Zozye 23 - Labib An Kreol Seselwa

Dernyen Diskour ek Testaman Zozye

¹ Lontan apre, SENYER ti'n akord pep Izrael lape kont zot bann lennmi otour zot, Zozye ti'n vye; i ti'n ganny en bon laz.

² Alor, i ti konvok pep Izrael antye ek bann ansyen, son bann sef, son bann ziz, son bann sekreter. I ti dir zot: Mon'n vye, e mon'n ariv en bon laz.

³ Zot menm, zot in war tou sa ki SENYER, zot Bondye in fer avek tou sa bann nasyon akoz zot. SENYER, zot Bondye ki'n konbat pour zot.

⁴ Gete! Mon'n donn zot par tiraz osor koman par pour sak tribi, teritwar bann nasyon ki reste depi larivyer Zourden, ek tou bann nasyon ki mon'n detri ziska lanmer Mediterane, dan Was.

⁵ SENYER, zot Bondye pou sas lwen sa bann pep devan zot, e zot ava pran zot pei, parey SENYER, zot Bondye ti'n dir zot.

⁶ Met tou zefor pour obzerve e met an pratik tou sa ki'n ekri dan Liv Lalwa Moiz, san ekarte ni adrwat, ni agos.

⁷ Pa bezwen al melanz zot avek sa bann nasyon ki ankor reste obor zot. Zot pa pou servi non zot bann bondye e zot pa pou fer serman lo zot non; zot pa pou servi sa bann bondye, e zot pa pou prosternen devan zot.

⁸ Zot ava atas zot selman avek SENYER, zot Bondye parey zot in fer ziska ozordi.

⁹ Annefe, SENYER in sas bokou gran nasyon for devan zot, e ziska ozordi, personn pa'n kapab tenir debout kont zot.

¹⁰ En sel parmi zot ti fer taye mil, akoz se SENYER, zot Bondye ki ti pe konbat pour zot, parey i ti'n dir zot.

¹¹ Fer atansyon! Kontan SENYER, zot Bondye!

¹² Akoz si zot vir zot ledo kont li, si zot atas zot avek sa bann nasyon ki reste avek zot, si zot al fer lalyans maryaz avek zot, e si zot melanz avek zot,

¹³ zot ava war ki SENYER, zot Bondye, pa pou kontinyen sas sa bann nasyon devan zot. Zot ava vin en latrap, en pyez, en roten ki pou fwet zot lo zot ledo, e bann pikan dan zot lizye, ziska ki zot ava disparet lo sa bon later ki SENYER, zot Bondye in donn zot.

¹⁴ “Mwan, ozordi mon pe ale parey sor tou dimoun. Zot konnen, avek tou zot leker, avek tou zot et antye, ki okenn sa bann parol ki SENYER, zot Bondye ti prononse lo zot size pa'n reste san ganny akonpli; tou in realize lo zot; napa enn ki pa'n akonpli.

¹⁵ Parey tou bann bon parol ki SENYER, zot Bondye ti dir zot in realize lo zot, osi SENYER pou realiz lo zot, tou bann malediksyon, ziska ki i'n detri zot, e ki i'n fer zot disparet lo sa bon later ki SENYER, zot Bondye in donn zot.

¹⁶ Si zot pa respekte lalyans ki SENYER, zot Bondye ti fer pour zot, si zot al servi lezot bondye e al prostern devan zot, SENYER pou ankoler kont zot, e zot pou tre vit disparet dan sa bon pei ki i'n donn zot.”