Zonas 4 - Labib An Kreol Seselwa

Zonas I Pran Lakoler

¹ Zonas pa ti kontan sa ki ti'n arive e i ti pran en gran lakoler.

² I ti priy SENYER: SENYER! Sanmenm ki mon ti dir letan mon ti ankor dan mon pei. Pour sa rezon ki mon ti prefere sove pour al Tarsis, akoz mon konnen ki ou en Bondye ki bon e ranpli avek pitye, touzour pare pour pardonnen, ou pa pran lakoler vitman, ou ranpli avek lanmour e ou pa kontan fer ditor personn.

³ Alor, SENYER mon demann ou pran mon lavi. Plito mon mor ki kontinyen viv konmsa.

⁴ SENYER ti demann li, “Eski ou annan rezon pran lakoler?”

⁵ Apre sa, Zonas ti sorti dan Niniv e al asiz Les avek lavil. I ti fer en payot e asiz anba la pour li kasyet soley. I ti asize dan lonbraz e espere ki pou arive avek lavil.

⁶ SENYER Bondye ti fer en plant pouse. Sa plant ti pous par lao Zonas e donn li lonbraz pour soulaz li. Alor, Zonas ti byen kontan.

⁷ Me lannmen bomaten, Bondye ti fer en lever pik sa plant e i ti fletri.

⁸ Kan soley ti monte, Bondye ti fer soufle en divan so sorti dan Les; soley ti tap lo latet Zonas e fer li feb. I ti demann lanmor ankor: Plito mon mor ki kontinyen viv konmsa.

⁹ Me Bondye ti demann Zonas, “Eski ou annan rezon pran lakoler avek sa plant?” Zonas ti dir, “Mon annan rezon ankoler e mon anvi lanmor, pran mwan.”

¹⁰ Senyer ti dir, “Ou pran pitye pour sa plant ki ou pa'n ni donn lapenn plante, ni fer li pouse. I ti pouse en swar e i ti mor son lannmen.

¹¹ Eski mwan, mon pa devre pran pitye pour Niniv, sa gran lavil ki annan plis ki 120,000 zabitan inosan ki pa konn zot lanmen drwat avek zot lanmen gos, ensi ki en kantite zannimo?”