Zozye 9 - Labib An Kreol Seselwa

Bann Gabaonit I Anbet Zozye

¹ Ler zot ti aprann sa, tou bann lerwa ki ti reste dan rezyon Les avek larivyer Zourden, dan rezyon montanny, dan rezyon laplenn, dan kote lanmer Mediterane, ziska Liban: Hitit, Amonit, Kananeen, Perizit, Hivit ek Zebizit

² ti rasanble e met zot dakor pour konbat Zozye ek pep Izrael.

³ Me bann zabitan Gabaon ti'n osi aprann ki mannyer Zozye ti'n tret lavil Zeriko ek Ai.

⁴ Alor, zot ti servi en riz pour tronp li: Zot ti degiz zot avek bann sak ize, ki zot ti met lo zot bann bourik, bann vye sak diven desire e pyeste.

⁵ Zot ti'n met bann vye sandal pyeste dan zot lipye ek bann vye lenz lo zot. Zot ti annan provizyon dipen rasi e an myet.

⁶ Zot ti al war Zozye dan kan Gilgal. Zot ti dir li ensi ki bann Izraelit, “Nou sorti dan en pei lwen. Aprezan, fer en lalyans avek nou.”

⁷ Me bann Izraelit ti reponn sa bann Hivit, “Petet zot reste parmi nou. Dan sa ka, ki mannyer nou kapab fer en lalyans avek zot?”

⁸ Zot ti dir Zozye, “Nou ou bann serviter.” Zozye ti demann zot, “Lekel zot? Kote zot sorti?”

⁹ Zot ti dir li, “Nou ou bann serviter, nou sorti dan en pei tre lwen. Akoz non SENYER, zot Bondye, ki nou'n antann koz lo li ek tou sa ki i'n fer Lezip,

¹⁰ tou sa ki i'n fer sa de lerwa Amorit Sihonn lerwa Hesbonn e Og lerwa Basann, ki ti reste Astarot, dan Les larivyer Zourden.

¹¹ Nou bann ansyen e tou zabitan nou pei ti dir nou: Pran bann provizyon pour larout; al rankontre zot e dir zot: Nou zot serviter. Aprezan, fer en lalyans avek nou.

¹² Get nou dipen! Nou provizyon ti ankor so ler nou ti sorti dan lakour pour nou vwayaze, pour nou vin rankontre zot. Gete! Aprezan zot in rasi e zot an myet!

¹³ Sa bann sak diven ki nou ti'n ranpli ti ankor nef; la zot in desire! Nou lenz ek nou sandal in ize telman semen ti long.”

¹⁴ Bann Izraelit ti aksepte zot provizyon san konsilte SENYER.

¹⁵ Zozye ti fer lape e fer en trete avek zot konmkwa i pou gard zot vivan. Bann responsab lakominote ti pret serman.

Izrael I Dekouver Trik Gabaon

¹⁶ Trwa zour plitar, apre ki zot ti'n fini siny lalyans avek zot, bann Izraelit ti aprann ki sa bann dimoun ti zot vwazen e ti pe reste parmi zot.

¹⁷ Alor, bann Izraelit ti met zot anrout e trwa zour apre, zot ti ariv dan bann lavil sa bann zans: Gabaon, Kefira, Beerot e Kiryat-Yearim.

¹⁸ Me bann Izraelit pa ti touy zot, akoz bann responsab lakominote ti'n fer serman lo non SENYER, Bondye Izrael. Me tou bann Izraelit ti mirmire kont zot bann sef.

¹⁹ Tou bann sef ti dir avek lakominote, “Nou'n fer en serman solannel devan SENYER, Bondye Izrael; aprezan, nou pa kapab tous zot.

²⁰ La mannyer nou pou tret zot: Akoz serman ki nou'n fer, nou ava les zot viv, pour pa atir lakoler Bondye lo nou.”

²¹ Bann responsab ti dir, “Les zot viv.” Alor, zot ti al koup dibwa e sarye delo pour lakominote antye, parey bann responsab ti'n dir.

²² Alor, Zozye ti apel zot. I ti dir zot, “Akoz zot in tronp nou dizan ki zot reste lwen avek nou, alor ki zot reste parmi nou?

²³ Dezormen, zot in ganny modi; serten parmi zot pou reste touzour lesklav. Zot ava al koup dibwa e sarye delo pour tanp mon Bondye.”

²⁴ Zot ti reponn Zozye, “Nou ti'n aprann ki SENYER, ou Bondye in ordonn son serviter Moiz pour donn zot tou sa pei e ki zot pou touy tou bann zabitan sa pei. Nou ti per zot. Se pour sa rezon ki nou ti azir dan sa fason.

²⁵ Aprezan, nou dan ou lanmen. Fer sa ki ou oule avek nou; tret nou mannyer i ava fer ou plezir.”

²⁶ La ki mannyer zot ti ganny trete: Zozye ti delivre zot dan lanmen bann Izraelit ki pa ti touy.

²⁷ I ti fer zot al koup dibwa e sarye delo pour lakominote e pour lotel SENYER, landrwa kot SENYER ava swazir, menm ziska ozordi.