Ziz 5 - Labib An Kreol Seselwa

Kantik Debora

¹ Sa zour, Debora ek Barak, garson Abinoanm, ti sant sa kantik:

² Loue SENYER! Izrael i delarg son seve, avek determinasyon pare pour al lager.

³ Bann lerwa! Ekoute. Bann sef! Ouver zot zorey. Mon oule sant pour SENYER. Mon oule sant en psonm pour SENYER, Bondye Izrael.

⁴ SENYER! Ler ou ti sorti Seir, ler ou ti marse depi rezyon Edonm, later ti tranble, lapli ti tonbe, bann nyaz ti devers delo,

⁵ bann montanny ti afese devan SENYER; sa ti montanny Sinai, devan SENYER, Bondye Izrael.

⁶ Dan lepok Sanmgar, garson Anat, dan letan Yael, karavann ti nepli pase. Vwayazer ti pran bann pti semen.

⁷ Bann vilaz ti'n ganny abandonnen; zot ti'n ganny abandonnen dan Izrael ziska ki ou, Debora, ou ti leve. Ziska ki ou ti leve dan Izrael, parey en manman.

⁸ Ler zot ti swazir bann nouvo bondye, lager ti devan laport lavil. Pa ti annan ni boukliye ni lans pour 40,000 zonm dan Izrael.

⁹ Beni SENYER! Mon leker i tourn ver bann komandan dan Izrael; ver sa bann ki parmi lepep, ki port zot volonter.

¹⁰ Zot ki mont bann femel bourik blan, zot ki asiz lo bann tapi e ki marse dan semen, reflesi!

¹¹ Pre bann pwi, bann ki anmenn delo, zot rakont bann aksyon pour lazistis ki SENYER in fer koman sef Izrael. Alor, pep SENYER in desann ziska kot laport bann lavil.

¹² Debora! Leve, leve. Leve! Leve! Sant en kantik. Barak! Leve. Ranmenn ou bann kaptif, bann garson Abinoanm.

¹³ Alor, bann sirvivan ti desann ver bann sef; pep SENYER ti desann pour mwan parmi bann ero.

¹⁴ Depi Efraim, desandan bann Amalesit ti desann dan vale; Benzamen ti desann deryer ou parmi ou pep. Bann komandan ti desann depi Makir; bann ki tenir baton sef ti desann depi Zabilon.

¹⁵ Bann sef dan Isakar i avek Debora. Isakar i fidel anver Barak; zot ti ganny anvoye lo son pa, dan vale. Dan bann klan Riben bann gran desizyon ti ganny pran.

¹⁶ Akoz ou ti reste ant bann park pour ekout bann berze sifle? Dan bann klan Riben, bann gran desizyon ti ganny pran.

¹⁷ Galaad ti reste lo lot kote larivyer Zourden. Akoz Dann i reste pre avek bann bato? Aser in asiz obor lanmer i reste pre son bann por.

¹⁸ Zabilon i en pep ki'n afront lanmor; Neftali osi depi dan leo bann lakanpanny.

¹⁹ Bann lerwa ti vini; zot ti konbat. Apre, zot ti konbat bann lerwa Kanaan; dan lavil Taanak, ki pros avek bann sours Megido, zot pa ti tous okenn larzan piyaz lager.

²⁰ Bann zetwal dan lesyel ti konbat; depi zot larout, zot in konbat kont Sisera.

²¹ Larivyer Kisonn ti balye zot, sa larivyer antik, larivyer Kisonn! Mon kraz zot avek lafors.

²² Alor bann sabo bann seval ti pil later; zot ti arete galope.

²³ Modi lavil Meroz. Modi, modi son bann zabitan. Zot pa'n vin osekour SENYER, osekour SENYER, parmi bann ero.

²⁴ Yael, fanm Heber sa Kenit, i ganny beni parmi bann fanm, i ganny beni parmi bann fanm ki viv anba latant.

²⁵ I ti demann delo; Yael ti donn li dile. I ti prezant li dile fermante dan en bol rwayal.

²⁶ I ti pran pike latant avek en lanmen, e marto travayer avek lanmen drwat; i ti ansonm Sisera e kraz son latet; i ti kraz li e transpers son latanp.

²⁷ I ti afese devan li; i ti tonbe, i ti tale ater. I ti afese devan li; i ti tonbe. I ti tonbe, red mor, la kot i ti afese.

²⁸ Depi lafnet i bese e i get anba; manman Sisera i get atraver griyaz: Akoz son kales lager i tarde arive? Akoz son kales lager pa roul vit?

²⁹ Parmi son bann prenses, sa enn ki pli saz i reponn:

³⁰ Pa zot in dekouver en piyaz lager ki zot pe partaze? En fiy, de fiy pour en gerye; bann lenz kouler pour Sisera; bann lenz kouler, brode; en lenz kouler, de lenz brode pour likou bann prizonnyen.

³¹ SENYER! Fer ou bann lennmi disparet parey. Fer ou bann zanmi vin parey soley ler i leve dan tou son pwisans. E pei ti dan lape pandan 40 an.