Zozye 22 - Labib An Kreol Seselwa

Zozye I Anvoy bann Tribi Se Zot dan Les

¹ Alor, Zozye ti konvok tribi Riben, tribi Gad ek demi tribi Manase.

² I ti dir zot, “Zot in obei tou bann lord ki Moiz, serviter SENYER ti donn zot e zot in azir dan tou, parey mon ti ordonnen.

³ Pandan sa long letan ziska ozordi, zanmen zot in abandonn zot bann frer. Zot in byen obei bann lord SENYER, zot Bondye.

⁴ Ozordi, SENYER, zot Bondye in met zot bann konpatriyot dan sekirite, parey i ti'n promet zot. Aprezan, retourn dan zot latant, dan zot pei ki Moiz, serviter SENYER, in donn zot an partaz, dan Les avek larivyer Zourden.

⁵ Selman, fer sir zot obzerv tou bann komannman ek lalwa ki Moiz, serviter SENYER, zot Bondye in ordonn zot. Kontan SENYER, zot Bondye e fer tou sa ki i demann zot. Obei tou son bann komannman; atas avek li e servi li fidelman avek tou zot leker e avek lafors zot et antye.”

⁶ Apre, Zozye ti beni zot, e fer zot ale. Zot ti retourn se zot, dan zot latant.

⁷ Moiz ti'n donn demi tribi Manase en par dan Basann; me Zozye ti'n donn lot demi tribi, en par dan Was, lo lot kote larivyer Zourden, parey lezot tribi. Ler Zozye ti ranvoy zot dan zot latant e beni zot,

⁸ i ti dir zot, “Retourn dan zot latant avek bokou larises ek bokou troupo, avek larzan, lor, bronz, fer, ek bokou lenz. Partaz piyaz lager avek zot bann frer.”

Lotel obor Larivyer Zourden

⁹ Alor, bann Ribenit avek bann Gadit ensi ki demi tribi Manase ti retourn kot zot. Zot ti kit lezot Izraelit Silo, dan pei Kanaan, e zot ti al dan pei Galaad, rezyon ki zot ti'n resevwar koman zot par, parey SENYER ti'n ordonnen par lentermedyer Moiz.

¹⁰ Kan zot ti ariv dan rezyon pre avek larivyer Zourden, ki dan pei Kanaan, bann Ribenit, bann Gadit ek demi tribi Manase ti konstri en gran lotel obor larivyer.

¹¹ Bann Izraelit, ti aprann ki bann Ribenit, bann Gadit ek demi tribi Manase ti'n konstri lotel lo frontyer pei Kanaan dan rezyon pre avek larivyer Zourden, lo lot kote zot propriyete.

¹² Osito ki lezot Izraelit ti aprann sa nouvel, tou lakominote Izrael ti rasanble Silo pour al atak zot.

¹³ Alor, pep Izrael ti anvoy pret Fineas, garson Eleazar, kot bann Ribenit, bann Gadit ek demi tribi Manase, dan pei Galaad.

¹⁴ Dis responsab lepep ti akonpanny li, enn par sak tribi. Zot tou, zot ti bann sef fanmir dan bann klan Izrael.

¹⁵ Zot ti al dan pei bann Ribenit, bann Gadit, ek demi tribi Manase dan pei Galaad. La sa ki zot ti dir,

¹⁶ “La sa ki tou lakominote SENYER i dir: Ki sa traizon ki zot in komet kont Bondye Izrael? Zot in tourn ledo avek SENYER e zot in konstri en lotel ozordi? Ozordi, zot in revolte kont SENYER.

¹⁷ Eski fot Peor pa ase? Nou pa ankor ganny pirifye, malgre sa fleo ki'n tap lakominote SENYER?

¹⁸ La ozordi, zot in revolte kont SENYER! Si ozordi zot revolte kont SENYER, demen, son lakoler pou tonm lo lakominote Izrael antye.

