Zeremi 41 - Labib An Kreol Seselwa

¹ Dan setyenm mwan, Ismael, garson Netanya, garson Elisama, en manm lafanmir rwayal e enn bann sef zofisye lerwa, ti al Mispa avek 10 zonm, pour li war Gedalya. Kan zot ti pe manze ansanm,

² Ismael ti leve e sa 10 zonm ti fer parey. Zot ti touy Gedalya, garson Ahikanm, garson Safann, akoz lerwa Babilonn ti'n nonm li gouverner pei.

³ Ismael ti osi touy bann Izraelit ki ti Mispa avek Gedalya ek bann gerye Babilonyen.

Ismael I Asasin Katreven Pelren

⁴ Lannmen ki Gedalya ti ganny asasinen, alor ki personn pa ti ankor okouran,

⁵ 80 zonm ti arive sorti Sikenm, Silo ek Samari. Zot ti'n raz zot labarb, zot lenz ti desire e zot ti'n sizle zot lekor. Zot ti'n vin avek bann lofrann vezetal ek lansan pour ofer dan tanp SENYER.

⁶ Alor, Ismael, garson Netanya, ti sorti dan Mispa, pour al rankontre sa bann zonm. I ti plere an alan. Kan i ti rankontre zot, i ti dir zot: Vin kot Gedalya, garson Ahikanm.

⁷ Me kan zot ti ariv dan lavil, Ismael, garson Natanya ek bann zonm ki ti avek li, ti touy 70 parmi zot e zet zot lekor dan en sitern.

⁸ Me ti annan 10 zonm ki ti'n dir Ismael: Pa touy nou. Nou'n kasyet en ta provizyon an deor lavil: Dible, lorz, delwil e dimyel.

⁹ Ismael ti'n zet lekor bann zonm ki i ti'n touye, dan sitern sa gran pi ki lerwa Asa ti fer fouye pandan ki i ti pe lager kont Basa, lerwa Izrael. Dan sanmenm sa pi ki Ismael ti'n fer zet bann kadav.

¹⁰ Apre, Ismael ti fer prizonnyen tou sa bann dimoun ki ti'n reste Mispa, bann fiy lerwa ek tou restan zabitan Mispa ki Nabouzeradann, sef bann gard ti'n met anba responsabilite Gedalya. I ti kit Mispa e al reste dan teritwar bann Amonit.

Bann Prizonnyen Ismael I Ganny Libere

¹¹ Kan Yohanann, garson Karea, ek son bann sef ti aprann sa krim ki Ismael ti'n komet,

¹² zot ti al atak li ek son bann zonm. Zot ti rankontre li pre avek Gran Lanmar ki dan Gabaon.

¹³ Bann prizonnyen Ismael ti tre kontan ler zot ti war Yohanann ek son bann zofisye avek li.

¹⁴ Alor, zot tou, zot ti fer demi tour e al rezwenn Yohanann.

¹⁵ Me Ismael avek wit son bann zonm ti kapab sove e al rezwenn bann Amonit.

¹⁶ Apre sa, Yohanann ek bann sef ki ti pe akonpanny li, ti rasanble tou sa bann ki ti ankor vivan e ki Ismael ti'n anmenn Mispa, apre ki Gedalya ti'n ganny asasinen: Gerye, fanm, zanfan ek bann enik.

¹⁷ Zot ti ale, e zot ti aret dan kan Kimhanm, ki pre Betlehenm, avek lentansyon al Lezip.

¹⁸ Annefe, zot ti per bann Babilonyen depi ki Ismael ti'n asasin Gedalya, ki lerwa Babilonyen ti'n nonmen koman gouverner Zida.