Zozye 18 - Labib An Kreol Seselwa

Partaz Leres Later

¹ Apre, lakominote Izraelit antye ti rasanble Silo, kot zot ti dres Latant Rankont. Zot ti pe kontrol pei antye.

² Parmi pep Izrael, ti reste set tribi ki pa ti ankor ganny zot par later.

³ Alor Zozye ti dir pep Izrael, “Ziska kan zot pou atann pour al pran posesyon sa pei ki SENYER, Bondye zot zanset in donn zot?

⁴ Swazir trwa zonm dan sak tribi, ki ava eksplor sa pei, e zot ava raport detay zot propozisyon konsernan par later sak tribi. Answit zot ava retourn kot mwan.

⁵ Zot ava diviz pei an set teritwar; tribi Zida ava reste dan son teritwar dan Sid, e bann desandan Zozef, dan zot teritwar, dan Nor.

⁶ Zot ava fer en deskripsyon sa set par e zot ava anmenn isi kot mwan. Alor, an prezans SENYER, nou Bondye, mon ava tir osor pour determin zot par.

⁷ Bann desandan Levi pa pou resevwar okenn par later; zot par i dan servis SENYER koman pret. Tribi Gad ek Riben, ensi ki demi tribi Manase, in deza resevwar zot teritwar dan Les larivyer Zourden. Moiz, serviter SENYER, ki ti donn zot.”

⁸ Alor, bann zonm ti ale. Zozye ti dir sa bann ki ti pe al eksplor pei, “Ale! Fer letour pei e anmenn en bon deskripsyon kot mwan. Apre, mon ava tir osor pour determin zot par, isi Silo, dan prezans SENYER.”

⁹ Alor, sa bann zonm ti al fer letour pei. Zot ti fer en deskripsyon dapre bann lavil, dan set par; answit, zot ti retourn kot Zozye dan kan Silo.

¹⁰ Zozye ti tir osor bann par pour zot dan prezans SENYER. La, Zozye ti partaz later parmi pep Izrael, dapre sa ki sakenn i devre gannyen.

Teritwar Tribi Benzamen

¹¹ Premye tiraz osor pour ganny teritwar, ti al pour Benzamen dapre zot bann fanmir. Zot teritwar ti sitye ant par Zida ek par tribi Zozef.

¹² Son frontyer Nor ti pran depi larivyer Zourden, e mont ver Zeriko dan Nor; apre, i ti kontinyen dan Was atraver bann rezyon montanny ziska dezer Bet-Aven.

¹³ Depi la, frontyer ti pas dan Sid, dan direksyon Louz, savedir Betel. Answit, frontyer ti desann ziska Atrot-Adar, lo sa montanny ki Sid avek Bet-Horonn.

¹⁴ Apre, frontyer ti sanz direksyon: I ti tourn ver Sid e fini Kiryat-Baal, ki apel osi Kiryat-Yearim, en lavil ki pour tribi Zida. Sa ti frontyer kote Was.

¹⁵ Frontyer Sid ti pran depi zanviron Kiryat-Yearim; i ti al Was ver Gasin, e abouti kot bann sours delo Neftoa.

¹⁶ Depi la, frontyer ti desann obor lipye montanny ki domin vale Hinonm, Nor avek laplenn bann Refait; i ti answit desann dan vale Hinonm, lo lapant Sid avek montanny bann Zebizit, e desann ziska Enn-Rogel.

¹⁷ Apre, i ti vir dan direksyon Nor ver Enn-Semes, answit Gelilot, ki anfas semen montanny Adoumim. Answit, i ti desann ver sa landrwa ki apel Ros-Bohann, dapre enn bann garson Riben.

¹⁸ I ti desann dan direksyon Nor anfas avek Bet-Araba e desann ver Araba.

¹⁹ Frontyer ti pas kote Nor lo lapant Bet-Hogla, e al fini lo lapwent Nor lanmer Mor, dan bout Sid larivyer Zourden. Sa ti frontyer Sid.

²⁰ Larivyer Zourden ti reprezant frontyer dan kote Les. Sa i patrimwann tribi Benzamen dapre bann klan, avek bann frontyer otour li.

²¹ Bann lavil pour bann klan Benzamen ti: Zeriko, Bet-Hogla, Emek-Kesis,

²² Bet-Araba, Semaraim, Betel,

²³ Avim, Para, Ofra,

²⁴ Kefar-Amonai. Ofni ek Geba. An tou, 12 lavil avek bann vilaz;

²⁵ Gabaon, Rama, Beerot,

²⁶ Mispe, Kefira, Moza,

²⁷ Rekenm, Irpeel, Tarala,

²⁸ Sela, Elef, lavil bann Zebizit, setadir Zerizalenm, Gibea, e Kiryat-Yearim. An tou, 14 lavil avek son bann vilaz. Tousala ti patrimwann bann fanmir Benzamen, dapre zot bann klan.