Ziz 10 - Labib An Kreol Seselwa

Tola I Vin Ziz

¹ Apre Abimelek, Tola, garson Poua, garson Dodo, sorti dan tribi Isakar, ti leve pour sov Izrael. I ti reste Samir, dan rezyon montanny Efraim.

² I ti ziz dan Izrael pandan 23 an. Apre son lanmor, i ti ganny antere Samir.

Yair I Vin Ziz

³ Apre Tola, Yair, sorti Galaad, ti vin ziz dan Izrael pandan 22 an.

⁴ I ti annan 30 garson ki ti mont 30 bourik e zot ti posed 30 lavil; ziska ozordi, sa bann lavil i ganny nonmen vilaz Yair, dan Galaad.

⁵ Ler Yair ti mor, i ti ganny antere Kamonn.

Bann Amonit I Atak Izrael

⁶ Bann Izraelit ti rekonmans fer sa ki depler SENYER: Zot ti al servi bann Baal ek bann Astarte, bondye bann Arameen, bann Sidonit, bann Moabit, bann Amonit e bann Filisten. Zot ti abandonn SENYER e aret servi li.

⁷ SENYER ti ankoler kont Izrael. I ti livre zot dan lanmen bann Filisten ek bann Amonit,

⁸ ki ti maltret e kraz bann Izraelit. Bann Izraelit ki ti reste Les avek larivyer Zourden, dan pei bann Amonit, dan Galaad ti ganny maltrete pandan 18 an.

⁹ Bann Amonit ti travers larivyer Zourden pour al atak Zida, Benzamen ek tribi Efraim. Izrael ti dan en gran detres.

¹⁰ Alor, pep Izrael ti kriy ver SENYER, “Nou'n fer pese kont ou, akoz nou'n abandonn nou Bondye pour al ador bann Baal.”

¹¹ SENYER ti dir bann Izraelit, “Ezipsyen, Amorit, desandan Amonn, Filisten,

¹² Sidonit, Amalesit ek Meounit in kraz zot. Ler zot ti kriy ver mwan, pa mon ti delivre zot dan zot lanmen?

¹³ Me zot, zot in abandonn mwan e zot in al servi lezot bondye. Pour sa rezon, mon pa pou delivre zot ankor.

¹⁴ Ale! Al kriy avek sa bann bondye ki zot in swazir. Dir zot vin sov zot dan zot detres.”

¹⁵ Bann Izraelit ti dir SENYER, “Nou'n fer pese; tret nou koman i fer ou plezir. Me nou demann ou delivre nou ozordi.”

¹⁶ Bann Izraelit ti debaras zot avek bann bondye etranze parmi zot e konmans servi SENYER ki ti pran pitye pour soufrans pep Izrael.

¹⁷ Bann Amonit ti ganny konvoke. Zot ti al kanp dan Galaad. Bann Izraelit ti rasanble e al kanp Mispa.

¹⁸ Lepep e bann sef Galaad ti dir antre zot “Lekel sa zonm ki pou atak bann Amonit an premye? Sa zonm, ava vin sef bann zabitan Galaad.”