Zoel 2 - Labib An Kreol Seselwa

En Lavertisman Zour Senyer

¹ Sonn tronpet lo montanny Siyon! Kriye lo mon montanny sakre! Tranble, zot bann zabitan pei Zida! Zour SENYER pe vini, i byen pros.

² En zour fernwanr ek brouyar, en zour avek nyaz epe ki kouver montanny. En gran larme zensek, nonbre e for, ki nou pa'n zanmen war, pe vini. Zanmen en keksoz parey in deza arive, e i pa pou zanmen ariv ankor dan lavenir.

³ Par devan, konmsi en dife ki devor tou. Par deryer, laflanm i detri tou. Oparavan, later ti parey zarden Edenn, me in vin sek, parey en dezer. Napa nanryen ki sap li.

⁴ Zot parey bann seval; zot taye konmsi bann seval lager.

⁵ Zot fer tapaz, konmsi bann kales lager ki pe sote lo latet montanny. Ou ava krwar en dife ki pe bril lapay sek. Zot met zot annord parey en gran larme, pare pour lager.

⁶ Lepep i tranble kan zot war sa; zot vin pal avek lafreyer.

⁷ Zot atake parey bann brav gerye; zot mont miray parey bann gerye; zot avanse dan lord, san kit semen.

⁸ Personn pa bar kanmarad. Zot al drwat devan zot, nanryen pa kapab bar zot.

⁹ Zot antre dan bann lavil, grenp lo bann miray; zot antre partou dan bann lakaz; zot antre par lafnet parey voler.

¹⁰ Zot fer later tranble. Lesyel i vibre ler zot pase. Soley ek lalin i vin sonm, e zetwal nepli briye.

¹¹ SENYER i fer tande son lavwa devan son larme, son gran larme pwisan ki egzekit son lord. Zour SENYER i gran e vreman terib. Lekel ki pou kapab reziste?

Lapel pour Retourn kot Senyer

¹² La sa ki SENYER i deklare: Retourn kot mwan avek tou zot leker: Zennen, plere, lamante.

¹³ Pa desir zot lenz, me plito zot leker. Retourn kot SENYER, zot Bondye, akoz i ranpli avek konpasyon ek pitye. I ranpli avek pasyans ek fidelite; i regret bann pinisyon.

¹⁴ Petet i ava sanz son desizyon, e donn ou son benediksyon! Alor, ofer SENYER, ou Bondye en lofrann dible ek diven.

¹⁵ Sonn tronpet dan Siyon! Donn lord pour fer en zenn! Rasanble bann zabitan pour en rasanbleman sakre.

¹⁶ Rasanble tou dimoun, konsakre zot pour en lasanble sakre. Rasanble bann vyeyar. Reini bann zanfan, menm bann pti baba. Nouvo marye, kit lakaz! Nouvel marye, kit lasanm!

¹⁷ Zot bann pret ki servi SENYER! Lamante ant lotel ek laport sanktyer. Dir: SENYER! Sov ou pep! Pa les ou bann zanfan vin en laont parmi bann nasyon! Pa les bann nasyon dir: Oli zot Bondye?

Bondye I Redres Sityasyon Son Pep

¹⁸ Alor, SENYER ti montre son gran zalouzi; i ti pran pitye pour son pep.

¹⁹ SENYER ti reponn son pep: Mon pou donn zot dible, diven ek delwil ziska ki zot rasazye. Mon pa pou les zot vin en laont ankor, parmi bann nasyon.

²⁰ Mon pou sas bann sotrel ki sorti dan Nor; mon pou sas zot lwen dan en later sek e devaste. Mon pou anvoy son avangard, dan lanmer Mor, e sa ki deryer zot, dan lanmer Mediterane. Piyanter kadav bann gerye pou monte. SENYER in akonpli bann gran mervey.

²¹ Later! Pa bezwen per! Plito rezoui, akoz SENYER in akonpli bann gran mervey!

²² Zannimo sovaz dan lakanpanny! Pa bezwen per, zerb pe repouse lo montanny! Pye dibwa pe raport zot fri; pye fig ek pye rezen pe donn zot fri annabondans.

²³ Zot bann zabitan Siyon! Rezoui dan SENYER, zot Bondye. In fer tonbe lapli apre lasesres; in fer tonbe lapli annabondans: Lapli pour sak sezon, parey avan.

²⁴ Landrwa kot zot bat dible pou ranpli avek legren. Barik diven ek delwil pou deborde.

²⁵ Mon pou ranplas tou sa ki zot in perdi, devore par sotrel, senir, kasbol, mon gran larme, ki mon'n anvoy lo zot.

²⁶ Zot pou manze ziska zot ava rasazye; zot ava loue SENYER, zot Bondye ki'n fer bann mervey pour zot. Mon pep pa pou zanmen ganny laont ankor.

²⁷ Alor, zot pou konnen ki mon prezan parmi pep Izrael, ki mwan menm SENYER, zot Bondye e ki napa en lot. Mon pep pa pou zanmen santi zot onte ankor.

Bondye I Devers Son Lespri

²⁸ Apre sa, mon pou devers mon lespri lo tou dimoun: Zot zennzan ek zot zenn fiy pou profetize. Zot bann vyeyar pou ganny rev, Zot bann zennzan pou ganny vizyon.

²⁹ Dan sa letan, mon pou devers mon lespri lo tou dimoun, menm lo bann serviter, fanm koman zonm.

³⁰ Mon pou fer paret bann siny ekstraordiner dan lesyel e lo later: Pou annan disan, dife, ek lafimen.

³¹ Avan sa zour SENYER i arive, soley pou vin sonm, lalin pou vin kouler disan. I pou en zour gran e terib.

³² Sa zour la, sa enn ki envok SENYER, ava ganny sove, parey SENYER in promet Zerizalenm, lo montanny Siyon. Pou annan parmi bann sirvivan, en restan pep ki SENYER in apele.