Zeremi 49 - Labib An Kreol Seselwa

Zizman Senyer lo bann Amonit

¹ Lo size bann Amonit, la sa ki SENYER i dir: Akoz eski Milkonm in pous Gad e pran son teritwar? Akoz eski zabitan Amonn pe okip bann lavil Gad? Eski Izrael napa okenn desandan ni zeritye?

² Pour sa rezon, sa zour pe sirman vini, SENYER i deklare, kan tapaz lager pou rezonnen dan Raba, lavil bann Amonit. Sa lavil pou vin en ta debri; son bann vilaz pou ganny brile. Alor, Izrael ava kapab repran son posesyon avek sa bann ki ti'n pran li.

³ Zabitan Hesbonn! Kriye! Ai ki'n ganny devaste. Bann fiy Raba! Kriye. Met zot lenz dey e plere, taye tou dilon miray, akoz Milkonm, pou ganny deporte avek tou son bann pret ek bann sef.

⁴ Ou pep enfidel! Ou vant larises ki dan ou vale. Ou met ou konfyans dan ou larises e ou dir ki personn pa pou kapab atak ou.

⁵ Mwan Senyer, BONDYE liniver, mon pou fer lafreyer akapar zot. I pou sorti partou kote e zot pou ganny sase. Pou napa personn ki pou fer zot retournen.

⁶ Me plitar, mon pou retabli sityasyon bann Amonit dan son prosperite parey avan, SENYER i deklare.

Senyer Pou Ziz Edonm

⁷ Konsernan Edonm, la sa ki SENYER liniver i deklare: Eski nepli annan dimoun saz dan Temann? Eski nepli annan okenn konseye parmi bann zonm pridan? Eski tou zot lasazes in koronpi?

⁸ Zabitan Dedann! Sove! Retournen! Al kasyet dan bann kavern. Mon pe anvoy katastrof Ezai lo li, akoz letan in arive pour mwan pini zot.

⁹ Dimoun ki vin ranmas grap rezen, pa pran tou rezen. Kan voler i vini dan lannwit, i pran zis sa ki i oule.

¹⁰ Me mwan, mon'n met Ezai touni. Mon'n dekouver son bann landrwa e i pa kapab al kasyet. Son bann frer ek son bann vwazen in ganny detri; napa personn ki reste.

¹¹ Les zot bann orfelen avek mwan; mon pou okip zot. Bann vev ava kapab kont lo mwan.

¹² Annefe, la sa ki SENYER i deklare: Si sa bann dimoun ki pa ti devre ganny pini, in bezwen bwar lakoup, ou osi ou pou bezwen bwar! Ou pa pour kapab sap pinisyon; ou osi, ou pour bezwen bwar.

¹³ SENYER i deklare: Mon fer sa serman: Lavil Bosra pour vin en sit degoutan, en ta debri. I pou vin en proverb malediksyon, en mokri. Tou bann vilaz dan zanviron pour ganny devaste pour touzour.

¹⁴ Mon'n ganny en mesaz sorti kot SENYER. In anvoy en mesaze pour anons bann nasyon: Rasanble zot ansanm kont Edonm; leve pour fer lager!

¹⁵ Mon pou fer Edonm vin en pli pti pei parmi tou bann nasyon. Tou dimoun pou mepriz li!

¹⁶ Ou larogans i fer ou krwar ki tou dimoun i per ou. Me ou tronpe. Ou reste lao lo latet montanny, dan bann trou ros; me menm si ou viv la anler parey bann leg, mon pou fer ou desann, SENYER i deklare.

¹⁷ Edonm pou vin en ta debri; bann pasan pou soke e soufle avek degou ler zot ava war sa dega ki'n arive.

¹⁸ Sa katastrof pou parey Sodonm ek Gomor kan zot ti ganny detri avek bann lavil vwazen, SENYER i deklare. Personn pa pour vin reste la, personn pa pour vin etabli li dan sa landrwa.

