Zozye 20 - Labib An Kreol Seselwa

Bann Lavil pour Bann Refizye

¹ SENYER ti dir Zozye,

² “Dir pep Izrael: Swazir bann lavil pour bann refizye ki mon ti koz avek zot par lentermedyer Moiz.

³ En dimoun ki touy son kanmarad par aksidan, san fer ekspre, ava kapab al refizye dan enn sa bann lavil e sap vanzans vanzer disan.

⁴ Sa ki'n komet en krim ava sov kot enn sa bann lavil e debout devan laport lavil. I ava eksplik son ka avek bann ansyen sa lavil ki ava les li antre e donn li en landrwa reste parmi zot.

⁵ Si vanzer disan pe pourswiv li, bann zabitan lavil pa pou livre sa dimoun dan son lanmen. Annefe, se par aksidan ki i ti touy son prosen; ti napa okenn laenn antre zot avan.

⁶ I ava reste dan sa lavil ziska ki i ava'n ganny zize par lakominote e ziska lanmor gran-pret ki an fonksyon dan sa letan. Apre, i ava kapab retourn kot li dan son lavil e dan son lakaz, kot i ti'n sove.”

⁷ Zot ti met apar Kedes, dan Galile, dan rezyon montanny Neftali; Sikenm, dan rezyon montanny Efraim avek Kiryat-Arba, ki apel osi Hebron, dan rezyon montanny Zida.

⁸ Zot ti swazir Beser ki lo lot kote larivyer Zourden, Les avek Zeriko, lo plato montanny dezer, dan teritwar tribi Riben; Ramot dan Galaad, dan tribi Gad; e Golann dan Basann, dan tribi Manase.

⁹ Sa ti bann lavil ki ti ganny swazir pour servi koman refiz pour tou bann Izraelit, ek bann etranze ki ti pe reste parmi zot. Konmsa, sa enn ki'n touy en dimoun par aksidan, ti kapab al rod refiz laba e sap vanzans vanzer disan, avan son ka i pas devan lakominote.