Zozye 21 - Labib An Kreol Seselwa

Bann Lavil Levit

¹ Bann sef bann fanmir tribi Levi, ti vin war pret Eleazar, Zozye, garson Noun, ek bann sef bann fanmir lezot tribi Izrael.

² Ler zot ti Silo, dan pei Kanaan, zot ti dir, “SENYER in ordonnen par lentermedyer Moiz, ki nou ganny bann lavil pour nou reste ek bann laplenn zerb pour nou bann troupo zannimo.”

³ Alor, lo lord SENYER, bann Izraelit ti pran dan zot teritwar, bann lavil avek zot laplenn, e donn bann Levit.

⁴ Par tiraz osor, bann klan Levit desandan Keat, ti ganny swazir. Alor, bann desandan pret Aaron ti resevwar par tiraz osor 13 lavil sitye dan teritwar tribi Zida, Simeon ek Benzamen.

⁵ Lezot desandan Keat ti resevwar dis lavil sitye dan teritwar tribi Efraim, Dann ek demi tribi Manase.

⁶ Bann klan desandan Gersonn ti resevwar par tiraz osor, 13 lavil sitye dan teritwar tribi Isakar, Aser, Neftali, e demi tribi Manase, dan rezyon Basann.

⁷ Bann klan desandan bann fanmir Merari ti resevwar 12 lavil dan bann teritwar tribi Riben, Gad ek Zabilon.

⁸ Parey SENYER ti'n ordonnen par lentermedyer Moiz, bann Izraelit ti donn bann Levit, par tiraz osor, tou sa bann lavil avek zot laplenn zerb.

⁹ La bann lavil ki bann Izraelit ti donnen sorti dan teritwar tribi Zida ek Simeon,

¹⁰ e ki ti al pour bann desandan Aaron, dan klan Keat, garson Levi. Zot ti premye pour ganny swazir par tiraz osor.

¹¹ Zot ti resevwar Kiryat-Arba, lavil papa Anak, setadir Hebron ki sitye dan rezyon montanny Zida, ansanm avek bann laplenn otour.

¹² Me bann laplenn otour bann lavil ek bann vilaz ti'n deza propriyete Kaleb, garson Yefoune.

¹³ Zot ti donn desandan pret Aaron, Hebron, en lavil refiz avek son laplenn, pour bann ki'n fer krim. Zot ti ganny Libna avek son laplenn,

¹⁴ Yatir avek son laplenn, Estemoa avek son laplenn,

¹⁵ Holonn avek son laplenn, Debir avek son laplenn,

¹⁶ Asann avek son laplenn, Youta avek son laplenn, Bet-Semes avek son laplenn. An tou, nef lavil, sitye dan teritwar Zida ek Simeon.

¹⁷ Teritwar sorti dan tribi Benzamen: Gabaon avek son laplenn, Geba avek son laplenn,

¹⁸ Anatot avek son laplenn, Almonn avek son laplenn. An tou, kat lavil.

¹⁹ Bann pret desandan Aaron ti resevwar an tou 13 lavil ansanm avek zot laplenn.

²⁰ Lezot levit, desandan bann klan Keat ti resevwar par tiraz osor, bann lavil sitye dan teritwar Efraim.

²¹ Zot ti ganny Sikenm koman lavil refiz pour bann ki'n komet en krim, avek son laplenn, dan rezyon montanny Efraim, Gezer avek son laplenn,

²² Kibsaim avek son laplenn, e Bet-Horonn avek son laplenn. An tou, kat lavil.

²³ Dan teritwar Dann, zot ti resevwar Elteke avek son laplenn, Gibetonn avek son laplenn,

²⁴ Ayalonn avek son laplenn ek Gat-Rimonn avek son laplenn. An tou, kat lavil.

²⁵ Dan teritwar demi tribi Manase, zot ti resevwar de lavil: Taanak ek Ibleanm, avek zot laplenn.

²⁶ Bann desandan Keat ti resevwar an tou dis lavil avek zot laplenn.

²⁷ Bann klan desandan Gersonn, sorti Tribi Levi, ti resevwar de lavil avek zot laplenn sitye dan teritwar demi tribi Manase: Golann dan Basann, en lavil refiz, ek Beestera.

²⁸ Dan teritwar tribi Isakar, zot ti resevwar Kisyonn, Dabrat avek zot laplenn.

²⁹ Yarmout avek son laplenn, Enn-Ganim avek son laplenn. An tou, kat lavil.

³⁰ Dan teritwar Aser zot ti resevwar Miseal avek son laplenn, Abdonn avek son laplenn,

³¹ Elkat avek son laplenn, Reob avek son laplenn. An tou, kat lavil.

³² Dan teritwar tribi Neftali, zot ti resevwar koman bann lavil refiz: Kedes dan Galile avek son laplenn, Hamot-Dor avek son laplenn, e Kartann avek son laplenn. An tou, trwa lavil.

³³ Bann klan Gersonit ti resevwar an tou, 13 lavil avek zot laplenn.

³⁴ Lezot levit sorti dan bann klan Merari ti resevwar, dan teritwar tribi Zabilon: Yokneanm avek son laplenn, Karta avek son laplenn,

³⁵ Dimna avek son laplenn, Nahalal avek son laplenn. An tou, kat lavil.

³⁶ Dan teritwar tribi Riben: Beser avek son laplenn, Yatsa avek son laplenn,

³⁷ Kedemot avek son laplenn, Mefaat avek son laplenn. An tou, kat lavil.

³⁸ Dan tribi Gad, zot ti resevwar koman lavil refiz pour bann ki'n komet krim: Ramot dan Galaad avek son laplenn, Mahanaim avek son laplenn,

³⁹ Hesbonn avek son laplenn, Yazer avek son laplenn. An tou, kat lavil.

⁴⁰ Bann desandan klan Merari ti resevwar, par tiraz osor, 12 lavil an tou.

⁴¹ Tribi Levi ti resevwar an tou 48 lavil avek zot laplenn, sitye dan milye teritwar lezot Izraelit.

⁴² Sak lavil ti annan son laplenn zerb otour; ti parey pour tou bann lavil.

⁴³ SENYER ti donn bann Izraelit sa pei antye parey i ti'n promet zot zanset. Zot ti pran posesyon sa pei kot zot ti etabli zot.

⁴⁴ SENYER ti garanti zot lape lo tou bann frontyer, parey i ti'n promet zot bann zanset. SENYER ti'n livre tou zot bann lennmi dan zot lanmen; personn pa ti kapab reziste zot.

⁴⁵ Ti napa en sel parmi bann bon promes ki SENYER ti'n fer avek pep Izrael ki pa ti akonpli; tou ti realize.