Zonas 1 - Labib An Kreol Seselwa

Zonas I Esey Sove

¹ SENYER ti koz avek Zonas, garson Amitai. I ti dir li:

² “Leve e al Niniv, sa gran lavil e anons en lavertisman kont li, akoz mon'n war tou sa bann move keksoz ki zot pe fer.”

³ Me Zonas ti sove pour li al Tarsis, lwen devan prezans SENYER. I ti desann Zafa e pran en bato ki ti pe al Tarsis. I ti pey son pasaz e anbark lo bato avek lekipaz pour al Tarsis, lwen avek prezans SENYER.

⁴ Me SENYER ti fer soufle en gro divan lo lanmer. Tanpet ti sitan for, ki bato ti pre pour koule.

⁵ Bann maren ti per e sakenn ti kriy ver son bondye. Zot ti zet marsandiz dan lanmer pour fer bato pli leze. Pandan sa letan, Zonas ti'n al kasyet dan lakal bato kot i ti tonm dan en profon sonmey.

⁶ Kaptenn ti al kot li. I ti dir li, “Ki ou pe fer la? Ou pe dormi! Leve! Priy ou bondye! Kekfwa i ava pran konsiderasyon pour nou e nou pa ava mor.”

⁷ Bann maren ti dir ant zot: Annou tir osor pour nou konnen lekel lakoz sa maler ki lo nou. Zot ti tir osor e i ti tonm lo Zonas.

⁸ Zot ti dir li, “Dir nou akoz sa maler in tonm lo nou. Ki ou travay? Kote ou sorti? Ki ou nasyonalite?”

⁹ I ti dir zot, “Mon en Ebre e mon ador SENYER, Bondye lesyel ki'n kree lanmer ek later.”

¹⁰ Bann maren ti pli per ankor kan zot ti aprann ki i ti pe sov SENYER. Zot ti demann li, “Akoz ou'n fer sa?

¹¹ Ki nou pou fer avek ou pour fer lanmer kalmi?” Annefe, lanmer ti'n vin pli move.

¹² Zonas ti dir zot, “Pran mwan e zet mwan dan lanmer, e lanmer ava kalmi. Mon konnen ki mwan lakoz sa gro tanpet.”

¹³ Malgre sa, bann maren ti naz zaviron avek tou zot kouraz pour esey ariv ater, me zot pa ti kapab, akoz lanmer ti'n vin pli move ankor.

¹⁴ Alor, zot ti priy SENYER. Zot ti dir: SENYER! Nou demann ou pa les nou perdi nou lavi akoz lavi sa zonm. Pa rann nou responsab disan en inosan. Ou SENYER, ou fer sa ki oule.

¹⁵ Alor, zot ti pran Zonas e zet li dan lanmer. Deswit tanpet ti arete.

¹⁶ Sa bann maren ti ganny en gran lafreyer pour SENYER e zot ti ofer li en sakrifis e fer bann ve.

¹⁷ SENYER ti fer en gro pwason anval Zonas ki ti reste dan vant sa pwason pandan trwa zour ek trwa nwit.