boemi to chumu ho poa cofkoya 'e kiokai,

²⁷ poa yonghu, socofkoya, uk'a heo'tʉ, uk'a ci ake'i ca'i ho aetuhu, ko'ko peelʉi sʉ'teni ta iachi.

²⁸ 'e hahocngʉ nte anana'va ngohia 'e vcongʉ, totiski hola ngohia 'e iachi feango; ho isi ngohia 'e vcongʉ 'a isieno ngohia 'e iachi.

²⁹ uk'a cite himsʉ'no no iachi feango; lasi conino angongohia ho aʉt'ʉca, aʉlʉ totiski to kilisto ho lasi aʉt'ʉca 'e kiokai;

³⁰ maica zou maesoesou to feangosi a'to.

³¹ isi yainca to seiso:

³² 'e seiso eni isi paavi 'e meoino moumsʉ'eonʉ; mai'e yupa natʉ'ca ta kilisto ho kiokai 'e os'o engha,

³³ at'inghi tee peelʉi titheni ta feangomu; la asansana ngohia ta hahocngʉ 'e mamespingi, totiski hola ngohia 'e iachi. 'e mamespingi te asansana einva 'e hahocngʉ.