Zoel 3 - Labib An Kreol Seselwa

Bondye I Ziz bann Nasyon

¹ La sa ki SENYER i deklare: Sa zour la, dan sa letan, mon pou retabli sityasyon Zida ek Zerizalenm.

² Mon pou rasanble tou bann nasyon e fer zot desann dan vale Zozafat. La, mon pou pas zizman lo zot, akoz Izrael mon pep, mon posesyon ki zot in disperse parmi bann nasyon. Mon pou osi pas zizman lo size mon pei ki zot in partaze.

³ Zot in tir osor lo mon pep. Zot in vann bann zennzan, pour pey bann prostitye. Zot in vann bann zenn fiy, pour pey diven ki zot in bwar.

⁴ Zabitan Tir, Sidon ek bann rezyon Filisten! Ki zot oule avek mwan? Zot oule revanze? Alor, mon pou fer zot vanzans retonm lo zot.

⁵ Annefe, zot in pran mon larzan ek mon lor. Zot in anmenn dan zot tanp tou mon trezor ki annan pli gran valer.

⁶ Zot in vann bann zabitan Zida ek Zerizalenm avek bann Grek, pour anmenn zot lwen avek zot pei.

⁷ Me aprezan, mon pou retir zot la kot zot in ganny vann. Mon pou fer zot forfe retonm lo zot.

⁸ Mon pou vann zot zennzan ek zot zenn fiy avek zabitan Zida, ki apre, pou vann zot avek bann Sabeen, en pep ki reste lwen avek zot. SENYER ki'n deklare.

⁹ Anons sa parmi bann nasyon! Met zot pare pour lager! Mobiliz bann gerye! Rasanble zot e met pare pour atake.

¹⁰ Transform pyos pour fer lepe. Fer lans avek zot bann sekater. Ou ki feb! Dir: Mon for!

¹¹ Bann nasyon dan zalantour! Degaze, vini zot tou! Rasanble zot tou! SENYER! Fer desann ou bann gerye.

¹² Bann nasyon, bouze! Mont dan vale Zozafat. La, mon pou asize, pour mwan ziz tou bann nasyon dan zalantour.

¹³ Lans zot fosi, rekolt in mir. Vini, vin pile, akoz moulen rezen in plen; bann basen pe deborde. Zot mesanste in depas limit.

¹⁴ Gran, Gran lafoul pe rasanble dan vale zizman. Zour SENYER i pros; i pe vin dan vale zizman.

¹⁵ Soley ek lalin pou vin sonm, bann zetwal pou nepli donn laklerte.

¹⁶ SENYER i kriye depi Siyon; i fer tande son lavwa depi Zerizalenm. Lesyel ek later i tranble. Me SENYER i en labri pour son pep, en proteksyon pour Izrael.

¹⁷ Alor, zot ava konnen ki mwan SENYER, zot Bondye. Mon reste dan Siyon, mon montanny sakre. Zerizalenm pou vin en landrwa sakre, kot okenn etranze pou nepli kapab antre.

¹⁸ Sa zour, diven ek dile pou koule sorti lo montanny. Delo pou koule dan tou bann larivyer dan Zida. En sours pou sorti dan tanp SENYER; i pou aroz bann landrwa sek.

¹⁹ Lezip pou ganny detri; Edonm pou vin en dezer, akoz vyolans ki zot ti fer anver bann zabitan Zida. Zot in fer koule disan bann inosan dan sa pei.

²⁰ Me pou touzour annan zabitan dan pei Zida ek Zerizalenm.

²¹ Mon pa pou pini zot; mon pou deklar zot inosan. Mwan, SENYER, mon pou fer mon demer dan Siyon.