Zeremi 42 - Labib An Kreol Seselwa

Lepep I Demann Zeremi Priy pour Zot

¹ Apre sa, tou bann sef, Yohanann, garson Karea e Azarya, garson Osaya ek tou lepep, depi pli pti ziska pli gran, ti al

² kot profet Zeremi. Zot ti dir li, “Nou sipliy ou, priy SENYER ou Bondye pour nou. Priy pour nou tou ki'n reste vivan. Parey ou kapab war ou menm, i pa reste bokou nou.

³ Demann SENYER ou Bondye kote nou devre ale e sa ki nou devre fer.”

⁴ Profet Zeremi ti reponn zot, “Dakor! Mon ava priy SENYER zot Bondye parey zot in demann mwan. Apre, mon ava fer zot konnen ki repons SENYER i donnen; mon pa pou kasyet zot nanryen.”

⁵ Zot ti dir Zeremi, “Nou promet pour fer egzakteman tou sa ki SENYER ou Bondye i ava anvoy ou dir nou. Nou pran li koman temwen sir lo sa promes ki SENYER in anvoy avek ou pour nou.

⁶ Nou anvoy ou konsilte SENYER nou Bondye pour nou. Kontan pa kontan, nou pou obei sa ki i pou demann nou fer par ou lentermedyer. Konmsa, tou ava mars byen pour nou, akoz nou ava pe obei SENYER nou Bondye.”

Senyer I Reponn Lapriyer Zeremi

⁷ Dis zour plitar, SENYER ti koz avek Zeremi.

⁸ Alor, Zeremi ti konvok Yohanann, garson Karea, tou bann sef gerye ki ti avek li e tou lezot dimoun, pti koman gran.

⁹ I ti dir zot: Zot ti'n demann mwan prezant zot demann devan SENYER, Bondye Izrael. La sa ki SENYER, Bondye Izrael i deklare:

¹⁰ Si zot kontinyen reste dan sa pei, alor mon ava rekonstri zot pep, mon pa pou detri li. Olye derasin zot, mon ava replant zot, akoz mon regret tou sa maler ki mon'n fer tonm lo zot.

¹¹ Aprezan, pa bezwen per lerwa Babilonn! Pa bezwen per li, akoz mon avek zot e mon pou sov zot, SENYER i deklare. Mon avek zot, mon pou delivre zot anba son pouvwar.

¹² Mon pou azir dan zot faver. I pou pran pitye pour zot, e i pou les zot retourn dan zot pei.

¹³ Me si zot refize obei lord sorti kot SENYER zot Bondye,

¹⁴ e si zot dir: Non, nou pa oule viv dan sa pei, me nou prefer al viv Lezip. Laba, pou nepli annan lager, nou pa pou antann son tronpet ki anons lager, nou pa pou soufer lafen. Laba ki nou oule reste.

¹⁵ Alor, zot restan pep Zida, ekout parol SENYER. La sa ki SENYER liniver, Bondye Izrael i deklare: Si zot in vreman deside retourn Lezip e al enstal zot pour touzour,

¹⁶ lager ki zot sitan per pou swiv zot laba Lezip; lafanmin ki donn zot en ta traka pou pourswiv zot laba Lezip kot zot pou mor.

¹⁷ Tou lepep ki ava'n deside al enstal zot Lezip, pou mor swa par lager, swa par lafen, swa par lepidemi. Maler ki mon pou fer tonm lo zot pa pou eparny personn.

¹⁸ Annefe, la sa ki SENYER liniver, Bondye Izrael i deklare: Sa lakoler ki mon ti devers lo zabitan Zerizalenm, mon pou fer li tonm lo zot, si zot al Lezip. Zot pou antre dan proverb malediksyon e pour ensilte dimoun. Zanmen zot pou revwar sa pei ankor.

¹⁹ SENYER in dir ou, restan lepep ki dan Zida: Pa al Lezip. Sa i en lavertisman serye ki zot gannyen ozordi.

²⁰ Zot pe fer en gro fot. Zot ti demann mwan priy SENYER nou Bondye pour zot, e zot ti promet ki zot pou fer tou sa ki i pou dir zot fer.

²¹ Aprezan, la mon donn zot repons. Me zot pa pe ekout sa ki SENYER i dir zot par mon lentermedyer.

²² Alor, zot devre konnen ki zot pou mor par lager, lafanmin e par lepidemi dan sa pei kot zot oule al reste.