Zeremi 50 - Labib An Kreol Seselwa

Senyer I Anons Destriksyon Babilonn

¹ La sa ki SENYER ti deklare par lentermedyer profet Zeremi, konsernan rwayonm Babilonn antye:

² Anons sa nouvel parmi bann nasyon: Met en lafis pour fer konnen sa nouvel. Proklanmen! Pa kasyet nanryen: Lennmi in pran Babilonn. Bel in ganny kouver ek laont. Merodak i dan lafreyer. Son bann stati in ganny kouver avek laont; son bann fo bondye i dan lafreyer.

³ En nasyon sorti dan Nor pe vin atak Babilonn e fer pei vin en landrwa devaste; personn pa pou reste la. Dimoun ek zannimo pou sove.

Izrael Pou Retourn dan Son Pei

⁴ La sa ki SENYER i deklare: Dan sa bann zour, dan sa letan, bann zabitan Izrael ek bann zabitan Zida, pour retourn ansanm. Zot pou vin rod mwan an pleran, mwan, SENYER, zot Bondye.

⁵ Zot pou demann semen pour al Siyon. Zot pou tourn ver lavil: Vini e fer en lalyans pour touzour avek SENYER. Zanmen zot pou oubliy sa lalyans.

⁶ Mon pep in vin parey en troupo mouton egare; zot berze in anmenn zot lo move semen. In fer zot tourn anron dan montanny; zot in rode partou dan bann kolin, ziska ler zot in oubliye kote zot reste.

⁷ Zot in ganny devore par tou dimoun ki war zot. Zot bann lennmi ti dir: Nou pa'n fer nanryen mal, akoz sa bann zans in komet pese kont SENYER ki zot vre berze, lespwar zot bann zanset.

⁸ Sove dan Babilonn! Kit pei bann Kaldeen! Fer parey bann bouk ki diriz en troupo.

⁹ Mon pe soulev en group bann gran nasyon for sorti dan pei Nor. Mon pour anvoy zot atak Babilonn. Zot pou pran zot pozisyon pour latak e zot pou kaptir lavil. En konbatan adrwa ki viz byen, pa zanmen mank son mark. En konbatan adrwat ki viz byen pa zanmen mank son mark.

¹⁰ Alor, Babilonn pou ganny vandalize; tou son bann larises pou ganny pran, SENYER i deklare.

Babilonn I Tonbe

¹¹ Pep Babilonn! Ou kontan, ou dan lazwa. Ou'n pran tou sa ki pour mwan. Ou pe sote parey en zenis dan laplenn; ou kriye parey en seval.

¹² Me ou manman ki ti met ou omonn, in ganny kouver avek laont; in perdi tou son loner. I pou vin dernyen parmi bann nasyon; i pou vin en pei dezer, en later sek, kot napa delo.

¹³ Akoz gran lakoler SENYER, personn pa pou vin reste ankor dan Babilonn; i pou ganny konpletman devaste. Tou sa ki pas par la pou soke e ganny sezisman, akoz tou son bann boubou.

¹⁴ La sa ki SENYER i deklare: Zot tou ki tir lark! Met zot pare. Viz lo li. Tir tou zot bann fles kont li, akoz zot in komet pese kont SENYER.

¹⁵ Kriye, fer tapaz dan tou kote lavil kont li. Fer tapaz avek aklamasyon lager. Babilonn in rann zarm. Son bann lavil fortifye in tonbe, son bann miray in ganny kraze.

¹⁶ Anpes sa enn ki senmen antre dan Babilonn; osi sa enn ki servi fosi pandan larekolt. Devan lepe ki detri tou, tou bann etranze pou retourn kot zot pep, zot pou sov dan zot pei.

Izrael Pou Retourn dan Son Pei

¹⁷ Izrael i parey en mouton egare ki bann lyon pe atake. Lerwa Lasiri ti premye pou devor li. Dernyen, Naboukodonozor, lerwa Babilonn in vin kraz son bann lezo.

¹⁸ Alor, la sa ki SENYER liniver, Bondye Izrael i deklare: Mon pou pini Naboukodonozor ki lerwa sa pei, parey mon ti pini lerwa Asiri.

¹⁹ Mon pou fer pep Izrael retourn se li, dan son domenn. I pou trouv dekwa manze lo montanny Karmel, dan rezyon Basann, dan bann teritwar Efraim ek Galaad, dekwa pour satisfer son lapeti.

²⁰ Kan sa zour i arive e dan sa letan, SENYER i deklare, ou pou rod fot Izrael, me ou pa pou trouve. Ou pou rod pese Zida, me ou pa pou war, akoz mon pou pardonn sa restan Izrael ki mon'n eparnyen.

La koman Senyer Pou Pini Babilonn

²¹ La sa ki SENYER i deklare: Al atak bann zabitan Merataim ek Pekod! Touye! Detri zot tou konpletman. Fer tou sa ki mon'n ordonn ou.

²² Tapaz lager i partou dan pei, bann gran destriksyon pe arive.

