Zeremi 33 - Labib An Kreol Seselwa

Bondye I Fer En lot Promes

¹ Zeremi ti ankor dan lakour prizon, kan SENYER ti adres li en lot mesaz.

² La sa ki SENYER ki'n kree later, ki'n donn li son laform e ki'n met li dan son plas, li menm ki son non i SENYER, i deklare:

³ Apel mwan e mon ava reponn ou; mon pou montre ou bann gran sekre ki ou pa konnen.

⁴ Annefe, la sa ki SENYER, Bondye Izrael i deklare lo bann lakaz dan Zerizalenm ek bann pale bann lerwa Zida: Zot in ganny detri. Pa servi nanryen konbat kont bann miray ranfor e lite kont bann Babilonyen.

⁵ Sa pou zis ranpli lavil avek en ta kadav sa bann dimoun ki mon pou detri dan mon gran lakoler. Bann zabitan Zerizalenm in komet en kantite move keksoz ki mon pa oule war.

⁶ Malgre sa, mon pou swanny sa lavil e mon pou geri son bann zabitan e fer zot viv dan lape e an sekirite.

⁷ Mon pou fer Zida ek Izrael prospere, e mon pou rekonstri zot parey zot ti ete avan.

⁸ Mon pou pirifye zot kont tou zot fot ki zot in komet kont mwan. Mon pou pardonn zot, zot bann fot ek rebelyon kont mwan.

⁹ Alor, i ava en gran plezir pour mwan pronons sa non: Zerizalenm. Sa lavil pou fer mon loner e mon pou fyer devan tou bann pep lo later. Sak nasyon pou tranble avek lafreyer kan zot ava antann tou sa bann bon keksoz ki mon fer pour pep Zerizalenm e koman mon'n fer sa lavil prospere.

¹⁰ La sa ki SENYER i deklare: Dimoun i dir ki sa pei, in vin en dezer kot napa personn, ni zannimo ki viv. Annefe, bann lavil Zida e bann lari Zerizalenm i vid; napa personn ki reste, okenn imen, okenn zannimo. Dan sanmenm sa pei ou pou antann ankor

¹¹ tapaz lafet, dimoun riye, bann zenn marye sante. Ou pou antann dimoun pe sante kan zot pe anmenn zot lofrann remersiman dan tanp SENYER: Loue SENYER liniver, akoz SENYER i bon, e son fidelite i pour touzour! Annefe, SENYER i deklare: Mon pou redonn sa pei son prosperite parey i ti ete avan.

¹² La sa ki SENYER i deklare: Dan sa pei ki parey en dezer, e kot napa personn ki viv, ni dimoun ni zannimo, e dan tou son bann lavil, pou annan nouvo landrwa kot bann berze pou kapab vey lo zot mouton ek zot bann kabri.

¹³ Dan bann lavil ki sitye dan montanny, dan sa bann ki dan laplenn, e dan Sid Zida, dan teritwar Benzamen, dan bann vilaz ki otour Zerizalenm, e dan bann lavil dan Zida, bann berze ava kapab kont zot mouton ek zot bann kabri enn par enn, parey avan, SENYER i deklare.

Senyer Pou Realiz Son bann Promes

¹⁴ La sa ki SENYER i deklare: Sa bann zour pe vini, kan mon pou akonpli sa promes ki mon ti fer avek pep Izrael e avek pep Zida.

¹⁵ Dan sa bann zour e dan sa letan, mon pou swazir en vre desandan pour David. I pou fer respekte lalwa ek lazistis partou dan pei.

¹⁶ Dan sa bann zour, bann zabitan Zida pou ganny libere, e bann zabitan Zerizalenm pou viv an sekirite. Lavil li menm pou ganny apele: SENYER i nou lazistis!

¹⁷ Annefe, la sa ki SENYER i deklare: Pou touzour annan en desandan David koman lerwa pep Izrael.

¹⁸ Pou touzour annan bann pret ki sorti dan tribi Levi pou ofer bann sakrifis konplet, lofrann vezetal, ek lezot sakrifis.

¹⁹ SENYER ti dir Zeremi:

²⁰ La sa ki SENYER i deklare: Personn pa kapab kas lalyans ki mon'n fer avek lizour ek lannwit. Eski ou kapab kas lalyans lizour avek lannwit e lannwit avek lizour pour fer ki lizour i nepli swiv lannwit.

²¹ Si sa ti arive, alor, mon lalyans avek mon serviter David ti ava'n kase; sa ti ava fer ki pa pou kapab annan en desandan pour rennyen lo son tronn e lalyans avek bann pret ki sorti dan tribi Levi pour servi mwan.

²² Parey i pa posib kont bann zetwal dan lesyel, ni bann gren disab dan lanmer, mon pou osi ogmant desandans mon serviter David e bann desandan Levi ki servi mwan koman pret.

²³ SENYER ti ankor dir Zeremi:

²⁴ Eski ou pa'n antann sa pep dir ki mon'n rezet Izrael ek Zida, sa de fanmir ki mon ti'n swazir? Dimoun ki koz konmsa, zot mepriz mon pep, e zot nepli konsider li koman en nasyon.

²⁵ Me la sa ki SENYER i deklare: Si mon pa ti'n fer en lalyans avek lizour ek lannwit e si mon pa ti'n etabli bann lalwa ki gouvern later ek lesyel,

²⁶ alor, mon ti ava'n kapab rezet desandans Zakob ek David mon serviter. Mon ti ava'n kapab rezet desandans Zakob ek mon serviter David e aret pran dan son desandans sa bann ki pou gouvern desandans Abrahanm, Izaak ek Zakob. Me mon pou annan pitye pour zot e mon pou fer zot prospere parey avan.