Zozye 13 - Labib An Kreol Seselwa

Teritwar ki Ti Reste pour Ganny Pran

¹ Zozye ti'n vin vye, en bon laz, SENYER ti dir li, “La ou'n vye, en laz avanse, e i reste bokou teritwar pour pran.

² La later ki reste ankor: Tou teritwar bann Filisten, ek bann Gesourit,

³ depi toran Sihor ki anfas avek Lezip, ziska frontyer avek Ekronn dan Nor, ki ganny konsidere koman teritwar bann Kananeen, e ki ganny okipe par senk sef rwayonm bann Filisten: Gaza, Asdod, Askelonn, Gat ek Ekronn, ensi ki teritwar bann Avit;

⁴ depi dan Sid, pei antye bann Kananeen, depi Meara ki propriyete bann Sidonit, ziska Afeka, ziska frontyer bann Amorit;

⁵ pei bann Gebalit, e Liban antye, dan kote Les, depi Baal-Gad anba montanny Hermon ziska lantre Amat;

⁶ tou bann zabitan dan montanny, depi Liban ziska Misrefot-Maim, tou bann Sidonit. Mon pou sas tou sa bann pep anmezir ki pep Izrael pou vin dir mwan. Partaz pei zis par tiraz osor, avek Izrael, parey mon'n ordonn ou.

⁷ Aprezan alor, diviz sa pei avek sa nef tribi ek demi tribi Manase.”

Teritwar Les avek Larivyer Zourden

⁸ Tribi Riben, Gad e demi tribi Manase ti resevwar zot par ki Moiz ti'n donn zot, sitye dan Les larivyer Zourden, parey Moiz, serviter SENYER ti'n donn zot

⁹ depi lavil Aroer ki obor larivyer Arnon e lavil dan milye larivyer, ensi ki tou sa plato Medba, ziska Dibonn,

¹⁰ ek tou bann lavil Sihonn, lerwa bann Amorit ki ti renny Hesbonn, ziska frontyer bann Amonit;

¹¹ Galaad, teritwar bann Gesourit avek bann Maakatit, rezyon montanny Hermon antye, Basann antye ziska Salka;

¹² dan Basann, rwayonm antye lerwa Og, ki ti rennyen Astarot ek Edrei, enn bann dernyen Refait ki Moiz ti bate e pran zot teritwar.

¹³ Me bann Izraelit pa ti pran teritwar bann zabitan Gesour ek Maaka; pour sa rezon ki bann Gesourit ek bann Maakatit pe viv parmi bann Izraelit ziska ozordi.

¹⁴ Levi ti sel tribi ki pa ti ganny okenn par. Son par ti bann sakrifis konplet an loner SENYER, Bondye Izrael, parey SENYER li menm ti'n promet li.

Teritwar Tribi Riben

¹⁵ Moiz ti'n donn tribi Riben en par teritwar dapre zot bann klan.

¹⁶ Zot teritwar ti pran depi Aroer ki lo bor larivyer Arnon, ek lavil ki dan milye sa menm larivyer, tou laplenn ziska Medba;

¹⁷ Hesbonn, ek tou bann lavil ki lo sa plato; Dibonn, Bamot-Baal, Bet-Baal-Meon,

¹⁸ Yasa, Kedemot, Mefaat,

¹⁹ Kiriataim, Sibma, Seret-Sahar sitye dan montanny sa vale,

²⁰ Bet-Peor, e bann lapant montanny Pisga, Bet-Yesimot,

²¹ tou sa bann lavil lo sa plato ek rwayonm antye lerwa Sihonn, ki ti renny lo bann Amorit dan Hesbonn. Moiz ti'n bat li avek tou son bann sef Madyann: Evi, Rekenm, Sour, Our ek Reba, ki ti reste dan pei, anba dominasyon Sihonn.

²² Parmi bann ki pep Izrael ti masakre, ti annan Balaanm, sa deviner, garson Beor; i ti parmi bann viktim.

²³ Larivyer Zourden ek son zanviron ti servi koman frontyer pour tribi Riben. Sa ti par patrimwann tribi Riben, dapre zot bann klan, bann lavil ek zot bann vilaz.

Teritwar Tribi Gad

²⁴ Moiz ti'n donn en par tribi Gad, avek son bann fanmir, klan par klan.

²⁵ Zot ti ganny koman teritwar: Yazer, tou bann lavil Galaad, lanmwatye pei bann Amonit, ziska lavil Aroer, ki an fas avek Raba,

²⁶ depi Hesbonn ziska Romat-Mispe, Betonim, depi Mahanaim ziska frontyer avek Debir,

²⁷ e dan vale, Bet-Haranm, Bet-Nimra, Soukot, ek Safonn, restan rwayonm Sihonn, lerwa Hesbonn, avek bor larivyer Zourden, ziska dan bout lanmer Zenezaret ki Les avek larivyer Zourden.

²⁸ Sa ti patrimwann bann fanmir dan tribi Gad, klan par klan, avek zot bann lavil ek zot bann vilaz.

Teritwar Demi Tribi Manase

²⁹ Moiz ti'n donn en par later demi tribi Manase, demi tribi bann fanmir Manase, klan par klan.

³⁰ Teritwar ki zot ti gannyen, ti konmans depi Mahanaim, travers Basann antye, rwayonm Og, lerwa Basann, avek tou bann kanpman depi Yair ziska Basann; 60 lavil an tou;

³¹ I ti osi ganny lanmwatye pei Galaad, Astarot, ek Edrei ki de lavil rwayonm Og, lerwa Basann, ki ti pour bann garson Makir, garson Manase, dapre zot bann klan.

³² Sa ti patrimwann ki Moiz ti partaze dan Les avek Zeriko ek larivyer Zourden dan bann laplenn Moab.

³³ Me Moiz pa ti donn tribi Levi okenn par. Se SENYER Bondye Izrael ki ti zot porsyon patrimwann, parey i ti'n dir zot.