Zeremi 36 - Labib An Kreol Seselwa

Barouk I Lir Liv dan Tanp

¹ Dan katriyenm lannen, kan Yoyakim, garson Zozyas ti lerwa Zida, la parol ki SENYER ti adres Zeremi:

² Pran en liv e ekri tou sa bann parol ki mon ti dir ou lo Izrael, Zida ek tou bann nasyon, depi lepok Zozyas ziska ozordi.

³ Kekfwa bann zabitan Zida ava antann tou sa bann maler ki mon annan lentansyon anvoy lo zot, pour ki zot sanz zot move mannyer viv. Alor mon ava pardonn zot pour zot fot ek zot pese.

⁴ Alor, Zeremi ti apel Barouk, garson Neriya. Barouk ti ekri lo en liv, tou bann parol ki Zeremi ti dikte li e ki SENYER ti'n dir li.

⁵ Apre sa, Zeremi ti donn Barouk sa lord: Mon'n ganny anpese antre dan tanp SENYER.

⁶ Alor, prosen zour ki lepep pou fer en zenn, ou ava al dan mon plas. La, ou ava lir byen for sa ki ou'n ekri lo sa roulo. Konmsa, tou dimoun ava antann tou sa ki SENYER ti'n dir mwan e ki mon'n dikte avek ou. Ou ava fer sa osi devan tou dimoun ki'n vin depi bann lavil dan Zida.

⁷ Kekfwa zot ava priy SENYER e ki zot ava sanz zot lavi, akoz SENYER in menas sa pep avek en gran lakoler.

⁸ Alor Barouk, garson Neriya, ti fer tou sa ki Zeremi ti'n ordonn li: Dan tanp, i ti lir dan liv, tou bann parol ki SENYER ti'n dir.

⁹ Dan senkyenm lannen ki Zoyakim, garson Zozyas ti lerwa Zida, dan nevyenm mwan, en seremoni zenn ti ganny proklanmen pour lepep ki reste Zerizalenm ek tou bann pep sorti dan bann lavil Zida.

¹⁰ Barouk ti lir byen for e devan tou dimoun, parol Zeremi ki ti'n ekri dan liv. I ti fer sa dan tanp depi lasal Gemarya, garson Safann, ki ti sekreter lakour. Sa lasal ti par lao lakour tanp, pre Nouvo Laport tanp SENYER.

Barouk I Lir Mesaz dan Pale

¹¹ Ler Mikaya, garson Gemarya, garson Safann ti antann mesaz SENYER ki Barouk ti lir depi liv roulo,

¹² i ti al kot pale lerwa, dan lasal sekreter lakour, kot bann sef ti'n reini. Ti annan Elisama, sekreter lakour, Delaya, garson Semaya, Elnatan, garson Akbor, Gemarya, garson Safann, Sedesyas, garson Hananya ek tou lezot zofisye.

¹³ Mikaya ti raport tou bann parol ki i ti'n tande, sa ki Barouk ti lir avek lepep.

¹⁴ Alor, bann sef ti anvoy Yeoudi, garson Netanya, garson Selemia, garson Kousi, pour dir Barouk, “Vin kot nou avek sa liv roulo ki ou'n lir an piblik.” Barouk, garson Neriya, ti pran sa liv roulo e i ti al kot zot.

¹⁵ Zot ti dir li, “Asiz, e lir pour nou sa ki'n ekri dan sa liv roulo.” Alor, Barouk ti lir sa bann parol devan zot.

¹⁶ Kan zot ti'n fini antann tou sa mesaz, zot ti get kanmarad avek lafreyer. Zot ti dir Barouk, “Nou bezwen raport tou sa bann parol avek lerwa.”

¹⁷ Apre, zot ti kestyonn Barouk, “Eski ou kapab eksplik nou ki mannyer ou'n arive ekri tou sa bann parol? Eski Zeremi ki ti dikte zot avek ou?”

¹⁸ Barouk ti reponn zot, “Zeremi ti dikte mwan tou sa bann parol ki mon ti ekri avek lank dan sa roulo.”

¹⁹ Apre, sa bann zofisye ti dir li, “Ou avek Zeremi, zot devre al kasyet. Pa les personn konnen kote zot ete.”

Lerwa I Bril Sa Liv

²⁰ Sa bann zofisye ti met sa liv roulo dan lasal Elisama, sekreter lakour. Zot ti al kot pale lerwa kot zot ti raport li tou bann parol.

²¹ Alor, lerwa ti anvoy Yeoudi sers sa liv roulo. Yeoudi ti al pran dan lasal Elisama, sekreter lakour. Devan lerwa ek bann zofisye ki ti pe debout otour li, Yeoudi ti lir sa ki ti'n ekri.

²² Sa ti pas dan nevyenm mwan lannen. Lerwa ti pe asiz dan son pale liver devan en reso alimen.

²³ Anmezir ki Yeoudi ti lir trwa oubyen kat pasaz sa mesaz, lerwa ti koup zot avek en kannif e i ti zet dan dife sa reso. I ti fer sa ziska ki liv roulo ti fini ganny brile.

²⁴ Ni lerwa ni okenn son bann zofisye ki ti'n antann tou sa bann parol pa ti per. Zot pa ti montre okenn siny latristes. Personn pa ti desir son lenz.

²⁵ Pourtan, Elnatan, Delaya ek Gemarya ti ensiste avek lerwa pour li pa bril sa liv roulo. Me lerwa pa ti port okenn atansyon.

²⁶ Alor, lerwa ti donn lord son garson Zerameel ek Seraya, garson Azriel ek Selemia, garson Abdeel, pour al aret profet Zeremi ek Barouk son sekreter. Me SENYER ti kasyet zot.

Zeremi I Demann Barouk pour Ekri En lot Mesaz

²⁷ Apre ki lerwa Zoyakim ti'n bril sa liv roulo avek mesaz ki Zeremi ti'n dikte avek Barouk, parol SENYER ti ariv kot Zeremi:

²⁸ Pran en lot liv roulo e ekri tou sa bann mesaz ki ti'n ganny ekri dan sa premye roulo e ki Yoyakim, lerwa Zida, in brile.

²⁹ Konsernan Yoyakim, lerwa Zida, ou ava dir: La sa ki SENYER i deklare: Akoz eski ou'n bril sa liv roulo kot Zeremi ti'n anonse ki lerwa Babilonn pou vin detri sa pei e touy tou son bann zabitan ek zot bann zannimo?

³⁰ Pour sa rezon, la sa ki SENYER i deklare konsernan Yoyakim, lerwa Zida: I pa pou annan okenn desandan ki pour renny lo rwayonm David. Son kadav pou ganny zete deor kot i ava ganny ekspoze avek lasaler lizour ek lafreser lannwit.

³¹ Mon pou pini li, son bann desandan ek son bann sef pour bann pese ki zot tou zot in komet. Personn parmi zabitan Zerizalenm oubyen Zida in ekout mon bann avertisman. Alor, mon pou anmenn lo zot, tou sa bann maler ki mon ti menas zot avek.

³² Zeremi ti pran en lot liv roulo ki i ti donn Barouk, garson Neriya, ki ti sekreter. Barouk ti ekri sa ki Zeremi ti dikte li. I ti ekri tou sa ki ti lo premye roulo e ki Yoyakim, lerwa Zida ti'n brile. Ti annan osi lezot mesaz parey.