Ziz 7 - Labib An Kreol Seselwa

Zedeon I Sas bann Madyanit

¹ Yeroub-Baal, savedir Zedeon, ti leve bomaten avek son troup. Zot ti al kanp pre sours delo ki Arod. Kan bann Madianit ti dan Nor, depi kolin More, ziska dan vale.

² SENYER ti dir Zedeon, “Ou larme i tro nonbre pour mwan livre Madyann dan ou lanmen; Izrael ava kapab fer vantar lo mon depan e dir: Mon prop lafors ki'n sov mwan.

³ Par konsekan, la sa ki ou ava proklanm avek ou bann zonm: Sa enn ki per e ki pe tranble, depese retournen an pasan par rezyon montanny Galaad.” 22,000 zonm parmi lepep ti retournen; 10,000 ti reste.

⁴ SENYER ti dir Zedeon, “Lepep i ankor tro nonbre. Fer zot desann obor delo kot mon ava teste zot dan ou plas. Sa enn avek ki mon pou dir: Al avek ou, ava ale avek ou; tou zonm avek ki mon pou dir: Pa al avek ou, pa pou ale.”

⁵ Alor, Zedeon ti fer lepep desann obor delo. SENYER ti dir li, “Sa enn ki pou bwar delo avek son lalang parey en lisyen, oubyen ki azenou pour bwar, ou ava met li apar.”

⁶ 300 zonm ti met delo dan zot lanmen e bwar avek lalang; tou leres dan larme ti met zot azenou pour bwar.

⁷ SENYER ti dir Zedeon, “Mon pou livre Madyann dan ou lanmen avek sa 300 zonm ki ti bwar delo parey lisyen. Fer leres retourn kot zot.” Sa 300 zonm ti pran provizyon ki ti annan; osi zot bann tronpet.

⁸ Apre, i ti fer leres zonm Izrael retourn kot zot. I ti gard zis sa 300 zonm. Kan bann Madianit ti zis par anba li, dan laplenn.

⁹ Sa lannwit, SENYER ti dir Zedeon, “Leve! Desann dan kan; mon'n fini livre zot dan ou lanmen.

¹⁰ Si ou per atake, desann dan kan avek Poura, ou serviter.

¹¹ Ou ava antann sa ki zot pe dir; apre, ou ava pran kouraz pour atak kan.” Zedeon ti desann avek Poura, son serviter, ziska bann avan post dan kan.

¹² Bann Madianit, bann Amalesit ek tou bann zonm sorti dan Les, ti'n tale dan laplenn parey en lesen krike; zot bann samo ti osi nonbre ki disab obor lanmer.

¹³ Ler Zedeon ti arive, en zonm ti pe rakont en rev avek en zanmi. I ti pe dir, “Mon'n fer en rev: En dipen ron, fer avek lorz griye ti pe roule dan kan bann Madianit; i ti ariv ziska latant. I ti tap kont latant e met tou anba lao; latant ti tonbe”

¹⁴ Son zanmi ti reponn, “Sa pa lot ki lepe Zedeon, garson Zoas, sa Izraelit. Bondye in livre dan son lanmen, bann Madianit ek kanpman antye.”

¹⁵ Koman Zedeon ti'n antann rakont sa rev ek son leksplikasyon, i ti prosternen. Apre, i ti retourn dan kan bann Izraelit. I ti dir, “Leve zot tou! SENYER in livre kan bann Madianit dan zot lanmen.”

¹⁶ Zedeon ti diviz sa 300 zonm dan trwa group I ti donn zot bann tronpet, bann gran potao avek tors ladan.

¹⁷ I ti dir zot, “Zot ava gete kote, e fer parey mwan: Ler mon pou ariv pre avek kan, zot ava fer sa ki mon ava fer.

¹⁸ Ler mwan ek bann zonm ki pou avek mwan, ava sonn tronpet, zot osi, zot ava soufle tronpet partou otour kan e zot ava kriye: Pour SENYER e pour Zedeon.”

¹⁹ Avek sa 100 zonm ki ti avek li, Zedeon ti ariv dan zanviron kan o konmansman vey minwi; ti fek ranplas gard. Zot ti soufle tronpet e kas zot bann potao ki ti dan zot lanmen.

²⁰ Sa trwa group ti soufle tronpet e kas zot gran potao. Zot ti tenir zot tors dan lanmen gos e tronpet dan lanmen drwat. Zot ti kriye, “Lepe pour SENYER e pour Zedeon.”

²¹ Bann zonm ti reste debout dan zot plas otour kan. Tou dimoun dan kan ti konmans taye, kriye e sove.

²² Pandan ki sa 300 zonm ti pe soufle tronpet, SENYER ti fer ki partou dan kan, zot ti tourn zot lepe kont kanmarad. Zot tou, zot ti sove ziska Bet-Sita, dan direksyon Serera, ziska frontyer avek Abel-Mehola, pre avek Tabat.

²³ Alor, tou bann zonm dan Izrael, sorti Neftali, Aser e tou Manase ti ganny mobilize. Zot ti pourswiv bann Madianit.

²⁴ Zedeon ti anvoy bann mesaze partou dan rezyon montanny Efraim. Zot ti dir, “Desann al rankontre bann Madianit e pran bann pwi ziska Bet-Bara, ek Zourden.” Tou bann zonm Efraim ti ganny mobilize; zot ti pran bann pwi ziska Bet-Bara ek Zourden.

²⁵ Zot ti kaptir sa de sef Madianit: Horeb ek Zeeb. Zot ti touy Horeb lo ros Horeb e Zeeb kot preswar diven Zeeb. Apre, zot ti kontiny pourswiv bann Madyann e anmenn latet Horeb ek Zeeb kot Zedeon, lo lot kote larivyer Zourden.