Zeremi 6 - Labib An Kreol Seselwa

Lennmi I Anserkle Zerizalenm

¹ Zabitan tribi Benzamen! Sove! Kit Zerizalenm! Al rod proteksyon dan en lot landrwa. Sonn tronpet dan Tekoa; donn lavertisman dan Bet-Kerenm, akoz maler ek gran dezas pe arive sorti dan Nor.

² Siyon! Ou zoli e byen delika! Me mon pe al detri ou.

³ Bann berze pe arive avek zot troupo. Sakenn pou pik son latant toultour li, sakenn i donn manze bann mouton.

⁴ Zot kriye: Debout! Annou prepar nou pour atak Zerizalenm! Annou atak li dan milye lazournen! Me, apre zot pou dir: Domaz! Labrin e fernwanr pe fer. Lazournen pe fini.

⁵ Annou atak li dan lannwit. Annou detri son bann pale.

En Lavertisman Solannel

⁶ La sa ki SENYER liniver i deklare: Koup pye dibwa pour fer en baraz kont Zerizalenm. Sa lavil i bezwen ganny pini, akoz i ranpli avek vyolans.

⁷ Son mesanste i parey en sours ki kontinyen koule. Ou antann koz zis vyolans ek destriksyon. Partou, ou war zis blesir ek soufrans.

⁸ Pep Zerizalenm! Aksepte koreksyon. Sankwa, mon pou abandonn ou; mon pou fer ou vin parey en dezer, an landrwa kot personn pa pou kapab reste.

Senyer Pou Pini Izrael

⁹ La sa ki SENYER liniver i deklare: Restan Izrael pou ganny ranmase, parey ou ranmas tou grap rezen ki'n reste apre rekolt.

¹⁰ Avek ki fodre mon koze? Lekel ki pou ekout mon temwannyaz? Zot in bous zot zorey, pour pa antann mon mesaz. Parol SENYER i en dezoner pour zot. Zot pa pare pour ekoute.

¹¹ Mon ranpli avek lakoler SENYER, ki bril dan mwan; mon nepli kapab tenir. Tir ou lakoler lo bann zanfan dan lari, lo tou bann zennzan. Tou dimoun pou ganny deporte, mari ek fanm; menm bann vyeyar. Personn pa pou ganny eparnyen.

¹² Zot lakaz pou pas dan lanmen en lot dimoun, ansanm avek zot later ek zot fanm, SENYER i deklare. Wi! Mon pou pini zabitan sa pei.

¹³ Gran koman pti, pe fer tou pour zot vin ris dan fason malonnet. Depi bann profet ziska bann pret, zot tou, zot koz manti.

¹⁴ Zot pa pran gran ka avek dezas ki frap mon pep. Zot dir ki tou i byen alor ki tou pa pe mars byen.

¹⁵ Zot devre onte pour zot bann aksyon degoutan ki'n ofans mwan. Me zot napa pider. Zot pa'n ni oule rekonnet zot tor. Pour sa rezon, zot pou tonm parey tou lezot. Zot pou tonbe kan mon pou demann zot rann kont. SENYER i deklare.

Izrael I Refize Swiv Semen Bondye

¹⁶ La sa ki SENYER deklare: Aret en kou; plas ou lo krwaze semen; demande oli sa semen lontan, sa bon semen, swiv li e ou ava viv dan trankilite. Me zot in dir: Non! Nou pa pou swiv sa semen!

¹⁷ Mon'n met bann santinel pour veye. Ekout byen ler tronpet i sonnen. Me ou'n reponn: Mon pa pou port atansyon.

¹⁸ Alor! Zot, bann nasyon! Ekout byen sa ki mon pou fer sa pep.

¹⁹ Tou bann pep lo later! Ekoute: La mon pe anvoy maler lo sa pep, rezilta zot prop manigans, akoz zot in rezet mon lenstriksyon e zot pa'n obei mon komannman.

²⁰ Mon pa bezwen lansan ki sorti dan pei Saba, oubyen dibwa parfimen ki sorti dan pei etranze. Mon pa bezwen bann zannimo ki zot brile lo lotel; zot bann sakrifis pa fer mwan plezir.

²¹ Alor, la sa ki SENYER i deklare: Mon pou met lobstak devan sa pep Dimoun pou tonbe e disparet: Papa ek zanfan, vwazen ek zanmi.

Lennmi I Sorti dan Nor

²² La sa ki SENYER i deklare: En pep ki sorti dan Nor pe vini; sa i en gran nasyon ki sorti byen lwen.

²³ Son bann gerye i arme avek fles ek lans; zot kriyel e san pitye. Tapaz ki zot fer lo zot seval i parey en lanmer dan move tan. Zot in pare pour atak Zerizalenm.

²⁴ Bann zabitan Zerizalenm ti dir: Kan nou ti antann sa nouvel, nou ti perdi kouraz, nou lagorz ti sere. Nou ti soufer parey en fanm ki pe akouse.

²⁵ Pa sorti pour al dan lakanpanny, ni al marse dan semen, akoz lennmi i la, i pe masakre dan tou kote.

²⁶ La sa ki SENYER i deklare: Mon pep! Met ou lenz dey, roul ou dan lapousyer. Fer dey parey ou ti pou fer pour lanmor ou sel garson ki ou annan. Sant bann kantik tris, akoz lennmi pe vini e dan en sel kou i pou detri ou.

²⁷ Zeremi! Mon'n met ou parmi mon pep, pour ou teste li, parey en travayer i teste metal.

²⁸ Zot tou, zot en bann rebel andirsi ki senm rimer partou. Zot leker i dir parey bronz ek fer. Zot tou, zot bann malfeter.

²⁹ Mon pep i parey en metal brit. Si ou esey rafin li dan en gran dife, bann enpirte pou reste. Pa vo lapenn esey rafin li.

³⁰ Sa pep pou ganny apele: Larzan san okenn valer, akoz SENYER in rezet li.