Zeremi 32 - Labib An Kreol Seselwa

Zeremi I Aste en Morso Later

¹ Dan dizyenm lannen ki Sedesyas ti lerwa Zida, e ki ti osi dizwityenm lannen ki Naboukodonozor ti lerwa Babilonn, SENYER ti koz avek Zeremi.

² Dan sa letan, larme lerwa Babilonn ti pe anserkle Zerizalenm, e Zeremi ti prizonnyen dan lakour kordgard ki ti dan pale lerwa Zida,

³ kot lerwa Sedesyas ti'n fer met li an konsiny, apre ki i ti'n demann li: Akoz ou dir: La sa ki SENYER i deklare: Mon pour les lerwa Babilonn pran sa lavil, e i pou pran li.

⁴ Sedesyas, lerwa Zida, pa kapab sape anba pouvwar bann Babilonyen; i pou ganny livre dan lanmen lerwa Babilonn. I pou koz avek li an personn e i ava war li fas a fas.

⁵ Sedesyas pou ganny deporte Babilonn kot i pou reste ziska zour mon ava azir an son faver. Menm si ou kontinyen fer lager kont bann Babilonyen, ou pou perdi, SENYER ki deklare.

⁶ Zeremi ti dir: Parol SENYER ti ariv kot mwan:

⁷ Ou kouzen Hanameel, garson Saloum, pe vin war ou. I pou dir ou: Aste mon later ki sitye Anatot; ou annan en drwa preferansyel pour aste sa morso later.

⁸ Parey SENYER ti'n averti mwan, Hanameel pa ti tarde pour li vin war mwan dan lakour kordgard. I ti dir mwan: Aste mon morso later ki sitye Anatot, dan teritwar Benzamen. Annefe, ou mon fanmir pli pros e ou annan drwa aste avan lezot. Apre sa, mon ti sir ki SENYER ti'n vreman koz avek mwan.

⁹ Alor mon ti aste sa later ki sitye Anatot avek mon kouzen Hanameel, e mon ti pey li 17 pyes larzan.

¹⁰ Mon ti siny lakt lavant; mon ti kaste en kopi devan temwen e fer pez larzan lo en balans.

¹¹ Apre, mon ti pran sa kopi kaste ki fer mansyon tou bann kondisyon lavant, osi lot kopi ki pa ti'n kaste.

¹² An prezans Hanameel e devan bann temwen, mon ti donn sa kontra lavant Barouk, garson Neriya e gran garson Maseya. Tou bann dimoun ki ti dan lakour kordgard ti osi temwen.

¹³ Alor, devan tou sa bann dimoun, mon ti dir Barouk:

¹⁴ La sa ki SENYER liniver, Bondye Izrael, i deklare: Pran sa de lakt lavant, sa enn ki'n kaste avek sa enn ki pa'n ganny kaste, e met zot dan en po an later. Konmsa, zot ava ganny konserve pandan lontan.

¹⁵ Annefe, la sa ki SENYER liniver, Bondye Izrael i deklare: Dimoun pou rekonmans aste lakaz, later, plantasyon rezen dan sa pei.

Zeremi I Priy Senyer

¹⁶ Kan mon ti'n donn Barouk, garson Neriya, bann lakt lavant, mon ti fer sa lapriyer:

¹⁷ Senyer BONDYE! Kan ou ti kree lesyel ek later, ou ti montre ki pouvwar e ki lafors ou annan. Tou i fasil pour ou.

¹⁸ Ou ti montre ou fidelite anver plizyer zenerasyon. Me ou osi pini zanfan pour pese ki zot paran e zot gran paran i fer. Ou menm Bondye ki gran e for; ou menm ki nou apel SENYER liniver.

¹⁹ Ou bann proze i gran; ou realiz zot avek pwisans. Ou port bokou latansyon lo tou sa ki dimoun i fer; ou tret sakenn zot dapre son kondwit e dapre fri son bann aksyon.

²⁰ Otrefwa, ou ti akonpli bann mervey, bann keksoz fantastik dan pei Lezip; ou kontinyen fer tousala ozordi ankor dan Izrael e parmi tou bann imen. Sa i fer ki partou, dimoun i konn ou ozordi.

²¹ Ou'n fer ou pep Izrael sorti Lezip atraver bann mirak e bann prodiz, par ou gran lafors e ou'n fer zot respe ou.

²² Parey ou ti'n promet avek zot bann zanset, ou'n donn zot sa later ki ris e fertil.

²³ Zot ti vin dan sa pei ki zot ti pran posesyon. Me zot pa ti ekout ou lavwa, ni obei ou komannman; zot pa ti viv dapre ou lalwa; zot pa ti fer nanryen sa ki ou ti'n ordonn zot fer. Pour sa rezon ki ou ti fer tou sa bann maler tonm lo zot.