¹⁹ Parey en lyon ki sorti dan brousay obor larivyer Zourden pour vin dan laplenn, mon pou vini e fer tou dimoun taye kot zot. Alor, mon pou etabli en sef ki mon ava'n swazir. Lekel ki kapab konpar li avek mwan? Lekel ki pou oze kontredir mwan? Lekel sa berze ki pou kapab opoz mwan?

²⁰ Alor, ekout proze ki SENYER in fer kont bann zabitan Edonm, e bann plan ki i'n prepare kont bann zabitan lavil Temann. Menm bann zanfan pou ganny trennen deor, parey zannimo; e tou dimoun pou reste soke.

²¹ Edonm pou tonm avek; en gro tapaz pour sekwe later antye; zot kriy osekour pou ganny tande osi lwen ki lanmer Rouz.

²² Lennmi pour atak Bosra parey en leg ki desann avek son lezel gran ouver. Sa zour la, bann meyer gerye Moab pou per parey en fanm ki dan douler lanfantman.

Zizman Senyer lo Damas

²³ Lo size Damas, la sa ki SENYER ti deklare: Zabitan bann lavil Hamat ek Arpad i onte. Zot dan traka akoz zot in antann en move nouvel. Zot trouble parey en lanmer demonte ki enposib kalme.

²⁴ Zabitan Damas in perdi kouraz e zot in sove dan lafreyer. Zot dan langwas ek douler, parey en fanm ki dan douler lanfantman.

²⁵ Sa lavil ki otrefwa ti ere, in ganny abandonnen konpletman.

²⁶ Sa zour la, son bann zennzan pour ganny touye dan bann plas piblik, e tou son bann zenn gerye pou perdi zot lavi, SENYER liniver i deklare.

²⁷ Mon pou met dife dan bann miray Damas. Sa dife pou bril pale lerwa Benn-Hadad.

Zizman Senyer lo Kedar ek Hazor

²⁸ La sa ki SENYER i deklare lo size tribi Kedar e bann rezyon kontrole par Hazor ki Naboukodonozor, lerwa Babilonn ti gannyen dan lager: Atak pep Kedar e detri sa tribi ki sorti dan Les.

²⁹ Sezi zot bann latant ek zot bann troupo. Tir zot rido ek tou sa ki zot annan. Pran zot samo e dir lepep: Lafreyer i partou!

³⁰ Zabitan Azor! Mwan, SENYER, mon deklare: Sove, al lwen! Al kasyet zot dan bann kavern. Naboukodonozor, lerwa Babilonn, i annan en proze kont zot. In prepar en plan kont zot, SENYER i deklare.

³¹ Leve! Al atak sa nasyon ki krwar i an sekirite. Son lavil napa okenn baro ni kadnan pour protez zot. Zot tousel.

³² Zot bann samo ek tou zot gran troupo pour vin en piyaz lager. Sa bann dimoun ki raz zot latanp, SENYER pou dispers zot dan tou direksyon e i pour anmenn dezas lo zot partou kote.

³³ Hazor pour vin en dezer pou touzour, en plas kot zis bann sakal ki pou vin reste. Personn pa pour vin reste isi ankor, SENYER i deklare.

Zizman Senyer lo Elanm

³⁴ La parol ki SENYER ti adres profet Zeremi konsernan Elanm, zis apre ki Sedesyas ti vin lerwa Zida:

³⁵ La sa ki SENYER liniver i deklare: Mon pou detri tou bann gerye arme avek fles e ki fer lafors Elanm.

³⁶ Mon pou fer divan sorti dan kat kwen lesyel, soufle lo Elanm; mon pou dispers son pep partou, ziska ki ava napa okenn pei, kot zot pa'n al rod refiz.

³⁷ Mon pou fer bann zabitan Elanm per devan zot lennmi ek bann ki swet zot lanmor. Dan mon gran lakoler, mon pou detri zabitan Elanm, SENYER i deklare. Mon pou anvoy lepe kont li, ziska ki zot ava'n ganny detri konpletman.

³⁸ Mon pou detri zot bann lerwa ek zot bann sef; mon pou etabli mon tronn dan sa pei, SENYER i deklare.

³⁹ Me plitar, mon pou retabli Elanm dan son larises, SENYER i deklare.