Ziz 1 - Labib An Kreol Seselwa

Izrael I Enstal li dan Kanaan

¹ Apre lanmor Zozye, pep Izrael ti al konsilte SENYER. Zot ti demande “Lekel parmi nou ki pou al an premye, konbat bann Kananeen?” SENYER ti dir,

² “Zida ki pou monte. Mon'n livre pei dan son lanmen.”

³ Bann zonm tribi Zida ti dir avek bann zonm tribi Simeon, “Vin avek nou pour pran dan porsyon pei ki nou'n ganny an partaz, e nou ava konbat bann Kananeen. Apre, nou osi, nou ava al avek zot pour pran teritwar ki zot in gannyen.” Alor, bann zonm dan tribi Simeon ti al avek bann zonm, tribi Zida.

⁴ Bann zonm Zida ti monte pour atake e SENYER ti livre bann kananeen ek bann Perizit dan zot lanmen. Zot ti ganny laviktwar dan lavil Bezek: Ti annan an tou 10,000 zonm.

⁵ Dan lavil Bezek, zot ti rankontre Adoni-Bezek ki zot ti atake. Konmsa, zot ti ganny laviktwar lo bann Kananeen ek bann Perizit.

⁶ Adoni-Bezek ti sove, me zot ti pourswiv li; e ler zot ti atrap li, zot ti koup son pous lanmen ek lipye.

⁷ Adoni-Bezek ti dir, “70 lerwa ki ti'n ganny pous lanmen ek lipye koupe ti vin ranmas restan manze anba mon latab. Sa ki mon'n fer, Bondye in rann mwan laparey.” I ti ganny anmennen Zerizalenm kot i ti mor.

Tribi Zida I Pran Zerizalenm ek Hebron

⁸ Bann zonm tribi Zida ti atak Zerizalenm ki zot ti pran. Zot ti masakre bann zabitan e met dife dan lavil.

⁹ Apre, bann zonm tribi Zida ti al atak bann Kananeen ki ti pe reste dan rezyon montanny, dan Negev ek dan laplenn.

¹⁰ Zida ti al atak bann Kananeen ki ti pe reste Hebron, ki avan, ti apel Kiryat-Arba. Zot ti bat Sesai, Ahimann ek Talmai.

¹¹ Depi la, bann zonm Zida ti mars kont bann zabitan Devir ki avan, ti apel Kiryat-Sefer.

¹² Kaleb ti dir, “Mon pou donn mon fiy Aksa, sa enn ki atak e pran lavil Kiryat-Sefer.”

¹³ Otniel, garson Kenaz, pti frer Kaleb ki ti pran sa lavil e Kaleb ti donn li son fiy Aksa koman son fanm.

¹⁴ Kan Aksa ti ariv kot Kenaz, i ti fer li demann son papa en morso later. I ti desann lo son bourik. Kaleb ti demann li, “Ki ou anvi?”

¹⁵ I ti dir, “Akord mwan en faver. Ou'n deza fer mwan kado en morso later dan Negev; donn mwan osi bann rezervwar delo.” Alor Kaleb ti donn li Gilot Leo e Gilot Leba.

¹⁶ Bann desandan bann Kenit, boper Moiz, ek bann zanfan Zida, ti kit lavil bann Palmye ki dan dezer Negev, Sid avek Arad, pour zot vin reste parmi lepep.

¹⁷ Avek bann zonm Simeon son frer, bann zonm Zida ti atak bann Kananeen ki ti pe reste dan lavil Sefat ki zot ti detri konpletman. Alor, zot ti apel sa lavil Horma.

¹⁸ Bann zonm Zida ti osi kaptir lavil Gaza avek tou son teritwar: Gaza, Askelonn, Ekronn, sakenn avek son teritwar.

¹⁹ SENYER ti avek Zida ki ti pran posesyon rezyon montanny; me zot pa ti kapab deposed bann zabitan rezyon laplenn, akoz ti annan tro bokou kales lager an fer.

²⁰ Parey Moiz ti'n ordonnen, Kaleb ti ganny lavil Hebron. I ti sas sa trwa garson Anak.

²¹ Me bann Benzamit pa ti kapab sas bann Zebizit ki ti pe reste Zerizalenm. Pour sa rezon ki ziska ozordi, bann Zebizit in reste Zerizalenm avek bann Benzamit.

²² Tribi Zozef osi ti al atak Betel e SENYER ti avek zot.

²³ Tribi Zozef ti anvoy bann zonm pour eksplor Betel, ki avan, ti apel Louz.

²⁴ Zot ti war en zonm sorti dan lavil. Zot ti dir li, “Montre nou semen pour antre dan lavil e nou pa pou fer ou ditor.”

²⁵ I ti montre zot kote pour antre dan lavil. Zot ti masakre tou bann zabitan, me zot ti les sa zonm ale avek tou son fanmir.

²⁶ Sa zonm ti al dan pei bann Hitit kot i ti konstri en lavil ki ankor la, ozordi; i apel Louz.

²⁷ Tribi Manase pa ti kaptir ni Bet-Seann, ni Taanak, ni bann zabitan Dor, ni bann zabitan Megido avek zot bann vilaz.

²⁸ Me ler Izrael ti vin pwisan, i ti enpoz travoforse lo bann Kananeen; me an realite, i pa ti kapab sas zot.

²⁹ Tribi Efraim pa ti sas bann Kananeen ki ti pe reste Gezer e ki ti kontinyen reste parmi zot dan Gezer.

³⁰ Tribi Zabilon pa ti sas bann zabitan Kitronn ek Nahalol. Bann Kananeen ti reste parmi zot; me zot ti ganny oblize fer travoforse.

³¹ Tribi Aser pa ti sas bann zabitan Ako, ek Sidon, Alab, Elba, Afik ek Reob.

³² Bann Aserit ti enstal zot parmi bann Kananeen ki ti pe reste dan sa pei, akoz zot pa ti'n ganny sase.

³³ Neftali pa ti sas ni bann zabitan Bet-Semes, ni bann zabitan Bet-Anat. Zot ti enstal zot parmi bann Kananeen ki ti pe reste dan sa pei kot zot pa ti'n ganny sase.

³⁴ Bann Amorit ti repous tribi Dann dan rezyon montanny; zot pa ti les li desann dan laplenn.

³⁵ Bann Amorit ti kontinyen reste Har-Heres, Ayalonn ek Saalbim; me zot ti ganny met anba travoforse kan tribi Zozef ti vin pwisan.

³⁶ Teritwar bann Amorit ti al depi lamonte Akrabim, depi Sela an montan.