Zeremi 31 - Labib An Kreol Seselwa

Pep Izrael Pou Retourn dan Son Pei

¹ La sa ki SENYER i deklare: Sa zour pe vini, kan mon pou Bondye tou bann tribi Izrael, e zot ava vin mon pep.

² La sa ki SENYER i deklare: Mon'n montre mon bonte anver sa bann ki pa ti ganny masakre dan dezer. Izrael ava kapab repoze.

³ Depi dan lwen, SENYER ti aparet avek mwan. Mon kontan ou depi touzour e pour touzour. Pour sa rezon, mon'n reste fidel anver ou.

⁴ Izrael ki zoli! Mon pou rekonstri ou! Ou pou ganny remet lo ou de lipye. De nouvo, ou pou fer sorti ou bann tanbouren, e selebre dan lazwa avek bann danser.

⁵ Ou pou replant pye rezen dan bann kolin Samari; bann planter pou manz prodwi zot plantasyon.

⁶ Sa zour pe vini, kan bann gardyen ava kriye depi bann kolin dan rezyon montanny Efraim: Annou leve! Annou al Zerizalenm kot SENYER nou Bondye.

⁷ La sa ki SENYER i deklare: Sant bann kantik lazwa pour Izrael! Kriy avek pasyon pour sa pli gran nasyon. Fer tande zot louanz e kriye: SENYER! Sov ou pep, sa restan pep Izrael.

⁸ Annefe, mon pou fer zot retournen depi bann pei dan Nor, e rasanble zot depi pei pli lwen lo later. Tou dimoun pou la: Bann aveg, bann ki bwete, fanm ansent e fanm ki pe ganny zanfan. Sa pou en gran lasanble ki pou retourn isi.

⁹ Zot pou ariv an pleran; mon pou akonpanny zot e konsol zot; mon pou anmenn zot kot bann larivyer; mon pou fer zot mars lo en semen san danze, kot zot pa pou riske tonbe. Annefe, mon en papa pour Izrael, e Efraim i mon premye garson.

¹⁰ Tou bann nasyon! Ekout parol SENYER e al proklanm li dan bann zil elwannyen: SENYER ki ti dispers Izrael, pou aprezan rasanble li. I pou vey lo li parey en berze i gard son troupo.

¹¹ SENYER in delivre bann zabitan Izrael dan lanmen en lennmi ki ti tre pwisan.

¹² Zot pou vin selebre lo kolin Siyon avek lazwa lo zot figir, kan zot ava war tou sa ki SENYER in donn zot: Dible, diven nouvo, delwil, mouton, kabri ek bef. Zot lavi pou parey en zarden byen aroze; zot pou annan tou sa ki zot bezwen.

¹³ Alor, bann zenn fiy ava danse dan lazwa; zennzan ek vyeyar pou fet ansanm. Mon pou sanz zot dey an lazwa; mon pou konsol zot e sanz zot tristes an lazwa.

¹⁴ Mon pou nouri bann pret avek bokou lavyann gra. Mon pep pou rasazye avek mon bann byenfe, SENYER i deklare.

Senyer I Montre Konpasyon anver Izrael

¹⁵ La sa ki SENYER i deklare: Nou antann bann lavwa kriye asodlarm, sorti dan direksyon Rama. Sa i Rasel ki pe pler son bann zanfan. I refiz tou konsolasyon, akoz zot nepli la.

¹⁶ Me la sa SENYER i deklare: Aret plere, eswiy ou bann larm. Tou sa ki ou'n fer pou ganny rekonpanse. Ou bann zanfan pou sorti dan pei lennmi. Zot pou retourn dan zot pei, SENYER i deklare.

¹⁷ I annan lespwar pour ou lavenir, SENYER i deklare. Ou bann zanfan pou retourn dan zot pei.

¹⁸ Mon'n antann konplent pep Efraim: Ou'n koriz nou severman parey en zenn toro sovaz i ganny drese. Fer nou retourn ver ou, akoz nou'n pare pour retourn kot ou, akoz zis ou SENYER, ki nou Bondye.

¹⁹ Nou ti'n tourn lwen avek ou; me apre, nou ti regrete. Ou'n pini nou; aprezan nou rekonnet nou fot. Nou kanmi e nou'n ganny imilye, akoz pese ki nou'n komet dan nou zenes.

