Ziz 9 - Labib An Kreol Seselwa

Abimelek I Esey Etabli En Lerwa

¹ Abimelek, garson Yeroub-Baal, ti al Sikenm pou koz avek bann frer son manman e avek bann klan lo kote papa son manman. I ti dir zot,

² “Al koz avek tou bann dimoun enportan dan Sikenm: Kwa ki pli bon pour zot, ganny dirize par 70 zonm, ki tou i bann garson Yeroub-Baal, oubyen ganny dominen par en sel zonm? Pa oubliye ki mon enn parmi zot.”

³ Bann tonton Abimelek ti al repet tou sa ki i ti'n dir zot, avek bann dimoun enportan dan Sikenm. Zot leker ti an faver Abimelek, akoz zot ti dir, “I nou frer.”

⁴ Zot ti donn li 70 pyes larzan sorti dan tanp Baal-Berit. Avek sa larzan, Abimelek ti aste bann voryen ek bann bandi ki ti swiv li.

⁵ I ti al Opra, kot son papa; la, i ti touy son bann frer, bann zanfan Yeroub-Baal; an tou 70 zonm lo en sel ros. Ti reste zis Yotanm, dernyen zanfan Yeroub-Baal, akoz i ti'n al kasyet.

⁶ Tou bann dimoun enportan dan Sikenm ek lafanmir Bet-Milo ti rasanble pour al proklanm Abimelek lerwa pre kot pye terebent, akote pilye ki dan Sikenm.

Parabol bann Pye Dibwa

⁷ Ler Yotanm ti aprann sa nouvel, i ti mont lo latet montanny Garizim. I ti kriy for avek zot: Bann dimoun enportan dan Sikenm, ekout mwan! Bondye ava antann zot!

⁸ En zour, bann pye dibwa ti al swazir en lerwa. Zot ti dir pye zoliv: Vin nou lerwa.

⁹ Me pye zoliv ti reponn zot: Eski mon pou abandonn mon delwil ki bann bondye ek bann imen i kontan, pour mwan al balanse par lao lezot pye dibwa?

¹⁰ Alor, bann pye dibwa ti dir pye fig: Ou! Vin nou lerwa.

¹¹ Me pye fig ti reponn zot: Eski mon pou abandonn mon bann fri byen dou, pour mwan al balanse par lao lezot pye dibwa?

¹² Alor, bann pye dibwa ti dir pye rezen: Ou! Vin nou lerwa.

¹³ Me pye rezen ti reponn zot: Eski mon pou abandonn mon diven ki donn lazwa bann bondye ek bann imen, pour mwan al balanse par lao lezot pye dibwa?

¹⁴ Alor, tou bann pye dibwa ti dir bann bison pikan: Ou! Vin nou lerwa.

¹⁵ Bison ti reponn bann pye dibwa: Si zot senser ler zot oule donn mwan lonksyon, pour mwan vin zot lerwa, vini, vin maske zot anba mon lonbraz; sinon, mon demann en dife sorti dan bison pikan e devor bann pye sed Liban.

¹⁶ “Aprezan, eski zot in azir lwayalman e senserman, ler zot ti fer Abimelek lerwa? Eski zot in azir korekteman anver Yeroub-Baal ek son fanmir? Eski zot in azir anver li dapre merit son bann aksyon?

¹⁷ Pa oubliye ki mon papa in konbat pour zot, in ekspoz son lavi lo fron batay e in delivre zot dan lanmen bann Madianit.

¹⁸ Ozordi, zot in dres zot kont lafanmir mon papa. Zot in touy son bann zanfan, 70 zonm, lo en sel ros, e zot in fer Abimelek, garson ki i ti ganny avek son servant, lerwa lo bann sef akoz i zot frer.

¹⁹ Si ozordi, zot in azir lwayalman e senserman anver Yeroub-Baal ek son fanmir, ki Abimelek i rann zot ere e ki zot osi zot rann li ere.

²⁰ Si sa pa vre, mon demande ki en dife i sorti depi Abimelek e devor bann sef dan Sikenm, ek lafanmir Milo; ki en dife i sorti kot bann sef Sikenm ek fanmir Milo e devor Abimelek.”

²¹ Yotanm ti disparet an tayan; i ti al reste Beer, lwen avek Abimelek son frer.

Lapert Abimelek

²² Abimelek ti gouvern Izrael pandan 3 an.

²³ Apre, Bondye ti anvoy en lespri move divizyon ant Abimelek ek bann dimoun enportan dan Sikenm: Zot ti trai Abimelek.

²⁴ Annefe, ti fodre ki sa vyolans fer kont sa 70 zanfan Yeroub-Baal e zot disan i retonm lo Abimelek, zot frer ki ti'n touy zot, e lo bann dimoun enportan dan Sikenm ki ti'n donn li en koudmen pour touy son bann frer.

²⁵ Bann responsab Sikenm ti plas bann pyez kont li lo latet bann montanny e zot ti depouy tou dimoun ki ti pas pre avek zot lo semen. Abimelek ti ganny enformen.

²⁶ Gaal, garson Ebed, ti pas par Sikenm avek son bann frer. Bann responsab dan Sikenm ti met zot konfyans dan li.

²⁷ Zot ti al dan lakanpanny pour rekolte zot rezen ki zot ti kraze pour fer diven e apre, fer lafet. Zot ti al dan tanp zot bondye kot zot ti manze e bwar; apre, zot ti modi Abimelek.

