Ziz 21 - Labib An Kreol Seselwa

Tribi Benzamen I Ganny Rekonnet

¹ Bann Izraelit ti'n fer sa serman dan lavil Mispa: Personn parmi nou pa pou les son fiy marye avek en Benzamit.

² Lepep ti al Betel kot zot ti reste asiz devan Bondye, ziska aswar. Zot ti sanglote e plere asodlarm. Zot ti dir,

³ “SENYER Bondye! Akoz en tel maler in ariv dan Izrael? Akoz ozordi i mank en tribi dan Izrael?”

⁴ Lannmen, lepep ti lev granmaten; zot ti konstri en lotel e ofer sakrifis konplet ek sakrifis lape.

⁵ Bann Izraelit ti dir: Lekel parmi tou bann tribi Izrael ki pa'n mont dan lasanble devan SENYER? Annefe, dan serman solannel ki zot ti fer Mispa, zot ti dir ki sa enn ki pa ankor mont kot SENYER ava ganny touye.

⁶ Me bann Izraelit ti pran pitye pour Benzamen, zot frer. Zot ti pe dir: Ozordi, en tribi in ganny ekskli dan Izrael.

⁷ Ki fodre nou fer pour sa bann fanm ki ankor vivan, akoz nou ti'n fer serman lo non SENYER pour pa les zot marye avek nou bann fiy.

⁸ Alor zot ti dir, “Eski i annan, parmi bann Izraelit, en dimoun ki pa'n mont ver SENYER dan Mispa?” Zot ti dekouver ki okenn zabitan Yabes dan Galaad pa ti'n vin dan kan, pandan rasanbleman.

⁹ Ler pep Izrael ti ganny resanse, ti napa okenn zabitan Yabes dan Galaad.

¹⁰ Alor, lakominote ti anvoy laba 12,000 zonm vayan avek sa lord, “Ale! Al masakre tou bann zabitan Yabes dan Galaad, bann fanm avek tou zot fanmir.

¹¹ La sa ki zot ava fer: Zot ava detri tou zonm ek tou fanm ki'n dormi avek en zonm.”

¹² Parmi bann zabitan Yabes dan Galaad, zot ti dekouver 400 zenn fiy vyerz ki pa ti'n zanmen ganny relasyon seksyel avek en zonm. Zot ti ganny anmenn dan kan Silo, dan Kanaan.

¹³ Lakominote antye ti anvoy bann mesaze pour koz avek bann Benzamit ki ti kot ros Rimonn, pour propoz zot lape.

¹⁴ Alor, bann Benzamit ti retournen e zot ti ganny bann fanm zabitan Yabes dan Galaad ki pa ti'n ganny eparnyen. Me pa ti annan ase fanm pour zot.

¹⁵ Lepep ti pran pitye pour bann Benzamit, akoz SENYER ti'n fer en separasyon parmi bann tribi Izrael.

¹⁶ Bann ansyen dan lakominote ti dir, “Konsernan bann fanm, ki fodre nou fer, akoz bann fanm Benzamit in ganny masakre?”

¹⁷ Zot ti dir, “Pour ki en tribi pa ganny efase dan Izrael, bann Benzamit ki reste vivan, ava kapab gard sa ki zot annan.

¹⁸ Me nou, nou pa kapab donn zot nou bann fiy.” Akoz bann Izraelit in fer en serman ki dir: Sa enn ki donn son fiy en Benzamit ava ganny modi.

¹⁹ Alor zot ti dir, “Toulezan, i annan en lafet an loner SENYER dan Silo, ki sitye Nor avek Betel, Les avek semen ki mont Betel e Sid avek Lebona.”

²⁰ Apre, zot ti donn sa lord bann Benzamit, “Al kasyet dan bann plantasyon rezen.

²¹ Zot ava obzerve, ler bann fiy Silo ava sorti pour dans zot laronn, zot ava sorti dan bann plantasyon. Sakenn zot ava sezi en fanm parmi bann fiy ki sorti Silo; apre, zot ava retourn dan pei bann Benzamit.

²² Si zot papa oubyen zot frer i vin plenny avek nou, nou ava dir zot: Esey konpran zot. Dan lager, nou pa ti pran en fanm pour sakenn zot. Pa zot ki'n donn zot en zonm; zot pa pou koupab.”

²³ La sa ki bann Benzamit ti fer: Zot ti pran ase fanm parmi bann dansez e anmenn zot koman otaz. Apre, zot ti retourn dan zot teritwar. Zot ti rekonstri bann lavil kot zot ti al reste.

²⁴ Dan sa lepok, bann Izraelit ti kit sa landrwa e sakenn ti al dan son tribi e dan son klan. Sakenn ti al dan son teritwar.

²⁵ Dan sa lepok, ti napa lerwa dan Izrael. Sakenn ti fer sa ki i ti oule.