Zoel 1 - Labib An Kreol Seselwa

¹ SENYER ti koz avek Zoel, garson Petouel:

Lamantasyon lo Destriksyon Plantasyon

² Ekout sa! Zot tou bann ansyen! Ekout byen! Zot zabitan Zida! Dir mwan: Eski en tel keksoz in deza arive dan zot lepok, oubyen dan lepok zot zanset?

³ Rakont sa avek zot bann zanfan; zot bann zanfan ava rakont avek zot bann zanfan; zot bann pti zanfan, ava rakont avek zot zenerasyon.

⁴ Lesen sotrel, enn apre lot, in apoz lo zot plantasyon. Tou sa ki en lesen pa'n fini manze, en lot in devore. Tou sa ki en lesen in kit deryer, en lot lesen in detri.

⁵ Reveye, zot bann soular! Plere, zot bann bwarer diven! Rezen pour fer diven nouvo in ganny detri.

⁶ En nasyon in anvai zot pei; zot tro nonbre e zot for. Zot ledan i parey ledan lyon; zot lanmaswar i parey lanmaswar en femel lyon.

⁷ Zot in devaste mon plantasyon rezen; mon pye fig in ganny manze. Zot in ronz son lekors, son bann brans in vin blan.

⁸ Lamante zot tou, parey en zenn fiy an dey ki pe pler lanmor son zenn fiyanse.

⁹ Personn nepli anmenn lofrann vezetal, ni lofrann labwason dan tanp SENYER.

¹⁰ Bann plantasyon in ganny devaste, later i an dey, dible in ganny detri, nepli annan prodiksyon diven, nepli annan prodiksyon delwil.

¹¹ Kriye dan dezespwar, zot bann planter! Plere, zot bann travayer plantasyon rezen, akoz tou rekolt dible ek lorz in ganny detri.

¹² Brans rezen pe sek; pye fig pe fletri; pye grenad, pye dat, pye ponm ek tou lezot pye fri, tousala pe sek debout. Tou lazwa in ale parmi bann imen.

Lapel pour Zenn ek Lapriyer

¹³ Zot bann pret! Met zot lenz dey! Lamante, zot ki servi lo lotel! Antre dan tanp e pas lannwit dan lenz dey. Lamante, zot bann serviter Bondye! I nepli annan lofrann vezetal ek lofrann diven dan tanp zot Bondye.

¹⁴ Donn lord pour fer en zenn. Rasanble bann zabitan pour en lasanble solannel! Rasanble bann ansyen ek tou zabitan dan pei, dan tanp SENYER zot Bondye e enplor SENYER.

¹⁵ Maler! Zour SENYER i pros. Zour destriksyon ki Bondye Toupwisan pou anvoye.

¹⁶ Manze pe disparet lanmenm la devan nou lizye. Lazwa ek boner in disparet dan tanp Bondye.

¹⁷ Bann lagrenn ki'n senmen pa'n zermen. Bann grennyen i vid; langar lagrenn in ganny demoli.

¹⁸ Gete! Bann zannimo pe kriye. Zot in disperse partou akoz napa zerb; menm bann mouton pe soufer.

¹⁹ Ver ou SENYER, mon pe kriye, zerb ek pye dibwa in sek partou, konmsi en laflanm dife ki'n bril tou.

²⁰ Menm bann zannimo sovaz i sipliy ou, akoz delo dan bann larivyer in sek, dife pe bril tou pye dibwa dan lakanpanny.