Ziz 6 - Labib An Kreol Seselwa

Zedeon

¹ Bann Izraelit ti fer sa ki ti depler SENYER. SENYER ti livre zot dan lanmen bann Madyanit pandan set an.

² Bann Madyanit ti fer Izrael santi zot pouvwar. Akoz zot, pep Izrael ti al reste dan bann krevas dan montanny, bann lagrot e dan bann presipis.

³ Ler bann Izraelit ti senm zot bann legren, bann Madyanit, bann Amalesit ek bann pep sorti dan Les, ti monte pour atak zot.

⁴ Zot ti kanp pre avek bann Izraelit, detri rekolt pei ziska pre Gaza. Zot pa ti les dan Izrael okenn provizyon manze, ni mouton, ni kabri, ni bef, ni bourik.

⁵ Annefe, zot ti monte avek zot bann troupo, zot bann latant. Zot ti anvai pei parey en lesen sotrel. Zot ti annan en kantite samo; zot ti vin pour ravaz pei.

⁶ Konmsa ki pep Izrael ti ganny afebli en kantite par pep Madyanit. Alor, pep Izrael ti kriy ver SENYER.

⁷ Ler bann Izraelit ti kriy ver SENYER akoz bann Madyanit,

⁸ SENYER ti anvoy zot en profet ki ti dir zot, “La sa ki SENYER Bondye Izrael i deklare: Mon'n fer zot monte depi Lezip e mon'n fer zot sorti dan pei lesklavaz.

⁹ Mon'n delivre zot dan lanmen bann Ezipsyen e dan lanmen tou sa bann ki ti pe maltret zot; mon'n sas zot bann lennmi e mon'n donn zot, zot pei.

¹⁰ Mon ti dir zot: Mwan menm SENYER zot Bondye. Zot pa devre per bann bondye bann Amorit kot zot pe reste. Me zot pa ti ekout mwan.”

Zedeon I Ganny Swazir

¹¹ Mesaze SENYER ti vin asiz anba pye dibwa sakre, Ofra, ki ti pou Yoas, ki sorti dan klan Abiezer. Zedeon, son garson, ti pe bat dible dan preswar kot rezen i ganny kraze. Konmsa, bann Madyanit pa ti war li.

¹² Mesaze SENYER ti aparet avek li. I ti dir li, “SENYER i avek ou, vayan gerye!”

¹³ Zedeon ti dir li, “Eskiz mwan mon senyer. Si SENYER i avek nou, akoz tou sa ki'n ariv nou? Oli tou sa bann mervey ki nou zanset i rakont nou ler zot dir: Pa SENYER ki'n fer nou monte depi Lezip? Aprezan, SENYER in abandonn nou; in livre nou avek Madyann.”

¹⁴ SENYER ti tourn ver li. I ti dir li, “Ale! Avek sa lafors ki ou annan, ou ava sov Izrael dan lanmen Madyann. Mwan ki pe anvoy ou.”

¹⁵ Zedeon ti reponn, “Eskiz mwan Senyer. Koman mon pou delivre Izrael? Mon klan i pli feb dan tribi Manase, e mwan, mon pli zenn dan lafanmir.”

¹⁶ SENYER ti reponn, “Mon pou avek ou e ou pou bat bann Madyanit konmsi zot ti en sel zonm.”

¹⁷ Zedeon ti dir li, “Si vreman mon ganny ou faver, donn mwan en siny pour prouve ki ou menm ki pe koz avek mwan.

¹⁸ Mon demann ou pa ale. Reste la ziska ki mon retourn avek en lofrann ki mon ava depoz devan ou.” SENYER ti dir li, “Mon pou reste la, ziska ki ou retournen.”

¹⁹ Zedeon ti al prepar en zenn kabri; i ti fer bann dipen san lelven avek anviron 30 kilo lafarin. I ti met lavyann dan en pannyen ek lasos dan en po; i ti anmenn tousala kot li anba pye dibwa sakre.

²⁰ Mesaze Bondye ti dir li, “Pran lavyann ek bann dipen san lelven; depoz zot lo sa ros e vers lasos lo la.” Zedeon ti obei.

