Zeremi 3 - Labib An Kreol Seselwa

Izrael pa'n Reste Fidel anver Bondye

¹ La sa ki SENYER i deklare: Kan en zonm i divorse avek son fanm, e sa fanm i kit li pour en lot zonm, son mari pou kapab repran li ankor? Si i fer sa, pa i pe rann pei enpir? Sa ki Izrael in fer: In prostitye li avek en kantite lanmoure. Aprezan i oule retourn kot mwan!

² Lev ou lizye, get lao: Lo tou sa bann kolin, ou'n fer parey en prostitye. Parey bann bedwen dan dezer ki esper en viktim, ou'n esper ou bann lanmoure lo bor semen. Konmsa ki ou'n rann enpir pei.

³ Pour sa rezon, mon'n anpes lapli tonbe e sezon lapli pa'n vini. Vreman, ou'n vin parey en prostitye, me ou pa ni onte.

⁴ Ou telman napa okenn pider ki aprezan ou kriy ver mwan: Mon papa! Ou'n kontan mwan depi mon lanfans.

⁵ Ou pou gard rankin kont mwan pour touzour? Sanmenm ki ou ti dir. Me ou'n kontinyen avek tou ou bann forfe, e ou'n reisi kantmenm.

Bondye I Kondann Izrael pour Idolatri

⁶ Dan letan ki Zosyas ti lerwa, SENYER ti dir mwan, “Eski ou'n war sa ki Izrael in fer? Parey en fanm ki tronp son mari, in al lo bann kolin bwaze kot i azir parey en prostitye anba sa pye dibwa ki son feyaz i ver.

⁷ Mon ti krwar, SENYER ti dir, ki Izrael ti ava retourn kot mwan, apre tou sa bann forfe. Me i pa'n retournen. Zida son swadizan ser, sa tret, i'n temwen.

⁸ In osi war sa ki'n arive avek rwayonm Izrael kan i ti tourn kont mwan. Akoz in komet adilter, mon'n divorse avek li e mon'n sas li. Malgre sa, Zida, son swadizan ser, sa tret, pa'n per mon pinisyon, e li osi, in al dan prostitisyon.

⁹ I'n komet adilter avek ros ek pye dibwa, in sali son lekor; in osi sali son pei.

¹⁰ Apre tousala, Zida, sa ser Izrael, sa tret, ti fer sanblan ki i ti pe retourn ver mwan. I pa ti senser,” SENYER i deklare.

¹¹ SENYER ti kontinyen: Menm si Izrael pa'n retourn ver mwan, i mwen koupab ki Zida ki ti pe fer krwar i fidel, me ki an realite, li osi i ti enfidel.

¹² Alor Zeremi! Al anons sa mesaz avek tou bann zabitan dan Nor. Mwan SENYER ki deklare: Izrael enfidel, retourn kot mwan. Mon pa pou kontinyen pran lakoler avek ou akoz mwan SENYER, mon annan pitye pour ou. Mon pa pou gard lakoler avek ou pour touzour, SENYER i deklare.

¹³ Zis rekonnet ki ou'n fer sa ki mal e ki ou'n revolte kont SENYER ou Bondye. Avoue ki ou'n donn ou lanmour bann bondye etranze i ki ou pa'n obei mon komannman, SENYER i deklare. La sa ki SENYER i deklare:

Zabitan Zida ek Izrael Pou Retourn dan Zot Pei

¹⁴ Retourn kot mwan, pep enfidel. Akoz mwan ki zot SENYER, mon pou pran enn parmi zot dan sak lavil, de parmi zot ki sorti dan sak fanmir, e mon pou fer zot retourn Siyon.

¹⁵ Mon pou donn ou bann sef ki ava vey lo ou e ki obei mwan. Zot ava diriz ou avek lasazes ek disernman.

¹⁶ Kan ou ava vin en gran nasyon dan sa pei, dimoun pou nepli koz lo Kof lalyans SENYER. Zot pou nepli mazin sa. Zot pou nepli bezwen li e personn pa pou mazin fer en lot.

¹⁷ Kan sa zour i arive, Zerizalenm pou ganny apele Tronn SENYER e tou bann pep pou rasanble la, pour rankontre mwan. Zot pou nepli swiv dezir zot move leker.

¹⁸ Sa zour la, Zida pou vin ansanm avek pep Izrael. Zot pou sorti dan pei Nor, kot zot in viv annegzil, pour zot vin dan sa pei ki mon'n donn zot zanset, koman en patrimwann.

Bondye I Demann son Pep Retourn ver li

¹⁹ SENYER i deklare: Mon ti'n deside plas ou parmi bann garson prefere e donn ou en zoli pei, pei ki pli zoli omonn. Mon'n oule ki zot apel mwan Papa e ava reste fidel anver mwan.

²⁰ Me, parey en move fanm i kit son mari, pep Izrael in enfidel anver mwan, in kit mwan. SENYER ki deklare.

²¹ Tapaz ki sorti lao dan kolin, i lavwa bann zanfan Izrael ki pe plere e ki pe sipliye. Zot in oubliy mwan, SENYER zot Bondye e zot in pran en move semen.

²² Zot tou bann zanfan rebel ki'n tourn zot ledo kont SENYER, retourn kot li; i ava pardonn zot, zot enfidelite. Zot dir: Wi, nou pe retourn ver ou SENYER, akoz ou menm nou Bondye.

²³ Annefe, tou sa ki sorti lao dan kolin, i zis pour tronp dimoun. Zis SENYER, nou Bondye ki kapab sov Izrael.

²⁴ Depi dan nou lazenes, sa bann pratik onte in kout nou bann zanset zot betay ek zot bann zanfan ki zot in ofer devan Baal.

²⁵ Annou kasyet dan nou laont e ganny kouver avek dezoner. Annefe, depi nou lanfans, nou, avek nou paran, nou pe komet pese anver SENYER, nou Bondye. Nou pa'n ekout sa ki SENYER nou Bondye ti'n dir nou.