Zeremi 47 - Labib An Kreol Seselwa

Mesaz Senyer Konsernan bann Filisten

¹ Avan ki lerwa Lezip ti atak Gaza, SENYER ti koz avek profet Zeremi konsernan bann Filisten.

² La sa ki SENYER i deklare: Gete! Bann lennmi pe rasanble dan Nor, parey en larivyer ki pe grosi. Zot parey en gran linondasyon ki pou kouver later bann Filisten e tou bann zabitan pei pou kriy osekour.

³ Zot pou antann tapaz seval ki pe tape avek zot sabo, fraka larou bann kales lager. Bann paran nepli okip zot zanfan.

⁴ Sa i akoz sa zour pe vini kan SENYER pou detri bann Filisten. Pa pou annan personn pour ed bann lavil Tir ek Sidon. SENYER pe fer ravaz kot bann zabitan Kaftor.

⁵ En gran latristes in anvai lepep ki reste Gaza. Zabitan Askelonn nepli oze koze. Ziska kan zot pou sizle zot lekor?

⁶ Zot kriye: Kan eski lepe SENYER pour pran en pe repo? In ler pour li antre dan son fouro, reste trankil e fer silans.

⁷ Me ki mannyer mon kapab repoze ler mon annan travay latas pour mwan fer? Mon'n ganny lord atak Askelonn e bann zabitan lakot.