Ziz 4 - Labib An Kreol Seselwa

Debora ek Barak

¹ Apre lanmor Ehoud, bann Izraelit ti rekonmans fer sa ki pa ti fer plezir SENYER.

² Alor, SENYER ti vann zot avek Yavin, lerwa Kanaan, ki ti renny Asor. Sisera ti son sef larme. I ti pe reste Haroset-Goim.

³ Pep Izrael ti kriy ver SENYER, akoz Sisera ti annan 900 kales lager an fer e depi 20 an, i ti pe maltret bann Izraelit.

⁴ Dan sa lepok, profetes Debora, fanm Lapidot ki ti ziz dan Izrael.

⁵ I ti syez anba en pye palm ki ti ant Rama ek Betel, dan rezyon montanny Efraim. Bann Izraelit ti mont kot li pour li rann zizman lo zot bann dispit.

⁶ I ti fer apel Barak, garson Abinoanm, ki sorti Kedes-Neftali. I ti dir li, “SENYER, Bondye Izrael in donn ou sa lord: Ale! Al dan direksyon montanny Tabor. Pran avek ou 10,000 zonm sorti dan tribi Neftali e dan tribi Zabilon.

⁷ Mon ava fer Sisera, zeneral larme Yabin, vin kot ou kot larivyer Kisonn, avek son bann kales lager ek son bann troup. Alor, mon ava livre li dan ou lanmen.”

⁸ Barak ti dir li, “Si ou vin avek mwan, mon ava ale; me si ou pa vin avek mwan, mon pa pou ale.”

⁹ Debora ti reponn, “Mon pou vin avek ou. Me lo sa semen kot ou pe ale, pa ou ki pou ganny laglwar. Annefe, SENYER in livre Sisera dan lanmen en fanm.” Alor, Debora ti al avek Barak dan lavil Kedes.

¹⁰ Barak ti konvok Zabilon ek Neftali dan lavil Kedes. 10,000 zonm ti swiv li; Debora osi ti mont avek li.

¹¹ Heber, en Kenit ki ti'n separe avek Kaen, bann desandan Hobab, boper Moiz, ti'n vin kanp Tsanaim ki pre avek Kedes.

¹² Sisera ti ganny enformen ki Barak, garson Abinoanm ti'n mont ziska montanny Tabor.

¹³ Depi Haroset-Goim, Sisera ti fer tou son bann kales lager an fer ek tou son larme ki ti avek li, mont pre larivyer Kisonn.

¹⁴ Debora ti dir Barak, “Leve! Ozordi SENYER in livre Sisera dan ou lanmen. Vreman! SENYER pe mars devan ou.” Barak ti desann depi montanny Tabor avek 10,000 zonm deryer li.

¹⁵ Alor, devan Barak, SENYER ti fer Sisera panike, li, avek tou son bann kales lager ek tou son larme. I ti masakre zot tou. Sisera ti desann depi son kales lager e sove apye.

¹⁶ Barak ti pourswiv bann kales lager ek larme ziska Haroset-Goim; tou larme Sisera ti ganny masakre. Pa ti reste en sel zonm.

¹⁷ Sisera ti sov apye dan direksyon latant Yael, fanm Heber, sa Kenit. Annefe, lape ti rennyen ant Yabin, lerwa Hasor ek klan Heber, sa Kenit.

¹⁸ Yael ti sorti pour vin rankontre Sisera. I ti dir li, “Antre, mon senyer, antre kot mwan; pa bezwen per.” Sisera ti antre kot li, anba son latant e i ti met en kouvertir lo li.

¹⁹ I ti dir li, “Silvouple, donn mwan en pe delo; mon swaf.” Yael ti ouver resipyan ki met dile ladan; i ti donn li pour bwar; apre, i ti ferm sa resipyan.

²⁰ I ti dir li, “Al met ou devan lantre latant. Si en dimoun i vini e i demann ou: I annan dimoun isi? Ou ava reponn: Non.”

²¹ Sisera ti telman fatige, ki i ti dormi dan en profon sonmey. Alor, Yael, fanm Heber, ti pran en pike latant, sezi en marto, apros dousman avek li e anfons sa pike dan son latanp e sa pike ti fini dan later. Sisera ti mor.

²² Letan Barak ti pe pourswiv Sisera, Yael ti sorti pour rankontre li. I ti dir li, “Vini! Mon ava montre ou sa zonm ki ou pe rode.” I ti antre kot li; Sisera ti'n tale, mor, en pike dan son latanp.

²³ Sa zour, Bondye ti imilye Yavin, lerwa Kanaan, devan pep Izrael.

²⁴ Lapwisans pep Izrael ti vin deplizanpli gran kont Yavin, lerwa Kanaan, ziska ki zot ti touy Yavin, lerwa Kanaan.