¹⁹ Alor, si zot teritwar i enpir, travers dan pei ki propriyete SENYER, la kot sanktyer SENYER in ganny etabli, e vin propriyeter parmi nou. Me pa revolte kont SENYER, pa revolte kont nou osi, pour konstri en lot lotel akote lotel SENYER, nou Bondye.

²⁰ Ler Akan, garson Zera, ti komet en fot grav konsernan bann piyaz lager ki ti devre ganny detri, eski tou pep Izrael pa ti sibir lakoler SENYER? Pa zis li tousel ki ti mor pour son fot.”

Repons bann Tribi dan Les Zourden

²¹ Bann Ribenit, bann Gadit ek demi tribi Manase ti reponn bann sef fanmir dan Izrael,

²² “SENYER Bondye i pli gran ki tou bann bondye! Wi! SENYER Bondye i pli gran ki tou bann bondye! SENYER Bondye i konnen, e Izrael osi pou konnen. Si nou'n azir par rebelyon, oubyen pour komet en fot grave kont SENYER, pa les nou viv, ozordi!

²³ Si nou'n konstri en lotel pour nou detournen avek SENYER, oubyen si ti pour nou ofer bann sakrifis konplet, ek bann lofrann vezetal, oubyen pour ofer bann sakrifis lape, SENYER li menm ava demann nou kont.

²⁴ Non! Nou ti fer sa akoz nou ti trakase ki demen ou bann zanfan ava kapab dir avek nou bann zanfan: Ki relasyon zot annan avek SENYER, Bondye Izrael?

²⁵ SENYER in met larivyer Zourden koman en frontyer ant nou ek zot, bann Ribenit ek bann Gadit. Zot napa okenn par avek SENYER. Akoz zot zanfan, ki nou zanfan in aret annan respe anver SENYER.

²⁶ Alor, nou ti dir antre nou: Annou konmans konstri en lotel, pa pour ofer sakrifis konplet ek lezot sakrifis,

²⁷ me pour servi temwen ant nou ek zot, e ant nou bann desandan. Par sa, zot ava konnen ki nou osi, nou pe servi SENYER, par nou bann sakrifis konplet, lezot sakrifis, bann sakrifis lape. Konmsa, demen, zot bann zanfan pa pou dir avek nou bann zanfan ki zot napa okenn par avek SENYER.

²⁸ Alor, nou ti dir antre nou: Si zot dir sa avek nou, oubyen avek nou bann desandan, nou ava reponn: Get sa model lotel SENYER ki nou zanset ti konstri, pa pou ofer bann sakrifis konplet, ni pour lezot sakrifis, me pour ki i en temwen ant nou ek zot.

²⁹ Zanmen nou pou revolte kont SENYER. Pa ozordi ki nou pou detourn nou kont SENYER e konstri en lotel pour ofer bann sakrifis konplet, bann lofrann vezetal, ek lezot sakrifis, lo en lot lotel ki lotel SENYER, nou Bondye, sa enn ki devan son sanktyer.”

Rekonsilyasyon

³⁰ Kan Fineas, bann sef lakominote e bann sef bann klan Izrael ki ti avek li ti antann leksplikasyon ki bann fanmir Riben, bann fanmir Gad e bann fanmir Manase ti donnen, zot ti satisfe.

³¹ Alor, Fineas, garson pret Eleazar, ti dir avek bann Ribenit, bann Gadit ek bann desandan Manase, “Ozordi nou konnen ki SENYER i parmi nou, akoz zot pa'n komet en traizon kont SENYER. Alor, zot in delivre pep Izrael dan lanmen SENYER.”

³² Apre, Fineas, garson pret Eleazar, ek bann responsab lepep ti kit bann zabitan Riben, avek Gad dan pei Galaad e retourn Kanaan kot zot ti fer en rapor avek pep Izrael.

³³ Sa rapor ti fer plezir pep Izrael, ki ti loue Bondye. Zot ti aret koz lager, pour al atak pei kot bann Ribenit avek bann Gadit ti pe reste.

³⁴ Bann Ribenit ek bann Gadit ti donn en non sa lotel: Temwen, akoz zot ti dir, “I en temwen ant nou, SENYER i nou Bondye!”