Zeremi 28 - Labib An Kreol Seselwa

Profet Hananya I Koz kont Zeremi

¹ Sa menm lannen, dan konmansman renny Sedesyas, lerwa Zida, dan senkyenm mwan sa katriyenm lannen, Hananya, garson Azour, en profet ki sorti Gabaon, ti koz avek mwan dan tanp SENYER, devan bann pret e devan lepep:

² La sa ki SENYER liniver, Bondye Izrael i deklare: Mon pou kas sa fardo ki lerwa Babilonn ti'n met lo bann nasyon.

³ Dan 2 an, mon fer retourn dan sa pei, tou bann lobze ki dan tanp SENYER e ki lerwa Naboukodonozor in anmenn avek li Babilonn.

⁴ Mon pour osi fer Yoyakin, garson Yoyakim ek lerwa Zida, retourn avek tou bann zabitan Zida ki ti'n al annegzil Babilonn. Wi, mon pou kas sa fardo ki lerwa Babilonn ti'n met lo zot, SENYER ki deklare.

⁵ Devan bann pret ek lepep antye ki ti pe debout dan tanp SENYER, profet Zeremi ti reponn profet Hananya.

⁶ I ti dir li: Amenn! Mon demande ki SENYER i azir parey ou'n dir koman en profet! Ki i ranmenn depi Babilonn tou bann lobze ki ti dan tanp ek lepep ki ti'n ganny anvoye annegzil.

⁷ Selman, ekout sa ki mon annan pour dir ou ek lepep antye.

⁸ Bann profet ki ti vin avan ou ek mwan, dan letan pase, ti anons lager, lafanmin, lepidemi kont bokou pei e bann gran rwayonm.

⁹ Me si en profet i dir ki SENYER in anvoy li anons lape, nou ava krwar ki SENYER in vreman anvoy li, kan son parol ava realize.

¹⁰ Alor, Hananya ti tir sa bar dibwa ki ti lo likou Zeremi e i ti kas li an morso.

¹¹ I ti dir devan lepep antye: La sa ki SENYER i deklare: Dan 2 an, SENYER pou kas sa bar dibwa ki lerwa Naboukodonozor in met lo likou tou bann nasyon. Apre sa, Zeremi ti pran son semen, e ale.

¹² Apre ki profet Hananya ti'n kas sa bar dibwa ki ti lo likou Zeremi, SENYER ti koz avek Zeremi:

¹³ Al dir Hananya: La sa ki SENYER i deklare: Ou'n kapab kas sa bar dibwa, me mon pou ranplas li par enn an fer.

¹⁴ Annefe, la sa ki SENYER liniver, Bondye Izrael i deklare: Mon met lo likou tou sa bann nasyon, en bar an fer e zot ava servi Naboukodonozor, lerwa Babilonn. Menm bann zannimo sovaz pou anba son pouvwar.

¹⁵ Profet Zeremi ti dir profet Hananya: Hananya! Ekout mwan byen. SENYER pa'n anvoy ou e ou pe fer sa pep krwar dan en mansonz.

¹⁶ Alor, la sa ki SENYER i deklare: Mon pou fer ou disparet lo sa later. Ou pou mor sa lannen, akoz ou'n fer dimoun revolte kont SENYER.

¹⁷ Profet Hananya ti mor dan setyenm mwan sa menm lannen.