Ziz 3 - Labib An Kreol Seselwa

Bann Nasyon ki ti Reste dan Pei

¹ SENYER ti les trankil sa bann nasyon pour ki atraver zot, i ava teste pep Izrael ki pa ti'n konn leksperyans lager dan Kanaan;

² sa ti zis pou ki bann zenerasyon Izraelit i konnen e aprann kisisa lager, omwen pour sa bann ki pa ti'n ankor fer sa leksperyans:

³ Sa senk sef bann Filisten, tou bann Kananeen, bann Sidonit, bann Hivit ki ti pe reste dan rezyon montanny Liban, depi montanny Baal-Hermon ziska Lebo-Hamat.

⁴ I ti fer sa, pour teste bann Izraelit, pour konnen si Izrael ti pour obei bann komannman ki SENYER ti'n ordonn zot bann zanset, par lentermedyer Moiz.

⁵ Pep Izrael ti reste parmi bann Kananeen, Hitit, Amorit, Perizit, Hivit ek Zebizit.

⁶ Zot ti marye avek zot bann fiy e marye zot fiy avek zot bann garson; zot ti servi zot bann bondye.

Otniel

⁷ Pep Izrael ti fer sa ki depler SENYER: Zot ti oubliy SENYER zot Bondye pour al ador bann Baal ek bann Asera.

⁸ SENYER ti ankoler kont zot. I ti vann zot avek Kousann-Riseataim, lerwa Mezopotami. Bann Izraelit ti servi zot anba dominasyon Kousann-Riseataim pandan wit an.

⁹ Pep Izrael ti kriy ver SENYER; SENYER ti swazir en sover ki ti delivre zot. Sa ti Otniel, garson Kenaz, pti zanfan Kaleb.

¹⁰ Lespri SENYER ti desann li e i ti vin ziz pep Izrael. I ti al lager e SENYER ti donn li laviktwar lo Kousann-Riseataim, lerwa Mezopotami. I ti fer santi son pouvwar kont Kousann-Riseataim.

¹¹ Pei ti reste dan lape pandan 40 an. Apre, Otniel, garson Kenaz ti mor.

Ehoud

¹² Pep Izrael ti rekonmans fer bann aksyon ki ti depler SENYER. Akoz Izrael ti pe mal fer, SENYER ti ankouraz Eglonn, lerwa Moab, pour azir kont zot.

¹³ Eglonn ti fer lalyans avek bann Amonit ek bann Amalesit e i ti sorti pour atak Izrael. I ti kaptir lavil bann Palmye.

¹⁴ Bann Izraelit ti soumet anba dominasyon Eglonn, lerwa Moab pandan 18 an.

¹⁵ Pep Izrael ti kriy ver SENYER; SENYER ti anvoy en sover pour delivre zot: Ehoud, garson Gera, en Benzamit. I ti gose. Bann Izraelit ti anvoy Ehoud anmenn en kado pour Eglonn, lerwa Moab.

¹⁶ Ehoud ti fabrik en lepe ki koup de kote, 50 santimet longer. I ti atas sa lepe anba son lenz, kot son kote drwat.

¹⁷ Alor, i ti prezant Eglonn, lerwa Moab, son kado. Eglonn ti en zonm byen gra.

¹⁸ Apre ki i ti'n prezant kado, Ehoud ti ale avek bann zonm ki ti'n anmenn sa kado.

¹⁹ Me ler i ti ariv pre avek bann stati bann zidol ki ti pre Gilgal, i ti retournen. I ti dir, “Mon rwa! Mon annan en mesaz prive pour ou.” Lerwa ti dir, “Silans!” Tou son lantouraz ti sorti.

²⁰ Ehoud ti avans ver lerwa kot i ti pe asiz dan lasanm fre rezerve pour li dan letaz. Ehoud ti dir li, “Mon annan en parol sorti kot Bondye pour ou.” Lerwa ti leve dan son fotey.

²¹ Avek son lanmen gos, Ehoud ti ris lepe ki ti lo son kote drwat e anfons li dan vant lerwa.

²² Pwannyen lepe avek son lanm ti antre net; lagres ti referm lo sa lanm. Annefe, Ehoud pa ti tir lepe dan vant lerwa.

²³ Ehoud ti tak bann laport lasanm. Apre i ti sorti par deryer.

²⁴ Kan Ehoud ti'n sorti, bann serviter ti vin gete. Zot ti konstate ki bann laport bann lasanm ti'n take. Zot ti dir, “San dout ki lerwa pe satisfer en bezwen natirel dan lasanm fre.”

²⁵ Zot ti esper en bon pe letan. Lerwa pa ti ouver bann laport lasanm. Alor, zot ti pran lakle, ouver bann laport. Zot met ti'n tale ater, mor.

²⁶ Pandan sa letan, Ehoud ti'n sape; i ti'n fini depas bann Stati e i ti sov dan direksyon Seira.

²⁷ Koman i ti arive, i ti sonn tronpet dan rezyon montanny Efraim; bann Izraelit ti desann sorti dan rezyon montanny, avek li devan.

²⁸ I ti dir zot, “Swiv mwan! SENYER in livre zot bann lennmi, bann Moabit, dan zot lanmen.” Zot ti desann deryer li, travers larivyer Zourden vizavi Moab; zot pa ti les personn pase.

²⁹ Dan sa letan, zot ti bat anviron 10,000 zonm Moabit byen nouri e vayan; zot pa ti les personn sape.

³⁰ Sa zour, Moab ti ganny imilye dan lanmen Izrael e pei ti reste anpe pandan 80 an.

Sanmgar

³¹ Apre Ehoud, ti vin Sanmgar, garson Anat. I ti bat 600 zonm Filisten avek son sagay. Li osi, i ti delivre Izrael.