²⁸ Gaal, garson Ebed ti dir, “Ki Abimelek i ete e lekel li Sikenm, pour ki nou servi Abimelek? Pa i garson Yeroub-Baal? Zeboul pa i son lenspekter? Pran Amor, papa Sikenm koman zot sef. Akoz fodre ki nou, nou servi Abimelek?

²⁹ Zis donn mwan sa pep e mon ava elimin Abimelek.” I ti dir Abimelek, “Ogmant ou larme, e vin fer lager.”

³⁰ Zeboul, gouverner lavil, ti pran lakoler ler i ti aprann sa ki Gaal, garson Ebed ti'n dir.

³¹ I ti anvoy an sekre bann mesaze kot Abimelek pour dir li, “Gaal, garson Ebed in ariv Sikenm avek son bann frer. I pe soulev lavil kont ou.

³² Alor, dan lannwit, leve avek ou bann zonm e al kasyet dan lakanpanny.

³³ Bomaten, avek soley leve, ou ava leve e atak lavil. Ler Gaal avek son bann zonm ava sorti pour li konfront ou, ou ava tret li koman oule.”

³⁴ Abimelek avek son bann zonm ti leve dan lannwit, diviz zot an kat group e al kasyet pre Sikenm.

³⁵ Ler Gaal, garson Ebed, ti sorti e al met li debout devan lantre lavil, Abimelek ek bann zonm ki ti avek li ti sorti kot zot ti pe kasyet.

³⁶ Ler i ti war sa troup, Gaal ti dir Zeboul, “I annan en troup zonm ki pe desann depi dan leo montanny.” Zeboul ti dir li, “Ou pe pran lonbraz bann montanny pour bann zonm.”

³⁷ Gaal ti reponn ankor, “I vre; en group dimoun pe desann dan milye kolin; e en lot troup pe vini par semen pye dibwa bann sorsye.”

³⁸ Zeboul ti reponn li, “Oli ou bann gran diskour, ou ti pe dir: Ki Abimelek i ete pour ki nou soumet nou anba li? Pa sanmenm sa troup ki ou ti ensilte? Aprezan, esey al fer en latak kont li.”

³⁹ Gaal ti sorti devan bann sef Sikenm e konbat kont Abimelek.

⁴⁰ I ti pourswiv Gaal ki ti bezwen sove pou li sape. En kantite dimoun ti mor menm ziska devan lantre laport lavil.

⁴¹ Abimelek ti reste dan lavil Arouma. Zeboul ti pourswiv Gaal ek son bann frer ki nepli kapab reste Sikenm.

⁴² Lannmen, Abimelek ti ganny enformen ki lapopilasyon ti pe al dan lakanpanny.

⁴³ I ti diviz son bann zonm an trwa group e al esper dan lakanpanny. Ler i ti war bann zabitan sorti dan lavil, i ti sorti e atak zot.

⁴⁴ Abimelek ek son bann zonm ti al pran pozisyon devan laport lavil. Sa de lezot group ti atak tou sa bann ki ti dan lakanpanny e touy zot.

⁴⁵ Tou lazournen, Abimelek ti lager kont lavil. I ti pran sa lavil e masakre tou son bann zabitan. Apre, i ti detri lavil e fann disel partou.

⁴⁶ Ler zot ti antann sa nouvel, tou bann sef dan latour Sikenm ti al kasyet dan lakav, anba tanp Baal-Berit.

⁴⁷ Abimelek ti ganny enformen kote tou bann sef latour Sikenm ti'n rasanble.

⁴⁸ Alor, Abimelek ti al lo montanny Salmonn avek son bann zonm. Avek en lars, i ti koup en brans en pye dibwa ki i ti met lo son zepol. Apre, i ti dir son bann zonm ki ti avek li, “Zot war ki mon'n fer. Depese, fer parey.”

⁴⁹ Tou son bann zonm ti koup en brans e swiv Abimelek. Zot ti plas zot brans kont lakav e met dife. Lakav ti brile avek tou dimoun ki ti ladan. Konmsa ki tou bann zabitan latour Sikenm ti mor. An tou, anviron 1,000 zonm ek fanm.

Lanmor Abimelek

⁵⁰ Abimelek ti al Teb. I ti kanp kont Teb ki i ti kaptire.

⁵¹ Dan milye lavil, ti annan en tour fortifye kot tou bann zabitan, zonm, fanm, ek tou bann sef lavil ti'n al refizye. Zot ti'n ferm zot dan sa tour e mont lo son twa plat.

⁵² Abimelek ti ariv kot sa tour ki i ti atake pour ariv devan laport pour li met dife.

⁵³ Alor, en fanm ti larg en ros ki servi pour kraz dible, lo latet Abimelek e defons son krann.

⁵⁴ Toudswit, Abimelek ti apel son serviter ki ti pe anmenn son bann zarm. I ti dir li, “Tir ou lepe e touy mwan, pour ki dimoun pa dir ki en fanm ki ti touy li.” Son serviter ti pik li e i ti mor.

⁵⁵ Ler bann Izraelit ti war ki Abimelek in mor, sakenn ti retourn kot li.

⁵⁶ Konmsa, Bondye ti fer retonm lo Abimelek dimal ki i ti'n fer soufer son papa ler i ti touy son 70 frer.

⁵⁷ Bondye ti osi fer bann zabitan Sikenm, peye pour tou zot bann mesanste. Konmsa, malediksyon Yotanm, garson Yeroub-Baal, ti realize.