Ziz 11 - Labib An Kreol Seselwa

Zefte I Vin Ziz

¹ Zefte, sorti Galaad, ti en vayan gerye. I ti garson en prostitye. Son papa ti apel Galaad.

² Fanm Galaad ti osi ganny bann garson pour li. Ler zot ti'n vin gran, bann garson sa fanm ti sas Zefte. Zot ti dir li, “Ou pa pou ganny okenn par dan posesyon nou papa, akoz ou zanfan en lot fanm.”

³ Zefte ti sove lwen avek son bann frer. I ti al enstal li dan pei Tob. Bann bandi ti asosye zot avek Zefte. Ansanm, zot ti fer bann latak.

⁴ Apre enserten letan, bann Amonit ti al atak Izrael.

⁵ Akoz bann Amonit ti pe lager kont Izrael, bann ansyen dan Galaad ti al rod Zefte dan pei Tob.

⁶ Zot ti dir Zefte, “Vini! Ou ava vin nou sef e nou ava al konbat kont bann Amonit.”

⁷ Zefte ti dir bann ansyen sorti Galaad, “Pa zot menm ki ti ay mwan e sas mwan dan lakaz mon papa? Aprezan, zot vin rod mwan ler zot dan maler?”

⁸ Bann ansyen sorti Galaad ti dir Zefte, “Si nou'n retourn kot ou aprezan, se pour ki ou vin konbat avek nou kont bann Amonit e vin nou sef e sef tou bann zabitan Galaad.”

⁹ Zefte ti reponn bann ansyen sorti Galaad, “Si mon retourn avek zot pour lager kont bann Amonit e si SENYER i donn mwan laviktwar, mon pou vin zot sef.”

¹⁰ Bann ansyen dan Galaad ti dir Zefte, “SENYER ava temwen antre nou si nou pa azir parey ou'n dir.”

¹¹ Konmsa ki Zefte ti al avek bann ansyen sorti Galaad. Lepep ti pran li koman zot sef e zot komandan. Zefte ti repet tou sa bann parol devan SENYER, dan Mispa.

Diskisyon avek bann Amonit

¹² Zefte ti anvoy bann mesaze kot lerwa bann Amonit, pour demann li, “Ki mon'n fer ou pour ki ou vin atak mon pei?”

¹³ Lerwa bann Amonit ti reponn bann mesaze Zefte, “Sa i akoz ler i ti sorti Lezip, Izrael ti pran mon pei, depi Arnon ziska Yabok ek ziska larivyer Zourden. Aprezan, rann mwan sa pei e annou fer lape.”

¹⁴ Zefte ti anvoy ankor bann mesaze kot lerwa bann Amonit,

¹⁵ pour dir zot dan son plas, “La sa ki Zefte i dir: Izrael pa'n pran pei bann Moabit ni pei bann Amonit.

¹⁶ Annefe, ler Izrael ti sorti Lezip, i ti mars dan dezer ziska lanmer Rouz e i ti ariv Kades.

¹⁷ Depi la, Izrael ti anvoy bann mesaze kot lerwa Edonm pou dir li: Mon demann ou les mwan travers ou pei. Me lerwa Edonm pa ti oule antann nanryen. Izrael ti osi anvoy bann mesaze kot lerwa Moab ki ti osi refize. Alor, Izrael ti reste Kades.

¹⁸ Apre, Izrael ti kontinyen mars dan dezer; i ti kontourn pei Edonm ek pei Moab, e zot ti ariv lo kote Les pei Moab. Zot ki kanp lo lot kote larivyer Arnon, san antre dan teritwar Moab. Annefe, larivyer Arnon i lo frontyer avek Moab.

¹⁹ Izrael ti anvoy bann mesaze kot Sionn, lerwa bann Amonit, lerwa bann Hesbonit. Izrael ti dir li: Les nou travers ou pei pour nou ariv dan nou pei.