²⁰ La sa ki SENYER i deklare: Efraim! Ou menm mon garson prefere. Ou menm ki mon pli kontan. Sak fwa ki mon menase pour pini ou, mon kontinyen mazin ou an byen. Akoz mon annan bokou lanmour pour ou, mon pou pran pitye pour ou SENYER i deklare.

²¹ Met bann sinyal tou dilon semen; rapel byen larout ki ou ti pran kan ou ti ale. Izrael ki zoli! Retournen. Retourn dan ou bann lavil.

²² Fiy rebel! Pandan konbyen letan ou pou ankor ezite? SENYER in kre en keksoz nouvo lo later: Fanm ki pou fer lakour avek zonm.

Senyer Pou Redonn Izrael Son Prosperite

²³ La sa ki SENYER liniver, Bondye Izrael i deklare: Kan mon ava'n fini retabli lepep koman i ti ete avan dan pei Zida e dan son bann lavil, zot pou rekonmans dir sa bann parol: Kolin sakre kot lazistis i reste! SENYER ava beni ou.

²⁴ Tou dimoun, bann fermye, bann berze avek zot troupo pou viv ansanm, dan Zida e dan son bann lavil.

²⁵ Mon pou rekonfort sa bann ki fatige, e sa bann ki lafen, mon pou donn zot tou sa ki zot bezwen.

²⁶ Apre sa, mon ti reveye; sa sonmey ti'n fer mwan dibyen.

²⁷ Letan pe vini, SENYER i deklare, kan mon pou ranpli Izrael ek Zida avek zabitan ek zannimo, parey ler ou senm lagrenn dan en plantasyon.

²⁸ Mon'n fer tou pour derasinen, koupe, demoli, detri e fer dimal sa pep. Me aprezan, mon pou fer tou pour li; konmsa, i pou ganny rekonstri e replante, SENYER i deklare.

²⁹ Kan sa zour pou vini, dimoun pou nepli dir: Bann paran ti manz rezen ver, me ledan bann zanfan ki pe grense.

³⁰ O kontrer, sa enn ki manz rezen ver ki son ledan pou grense; e sakenn pour ganny pini akoz son prop fot.

En Nouvo Lalyans

³¹ Sa letan pe vini, SENYER i deklare, kan mon pou fer en nouvo lalyans avek pep Izrael ek pep Zida.

³² I pa pou parey sa enn ki mon ti fer avek zot bann zanset, kan mon ti pran zot par lanmen, pour fer zot sorti Lezip. Zot pa'n respekte sa lalyans, menm si mon ti zot met, SENYER i deklare.

³³ La koman pou ete, sa nouvo lalyans ki mon pou fer avek mon pep, SENYER i deklare: Mon pou met mon bann lalwa dan zot leker. Alor, mon ava vin zot Bondye, e zot ava vin mon pep.

³⁴ Personn pa pou bezwen enstri son prosen oubyen son frer, SENYER i deklare, akoz zot tou, depi pli pti ziska pli gran, pou konn mwan. Mon pou pardonn zot fot, e oubliy zot pese, SENYER i deklare.

³⁵ La sa ki SENYER i deklare: Lekel ki donn soley pour klere pandan lizour? Lekel ki komann lalin ek bann zetwal pour klere lannwit? Lekel ki fer lanmer azite e laroul ronfle? Sa i SENYER liniver.

³⁶ Osi lontan ki sa lord natirel pa sanze, bann desandan Izrael pou kontinyen egziste koman en nasyon, SENYER ki deklare.

³⁷ Si lesyel ki anler, ti kapab ganny mezire; si bann fondasyon later ki anba, ti kapab ganny sonde; alor mon ti ava rezet tou bann desandan Izrael, pour tou lemal ki zot in fer, SENYER ki deklare.

³⁸ Sa zour pe vini, SENYER i deklare, kan lavil Zerizalenm pou ganny rekonstri zis pour mwan, depi latour Hananeel, ziska laport Dan Kwen.

³⁹ Nouvo limit lavil pou ganny trase dabor lo kote Was, ver kolin Gareb; answit i pou vire ver Goa.

⁴⁰ Sa vale antye kot bann dimoun mor i ganny antere e kot salte i ganny zete, tou bann propriyete ki sitye par lao pti larivyer Sedron ziska laport Seval ver Les, pour ganny konsakre pour SENYER. Nanryen pa pou ganny arase oubyen detri dan sa lavil.