Zozye 11 - Labib An Kreol Seselwa

Zozye I Bat Yabin ek Son bann Alye

¹ Kan i ti antann sa, Yabin, lerwa Asor, ti anvoy bann mesaze kot Yobab, lerwa Madonn, lerwa Simronn ek lerwa Aksaf,

² ensi ki bann lerwa ki ti reste dan Nor, dan montanny, bann ki ti reste dan laplenn arid, Sid avek Kinrot, dan rezyon vale, e dan laplenn Dor dan Was,

³ bann Kananeen ti reste dan Les e dan Was; bann Amorit, bann Hitit, bann Perizit, bann Zebizit ti reste dan rezyon montanny. Bann Hivit ti reste dan laplenn anba montanny Hermon dan rezyon Mispa.

⁴ Alor, zot ti sorti avek tou zot larme, en latroup nonbre parey disab obor lanmer. Zot ti annan en kantite seval ek kales lager.

⁵ Tou sa bann lerwa ti'n met zot ansanm; zot ti vin kanp pre avek sours Meronm pour atak Izrael.

⁶ SENYER ti dir Zozye, “Pa per zot, akoz demen menm ler, mon pou livre zot tou, mor, dan lanmen Izrael. Ou ava koup zare zot bann seval e bril zot bann kales lager.”

⁷ Avek tou son bann gerye, Zozye ti atak zot par sirpriz, pre sours Meronm.

⁸ SENYER ti livre zot dan lanmen bann Izraelit ki ti atak zot e pourswiv zot ziska gran lavil Sidon, ziska Misrefot-Maim, e ziska vale Mispe dan Les. I ti bat zot san les okenn sirvivan.

⁹ Zozye ti tret zot parey SENYER ti'n ordonn li: I ti koup zare zot bann seval e bril zot bann kales lager.

Zozye I Pran Asor

¹⁰ Dan sa menm letan, Zozye ti retournen e pran lavil Asor; i ti masakre son lerwa avek lepe. Annefe, Asor ti otrefwa lavil prensipal tou sa bann rwayonm.

¹¹ Zot ti masakre tou sa ki ti vivan. Zot ti detri tou san kit nanryen vivan e zot ti met dife dan lavil Asor.

¹² Zozye ti kaptir tou bann lavil ek zot bann lerwa; I ti masakre zot bann lerwa e detri tou, parey Moiz, serviter SENYER ti'n ordonnen.

¹³ Me bann Izraelit pa ti bril bann lavil ki sitye lo montanny, eksepte Asor, ki Zozye ti brile.

¹⁴ Bann Izraelit ti pran tou piyaz lager ek tou sa ki zot ti posede ek zot bann zannimo. Me zot ti masakre tou bann zabitan, e detri zot tou, san kit okenn sirvivan.

¹⁵ Sa ki SENYER ti'n ordonn Moiz son serviter, Moiz ti ordonn Zozye. Zozye ti fer li. I pa ti negliz nanryen ki SENYER ti'n ordonn Moiz.

Bann Pei ki Zozye Ti Kaptire

¹⁶ Alor, Zozye ti kaptir sa pei antye: Montanny Negev antye, Gosenn, laplenn dezer, bann rezyon montanny dan Izrael, dezer dan Sid, avek laplenn obor lanmer.

¹⁷ I ti ranport laviktwar lo tou bann lerwa, touy zot e kaptir tou zot teritwar depi montanny Alak dan rezyon Seir, ziska Baal-Gad, dan vale Liban anba montanny Hermon.

¹⁸ Lager ki Zozye ti fer kont tou sa bann lerwa ti dire pandan plizyer zour.

¹⁹ Apard bann Hivit ki ti reste dan lavil Gabaon, okenn lavil pa ti fer lape avek bann Izraelit ki ti kaptir tou lezot lavil par lager.

²⁰ Annefe, SENYER ti'n andirsi zot leker pou fer lager kont Izrael, pour ki Izrael ava kapab masakre zot san pitye, e detri zot konpletman, parey SENYER ti'n ordonn Moiz.

Zozye I Detri Bann Anakim

²¹ Sa lepok, Zozye ti vin detri tou sa bann zean Anakit ki reste dan montanny, depi Hebron, Debir, Anab e dan bann pei montanny Zida ek Izrael.

²² Ti nepli annan okenn zean dan pei Izrael, sof dan Gaza, dan Gat e dan Asdod.

²³ Alor, Zozye ti pran tou sa pei, parey SENYER ti'n ordonn Moiz. Zozye ti donn bann Izraelit sa pei, e diviz li an porsyon, par tribi. Alor pei ti trankil, san lager.