²⁴ Bann Babilonyen pe mont zot latak, pre avek lavil ki zot pou pran. Lager, lafanmin ek lepidemi pou fer lavil tonm dan zot lanmen. Parey ou war, tou sa ki ou ti dir pe ganny realize.

²⁵ Zerizalenm i pre pour li al tonm dan lanmen bann Babilonyen. Akoz alor, Senyer BONDYE, ou ti ordonn mwan aste sa morso later dan Anatot e pey son pri devan temwen?

Repons Senyer

²⁶ Alor SENYER ti dir Zeremi:

²⁷ Mwan menm SENYER, Bondye tou dimoun. Napa nanryen ki tro difisil pour mwan.

²⁸ Mon pe al donn sa lavil avek Naboukodonozor, lerwa Babilonn ek son larme. I pou pran sa lavil.

²⁹ Bann Babilonyen ki pe atak lavil pou antre, e zot pou met dife partou. Zot pou bril bann lakaz kot bann zabitan ti fer mon lakoler monte kont zot, akoz zot ti bril lansan en loner Baal lo twa lakaz, e ofer diven lezot bondye.

³⁰ Depi zot lazenes, pep Izrael ek pep Zida in fer zis sa ki mal ki mon pa kontan. Izraelit in pas zot letan provok mon lakoler par tou zot bann aksyon degoutan.

³¹ Depi zour ki lavil Zerizalenm ti ganny konstri, e ziska ozordi, son bann zabitan in provok mwan e fer mon lakoler monte. Pour sa rezon ki mon pou fer li disparet.

³² Mon pou detri sa lavil, akoz tou sa bann move keksoz ki pep Zida e pep Zerizalenm in komet avek zot bann lerwa, zot bann sef, zot bann pret e zot bann profet.

³³ Olye tourn zot figir ver mwan, zot in vir zot ledo. Pourtan, mon pa'n zanmen arete averti zot; me zot pa'n oule ni ekoute ni aprann.

³⁴ Zot in plas zot bann stati degoutan dan mon tanp ki'n ganny konsakre pour mwan e zot in rann li enpir.

³⁵ Zot in konstri bann landrwa kot zot ador bondye Baal dan vale Benn-Hinonm. Zot fer bril dan dife zot garson ek zot fiy an loner bondye Molek. Zanmen mon ti demann zot fer sa; e zanmen mon ti mazinen ki zot ti ava fer en keksoz parey pour fer Zida komet pese.

Promes Bondye I Redonn Lespwar Son Pep

³⁶ La sa ki SENYER, Bondye Izrael i deklare lo sa lavil ki zot pe dir: Lepep pe dir ki lager, lafanmin ek lepidemi in fer sa lavil tonm dan lanmen lerwa Babilonn.

³⁷ Mon pou rasanble zot depi tou bann pei kot mon ti'n dispers zot dan mon lakoler. Mon pou fer zot retourn isi kot zot ava viv an sekirite.

³⁸ Alor, zot pou vin mon pep, e mon pou vin zot Bondye.

³⁹ Mon pou donn zot en sel leker e en sel mannyer viv ki ava fer zot annan respe pour mwan, pour touzour. Sa i ava pour zot prop boner e osi pour boner zot bann desandan.

⁴⁰ Mon pou fer en nouvo lalyans avek zot pour touzour; mon pou touzour fer zot dibyen. Zot ava annan respe pour mwan avek tou zot leker e zot pa pou abandonn mwan.

⁴¹ Mon pou pran plezir fer zot dibyen. Mon pou met tou mon leker e mon et antye pour ki zot enstal zot definitivman dan sa pei.

⁴² La sa ki SENYER i deklare: Parey mon ti fer tou sa bann gran maler tonm lo sa pep, mon pou aprezan fer vin lo zot, tou boner ki mon'n promet li.

⁴³ Ou dir ki sa pei in ganny livre ek bann Babilonyen e ki i parey en dezer kot ni dimoun ni zannimo pa viv. Me, dan sanmenm sa pei kot dimoun pou rekonmans aste later.

⁴⁴ Wi, dan teritwar Benzamen, otour Zerizalenm, dan bann lavil Zida, dan bann lavil ki lo kolin, dan bann lavil ki lo montanny e dan bann lavil ki dan Negev, dimoun pour aste ankor kare later. Bann akt lavant pour ganny ekri, sinyen, kaste devan temwen. Mon pou remet bann zabitan sa pei dan zot sityasyon pase, SENYER ki deklare.