Zozye 24 - Labib An Kreol Seselwa

Zozye I Koz avek Pep Sikenm

¹ Zozye ti fer rasanble tou bann tribi pep Izrael dan Sikenm. I ti konvok tou bann ansyen dan Izrael, bann sef, bann ziz, ek bann responsab; zot ti vin prezant zot devan Bondye.

² Alor, Zozye ti dir lepep antye: La sa ki SENYER Bondye Izrael i deklare: Zot bann zanset, Tera, papa Abrahanm e papa Nahor, ti reste otrefwa lot kote larivyer, e zot ti ador bann bondye etranze.

³ Mon ti pran zot papa Abrahanm depi lot kote larivyer; mon ti kondwir li atraver pei Kanaan antye; mon ti ogmant son desandans e mon ti donn li Izaak.

⁴ Mon ti donn Izaak Zakob ek Ezai. Mon ti donn Ezai rezyon montanny Seir, me Zakob ek son bann zanfan ti desann Lezip. Apre, mon ti fer zot sorti.

⁵ Mon ti anvoy Moiz ek Aaron, e mon ti pini Lezip avek en kantite fleo; apre, mon ti fer zot sorti.

⁶ Mon'n fer zot bann zanset sorti Lezip, e zot ti ariv kot lanmer Rouz. Bann Ezipsyen ti pourswiv zot bann zanset ziska lanmer Rouz avek kales lager ek zot kavalye.

⁷ Kan zot ti kriy ver SENYER, i ti met fernwanr ant zot avek bann Ezipsyen; i ti fer lanmer kouver zot. Zot lizye ti war sa ki mon ti fer kont Lezip. Zot ti reste lontan dan dezer.

⁸ Alor, mon ti anmenn zot dan pei bann Amorit, ki ti pe reste dan Les larivyer Zourden; sa bann Amorit ti atak zot. Mon ti livre zot dan zot lanmen, e zot ti pran zot pei, e mon ti detri sa bann Amorit devan zot.

⁹ Balak, garson Sipor, lerwa Moab, ti leve pour atak Izrael. I ti anvoy apel Balaanm, garson Beor, pour modi zot.

¹⁰ Me mon pa ti ekout Balaanm; alafen, i ti pronons benediksyon lo zot e mon ti delivre zot dan son lanmen.

¹¹ Zot ti travers larivyer Zourden e zot ti ariv Zeriko. Bann zabitan Zeriko ti fer lager kont zot, ensi ki bann Amorit, bann Perizit, bann Kananeen, bann Hitit, bann Girgasit, bann Hivit, ek bann Zebizit. Mon ti livre zot tou dan zot lanmen.

¹² Mon ti anvoy mous zonn devan zot, ki ti fer zot fannen sa de lerwa Amorit; pa avek zot lepe, ni avek zot bann fles ki zot ti fer li.

¹³ Mon'n donn zot en pei kot zot pa'n fatige pour kiltive, bann lavil kot zot pe reste me ki zot pa'n konstri, bann plantasyon rezen avek bann pye zoliv ki zot pe manze, me ki zot pa'n plante.

Izrael I Swazir Senyer

¹⁴ Aprezan, annan respe pour SENYER, e servi li senserman e avek fidelite. Detri bann bondye ki zot zanset ti servi ler zot ti lot kote larivyer Efrat e Lezip; servi SENYER.

¹⁵ Si zot pa oule servi SENYER, swazir ozordi ki lekel ki zot oule servi: Swa bann bondye ki zot zanset ti adore lot kote larivyer Efrat, swa bann bondye pei bann Amorit kot zot pe reste. Mwan ek mon fanmir, nou pou servi SENYER.

¹⁶ Lepep ti reponn, “Zanmen nou pou abandonn SENYER, pour al servi lezot bondye.

¹⁷ SENYER, nou Bondye ki ti fer nou ek nou bann zanset sorti Lezip, sorti dan lesklavaz. Li ki'n fer tou sa bann gran mervey devan nou, ki'n protez nou tou dilon semen ki nou ti swiv, e parmi tou bann pep kot nou'n pase.

¹⁸ SENYER ki ti sas devan nou tou bann pep: Bann Amorit ki ti reste dan sa pei. Alor, nou osi, nou pou servi SENYER, akoz SENYER ki nou Bondye.”

¹⁹ Zozye ti dir lepep, “Zot pa pou kapab servi SENYER, akoz i en Bondye sen; en Bondye ki zalou avek pasyon; i pa pou pardonn zot, zot bann revolt e zot bann pese.

²⁰ Si zot abandonn SENYER pour al servi bann bondye etranze, i pou vire kont zot; i pou fer zot dimal e detri zot apre ki i'n fer zot dibyen.”

²¹ Lepep ti dir Zozye, “Non! Nou pou servi SENYER.”

²² Zozye ti dir lepep, “Zot temwen kont zot menm ki se zot ki'n swazir SENYER pou servi li.” Zot ti reponn, “Wi, nou temwen.”

²³ I ti dir, “Aprezan, alor, detri bann bondye etranze ki parmi zot, e tourn zot leker ver SENYER, Bondye Izrael.”

²⁴ Lepep ti dir Zozye, “SENYER ki nou Bondye ki nou pou servi; nou pou ekout son lavwa.”

Zozye I Fer En Lalyans pour Lepep

²⁵ Alor sa zour, dan lavil Sikenm, Zozye ti fer en lalyans lo non lepep. I ti donn zot bann lalwa ek bann regleman.

²⁶ Zozye ti ekri sa bann parol dan liv lalwa Bondye. I ti pran en gro ros ki i met debout anba pye dibwa ki ti kot sanktyer SENYER.

²⁷ Zozye ti dir lepep antye, “Sa ros ava en temwen kont nou, akoz in antann tou bann parol ki SENYER ti partaz avek nou; i pou vin en temwen kont zot, dan ka ki zot trai zot Bondye.”

²⁸ Apre, Zozye ti fer lepep retourn kot zot, sakenn dan son teritwar.

Lanmor Zozye

²⁹ Apre sa bann levennman, Zozye, garson Noun, serviter SENYER ti mor. I ti annan 110 an.

³⁰ I ti ganny antere Timnat-Sera, dan teritwar ki ti form son par patrimwann, ki sitye dan rezyon montanny Efraim, Nor avek montanny Gaas.

³¹ Izrael ti servi SENYER tou dilon lavi Zozye, e tou dilon lavi bann ansyen ki ti reste vivan apre Zozye e ki ti konn tou bann mervey ki SENYER ti'n fer an faver Izrael.

³² Lezo Zozef ki pep Izrael ti'n anmenn avek zot depi Lezip, ti ganny antere Sikenm, dan sa morso later ki Zakob ti'n aste avek bann desandan Amor, fondater lavil Sikenm, pour 100 pyes larzan; sa later ti'n vin patrimwann bann desandan Zozef.

³³ Eleazar, garson Aaron ti mor; i ti ganny antere Gibea, dan lavil ki son garson Fineas ti'n resevwar e ki sitye dan rezyon montanny Efraim.