²⁰ Me Sionn pa ti annan konfyans dan bann Izraelit pour les zot travers son teritwar. I ti rasanble tou son bann troup e dres son kan Yatsa, pour li atak Izrael.

²¹ SENYER, Bondye Izrael ti livre Sionn ek tou son pep dan lanmen bann Izraelit. Izrael ti ranport laviktwar e

²² pran posesyon pei bann Amonit antye, depi larivyer Arnon ziska Yabok, depi dezer ziska larivyer Zourden.

²³ Aprezan ki SENYER, Bondye Izrael in deposed bann Amonit devan Izrael, son pep, ou ki pou vin sas li?

²⁴ Pa ou annan pei ki Kemos, ou bondye in donn ou? Akoz nou, nou pa pou gard posesyon tou sa ki SENYER nou Bondye in donn nou?

²⁵ Eski ou plis ki Balak, garson Sipor, lerwa Moab? Eski i oule konbat kont Izrael? Pa li, ki'n deklar lager.

²⁶ I fer 300 an depi ki Izrael pe reste Hesbonn, Aroer e dan lezot vilaz al antour, dan bann lavil ki obor larivyer Arnon. Akoz ou pa ti repran sa pei avan?

²⁷ Mwan, mon pa'n fer ou okenn ditor; ou ki'n mal azir anver mwan e ou'n vin atak mwan. SENYER ki Ziz. Ozordi, i ava vin ziz ant bann Izraelit ek bann Amonit.”

²⁸ Me lerwa bann Amonit pa ti ekout sa ki Zefte ti'n dir.

Zefte I Fer En Ve

²⁹ Lespri SENYER ti lo Zefte. Zefte ti travers Galaad ek Manase e pas Mispa dan Galaad; sorti Mispa dan Galaad, i ti pas kot bann Amonit.

³⁰ Zefte ti fer en ve avek SENYER. I ti dir, “Si vreman ou livre mwan bann Amonit,

³¹ si mon retournen apre laviktwar kont zot, sa premye dimoun ki ava sorti dan mon lakaz pour akeyir mwan, ava pour SENYER; mon ava ofer li koman en sakrifis konplet.”

³² Zefte ti travers frontyer e pas kot bann Amonit pour li atak zot. SENYER ti livre zot dan son lanmen.

³³ I ti flank zot en bon bate depi Aroer ziska pre avek Minit, an tou 20 lavil, e ziska Abel-Keramim. Bann Amonit ti ganny imilye devan bann Izraelit.

³⁴ Ler Zefte ti pe retourn kot li Mispa, son fiy ti sorti pour rankontre li avek bann tanbouren ek ladans. Sa fiy ti son sel zanfan. Apard li, Zefte ti napa okenn garson ni fiy.

³⁵ Koman Zefte ti war li, i ti desir son lenz. I ti dir, “Mon fiy! Ou met mwan dan dezespwar. Ou osi, ou fer maler tonm lo mwan. Mon'n angaz mwan devan SENYER e mon pa kapab retourn annaryer.”

³⁶ I ti dir li, “Papa, si ou'n angaz ou devan SENYER, azir anver mwan dapre promes ki ou'n fer, aprezan ki SENYER in tir vanzans lo ou lennmi, bann Amonit.”

³⁷ I ti dir ankor avek son papa, “Mon demann ou en faver: Les mwan al marse pandan de mwan dan bann montanny pour mwan pler mon virzinite avek mon bann zanmi.”

³⁸ Son papa ti dir li, “Ale.” I ti les li ale pour de mwan. I ti al dan bann montanny avek son bann zanmi e pler son virzinite.

³⁹ Apre de mwan, i ti retourn kot son papa ki ti akonpli son ve ki i ti'n fer. I pa ti ankor konn okenn zonm. Sa ti vin en koutim dan Izrael:

⁴⁰ Toulezan, pandan kat zour, bann zenn fiy dan Izrael, zot al selebre fiy Zefte ki sorti Galaad.