Zozye 7 - Labib An Kreol Seselwa

Pese Akan

¹ Bann Izraelit ti komet en pese grav konsernan bann lobze ki SENYER ti'n defann pran: Akan, garson Karmi, garson Zabdi, garson Zera, ki sorti dan tribi Zida ti'n pran serten sa bann lobze ki ti devre ganny detri. Alor, SENYER ti ankoler kont pep Izrael.

² Depi Zeriko, Zozye ti anvoy detrwa zonm dan lavil Ai ki pros avek Bet-Aven, Les ek lavil Betel. I ti dir zot, “Monte, al espyonn sa pei.” Bann zonm ti al espyonn lavil Ai.

³ Ler zot ti retournen, zot ti dir Zozye, “Pa bezwen anvoy tou lepep atake. Anviron 2,000 a 3,000 zonm ava ase pour pran Ai. Pa fatig tou lepep, akoz napa bokou zabitan.”

⁴ Alor, anviron 3,000 zonm parmi lepep ti monte pour atake; me zot ti bezwen sove devan bann zonm Ai.

⁵ Bann zonm Ai ti touy anviron 36 Izraelit. Zot ti pourswiv zot depi laport lavil ziska Sebarim, e bat zot an desandan. Bann Izraelit ti perdi kouraz, zot leker ti fonn.

Lapriyer Zozye

⁶ Alor, Zozye, ensi ki bann ansyen dan Izrael, ti desir zot lenz, tonm lafas ater devan Kof Lalyans SENYER, ziska aswar. Zot ti zet lapousyer lo zot latet.

⁷ Zozye ti dir, “Senyer BONDYE, akoz ou'n fer sa pep travers larivyer Zourden zis pour livre nou dan lanmen bann Amorit e detri nou? Nou ti'n devre reste lot kote larivyer Zourden!

⁸ Pardon SENYER, me ki mon kapab dir, la ki Izrael in vir ledo e sove devan son bann lennmi!

⁹ Bann Kananeen ek tou bann zabitan pei, ler zot pou antann sa ki'n arive, pou anserkle nou, detri nou e detri nou non dan sa pei. Ki mannyer ou pou fer rekonnet ou gran renonmen?”

¹⁰ SENYER ti dir Zozye, “Leve! Akoz ou'n tonm lafas ater?

¹¹ Izrael in fer pese; zot in kas mon lalyans ki mon ti'n fer avek zot. Zot in pran serten lobze ki ti devre ganny detri; zot in vole e kasyet sa bann lobze vole parmi zot bann posesyon.

¹² Pour sa rezon, Izrael pou nepli kapab fer fas avek son bann lennmi. Zot pou taye devan zot lennmi, akoz zot osi, zot pou ganny detri! Mon pou nepli avek zot, si zot pa fer disparet parmi zot, sa bann lobze ki ti devre ganny detri.

¹³ Leve aprezan! Konsakre lepep! Dir zot: Pirifye zot pour demen, akoz la sa ki SENYER, Bondye Izrael i deklare: Izrael! I annan parmi zot, bann byen ki mon ti'n donn lord pour detri. Zot pa pou kapab fer fas avek zot bann lennmi osi lontan ki zot pa fer disparet parmi zot, sa bann lobze ki mon'n donn lord pour detri.

¹⁴ Demen bomaten, zot ava prezant zot devan mwan, tribi par tribi. Sa tribi ki SENYER ava swazir, ava prezant li, klan par klan. Sa klan ki SENYER ava swazir ava prezant li fanmir par fanmir. Sa fanmir ki SENYER ava swazir, ava prezant li, zonm par zonm.

¹⁵ Sa enn ki ganny trouve an posesyon bann lobze vole, pou ganny brile, li, avek tou sa ki i posede. I pa'n montre respe pour lalyans SENYER, e i'n komet en fot terib dan Izrael.”

Koupab I Ganny Dekouver

¹⁶ Alor, lannmen granmaten, Zozye ti fer Izrael aprose tribi par tribi. Tribi Zida ki ti ganny swazir.

¹⁷ I ti fer tribi Zida aprose par klan, e klan Zera ti ganny swazir. I ti prezant klan Zera, zonm par zonm, e Zabdi ti ganny swazir.

¹⁸ I ti prezant son fanmir, zonm par zonm. Akan, garson Karmi e garson Zabdi sorti dan tribi Zida ti ganny swazir.

¹⁹ Alor Zozye ti dir Akan, “Mon garson! Rann glwar SENYER Bondye Izrael e rekonnet ou fot devan li. Dir mwan ki ou'n fer, pa kasyet nanryen avek mwan.”

²⁰ Akan ti reponn Zozye, “I vre! Mwan ki'n fer pese kont SENYER, Bondye Izrael. La sa ki mon ti fer:

²¹ Mon ti war parmi bann piyaz lager, en manto sorti Sinear, de kilo larzan ek en lengo lor ki ti pez en demi kilo, mon ti anvi; alor, mon'n pran. Mon'n anter dan mon latant; larzan i dan fon.”

²² Zozye ti anvoy bann mesaze ki ti tay kot latant. Tou ti la, kasyet dan latant, larzan dan fon.

²³ Zot ti pran tou sa ki ti dan latant e zot ti anmenn kot Zozye ek pep Izrael, e depoz tou devan SENYER.

²⁴ Zozye ek tou bann Izraelit, ti pran Akan, garson Zera, larzan, manto ek lengo lor. Zot ti osi pran son bann garson, son bann fiy, tou son bef, bourik, son kabri, son latant avek tou sa ki i ti posede. Alor, bann Izraelit ek Zozye ti anmenn tousala dan vale Akor.

²⁵ Zozye ti dir, “Akoz ou'n anmenn maler lo nou? La ozordi, SENYER in anmenn maler lo ou!” Izrael antye ti saboul li. Lepep ti bril zot e saboul zot avek ros.

²⁶ Zot ti met en gro ta ros lo li, ki ankor la ozordi. Alor, gran lakoler SENYER ti kalme. Pour sa rezon, sa vale i apel: Vale Akor ziska ozordi.