²³ Gete! Babilonn ti parey en marto ki ti kraz tou nasyon; Aprezan, in ganny kraze an morso! Koman i fer ki Babilonn en vin keksoz ki fer per tou bann nasyon!

²⁴ Babilonn! Ou'n provok SENYER. Alor, mon'n met en latrap pour ou, me ou pa ti konnen, e ou'n ganny pri. Ou'n ganny atrape, akoz ou ti provok SENYER.

²⁵ SENYER in ouver lasal zarm, e in tir zarm son lakoler, akoz li, Senyer BONDYE liniver, i annan en travay pour fer dan Babilonn.

²⁶ Vin kot li, zot tou ki sorti lwen! Ouver son bann grennyen. Fer bann ta avek bann legren e detri zot konpletman. Ki nanryen pa reste!

²⁷ Masakre tou bann toro! Fer zot desann dan labatwar. Lepep Babilonn in ganny modi! Letan pour li ganny pini in arive.

²⁸ Bann sirvivan ki ti'n sape Babilonn e ki'n ariv Zerizalenm ti rakonte koman SENYER nou Bondye in fer son revanz pour sa ki bann Babilonyen ti'n fer avek son tanp.

²⁹ Rasanble tou bann ki konn tir fles! Anvoy zot atak lavil Babilonn. Fer zot anserkle li. Pa les personn sove! Fer li pey tou sa bann dimal ki i'n fer. Tret li parey in tret lezot, akoz in azir avek lorgey kont mwan, SENYER, Bondye sen Izrael.

³⁰ Sa zour la, son bann zennzan pou ganny touye dan lavil, e tou son bann zenn konbatan pou perdi lavi, SENYER i deklare.

³¹ Babilonn! Mon kont ou, akoz ou vantar. Letan in arive pour mwan, Senyer BONDYE liniver, pini ou.

³² Sa nasyon ki vantar, pour fer en fo pa e i pou tonbe. Personn pa pour vin ed li. Mon pour met dife avek son bann lavil e tou sa ki otour li, pour ganny detri.

Senyer I Sover Izrael

³³ La sa ki SENYER liniver i deklare: Pep Izrael ek pep Zida i viktim zot lennmi ki'n gard zot e anpes zot sove.

³⁴ Me zot defanser i for. Son non i SENYER liniver. I pour entervenir dan zot faver, pour ki i anmenn lape dan pei, me ki i fer tranble bann zabitan Babilonn.

Proze Senyer kont Babilonn

³⁵ Lager kont Babilonn, kont son bann zabitan, son bann sef e son bann saz, SENYER i deklare.

³⁶ Mon deklar lager kont son bann fo profet ki pou ganny trete koman bann fou. Mon deklar lager kont son bann gerye pour ki zot ganny masakre.

³⁷ Mon deklar lager kont son bann seval ek son bann kales lager; kont tou bann troup etranze ki parmi zot, pour zot tonm feb parey bann fanm. Detri tou son bann trezor; ki zot ganny vole.

³⁸ Lasesres kont son bann larivyer! Fer zot vin sek! Sa pei i ranpli avek bann stati ki fer per e ki'n bat latet bann zabitan.

³⁹ Pour sa rezon, bann bebet sovaz pou vin reste parmi bann yenn dan Babilonn; bann lotris pour osi vini. Zanmen personn pour vin reste isi; sa lavil pour reste dezer pour touzour.

⁴⁰ Sa ki pour ariv lo Babilonn, pour parey katastrof ki mon ti anvoy lo Sodonm ek Gomor, kan mon ti detri sa de lavil avek tou bann lavil dan zalantour, SENYER i deklare. Alor, personn pa pou vin reste isi, personn pa pou pas isi.

⁴¹ En pep ki sorti dan Nor pe vini; sa i en gran nasyon avek bann lerwa pwisan.

⁴² Zot lev bann fles ek bann lans; zot kriyel e san pitye. Tapaz ki zot fer lo zot seval e parey en lanmer dan move tan. Zot in pare pour atak ou, Babilonn ki zoli.

⁴³ Bann lerwa Babilonn ti'n antann nouvel. Zot ti perdi kouraz, zot lagorz ti sere; Zot ti soufer parey en fanm ki pe akouse.

⁴⁴ Mon pou vin parey en lyon ki sorti dan brousay, obor larivyer Zourden dan en oazis, SENYER i deklare. Toudenkou, mon pou fer zot sove. Alor, mon pou nonm en sef ki mon ava'n swazir. Annefe, lekel ki kapab konpar li avek mwan? Lekel ki pou al kont mwan? Lekel sa berze ki pou kapab opoz mwan?

⁴⁵ Alor, ekout sa plan ki SENYER in fer kont Babilonn, e ki lentansyon i annan kont bann zabitan sa pei. San okenn dout, son bann zanfan pour ganny trennen deor, e tou dimoun pour reste soke.

⁴⁶ Kan Babilonn pou ganny kaptire, later pou tranble; son bann apel osekour pour ganny tande parmi bann nasyon.