²¹ Avek baton ki ti dan son lanmen, mesaze SENYER ti tous lavyann ek bann dipen san lelven. En dife ti sorti dan ros e bril sa lavyann ek bann dipen san lelven. Apre, mesaze SENYER ti disparet.

²² Alor, Zedeon ti konpran ki sa ti mesaze SENYER. I ti dir, “Senyer BONDYE! Mon'n war mesaze SENYER fas a fas.”

²³ SENYER ti dir li, “Lape i avek ou! Pa per, ou pa pou mor.”

²⁴ Dan sa landrwa, Zedeon ti konstri en lotel an loner SENYER; i ti apel sa landrwa “SENYER i lape”. Sa lotel i ankor la, dan lavil Ofra kot klan Abiezer.

Zedeon I Detri Lotel Baal

²⁵ Sa menm swar, SENYER ti dir Zedeon, “Pran toro ou papa, sa enn ki'n ne dan dezyenm porte, ki annan set an. Ou ava kraz lotel Baal ki pou ou papa e koup sa poto sakre ki akote.

²⁶ Answit, ou ava konstri en lotel dapre regleman an loner SENYER ou Bondye, lo oter sa landrwa fortifye. Ou ava ofer sa toro 7 an sakrifis konplet lo dibwa sa poto sakre ki ou ava'n koupe.”

²⁷ Zedeon ti pran dis zonm parmi son bann serviter pour fer parey SENYER ti'n dir li. Me, akoz i ti per son fanmir ek bann zabitan lavil, i ti fer sa aswar, olye lizour.

²⁸ Ler zot ti leve boner lannmen bomaten, bann zabitan lavil ti war ki lotel Baal ti'n ganny detri: Poto sakre ki ti akote ti'n ganny koupe; dezyenm toro ti'n ganny ofer en sakrifis konplet lo lotel ki ti'n fek ganny konstri.

²⁹ Zot ti dir antre zot: Lekel ki'n fer sa? Apre enformasyon, e bann resers, zot ti aprann ki Zedeon, garson Yoas ki ti'n fer sa.

³⁰ Bann zabitan lavil ti dir Yoas, “Fer sorti ou garson; i pou ganny touye, i merit lanmor, akoz in demoli lotel Baal e koup poto sakre ki ti akote.”

³¹ Yoas ti reponn tou sa bann ki ti pe debout akote li, “Zot ki pou defann Baal? Zot ki pou sov li? Sa enn ki defann Baal, pou ganny touye avan bomaten. Si Baal i en Bondye, les li pled son ka li menm, akoz son lotel ki'n ganny demoli.”

³² Sa zour, zot ti apel Zedeon: Yeroub-Baal, savedir, “Les Baal pled son ka.” Annefe, Zedeon ki ti'n demoli son lotel.

Kanpanny Kont Madyann

³³ Tou bann Madyanit, bann Amalesit e bann pep ki viv dan Les, ti dakor pour rasanble. Zot ti travers larivyer Zourden e kanp dan laplenn Izrael.

³⁴ Lespri SENYER ti desann lo Zedeon. I ti fer sonn tronpet pour apel bann zonm Abiezer pour swiv li.

³⁵ I ti anvoy bann mesaze partou dan tribi Manase, pour ki li osi, i swiv li. I ti osi anvoy bann mesaze dan bann tribi Aser, Zabilon ek Neftali ki ti monte pour zwenn avek zot.

³⁶ Zedeon ti dir Bondye, “Si, parey ou'n dir, ou, oule servi mwan pour delivre Izrael,

³⁷ mon pou tal en lapo mouton avek son lalenn, la kot zot bat dible; si i annan laroze zis lo lalenn, e ki tou later i reste sek, alor mon ava konnen ki oule servi mwan pour sov Izrael, parey ou'n dir.”

³⁸ Sa ti arive: Lannmen bomaten, i ti lev boner; i ti pers sa lalenn e i ti ganny en bol plen avek delo.

³⁹ Zedeon ti dir Bondye, “Mon demann ou pa ankoler kont mwan; apre sa, mon pa pou koz ankor. Mon anvi fer en lot leksperyans avek sa lalenn: Mon oule ki i reste sek, me ki i ava annan laroze, toultour.”

⁴⁰ Bondye ti fer sa arive aswar: Zis sa lalenn ki ti reste sek; ti annan laroze, toultour.